30. des. 2012

Snart er det 2013...

Nyttår. Nytt år. Det nye året nærmar seg. 2012 har gått fort slik som dei, åra, ofte gjer. Gjennom året har eg for det meste halde på med studiane og korps, både som instruktør og som musikant. I månadsskiftet februar-mars var me, sambuaren min og eg, ein tur til London. Det sit igjen som noko av det kjekkaste eg opplevde i år :) Spelte mykje på 17.mai, hadde eksamen, og då sommaren kom, jobba eg i hele ni veker, dvs. heile ferien! Har jo også vore mykje med venene mine, både de i Kr.sand og folk her på Sola. Korpskonkurranser har det også blitt, og tid med familien. Og no, etter nok eit haustsemester, er det snart på tide å ringje inn det nye året. Eg har ingen store nyttårsforsett, men som mange andre synest eg det er ganske ålreit å kunne starte på nytt. Nytt år, nye sjansar. I morgon skal me feire nyttår saman med den gjengen me har feira med dei to føregåande åra. Eg gleder meg til god mat, quiz, mykje snakking, god musikk, ja, berre vere saman med flotte vener. Godt nyttår alle saman!

28. des. 2012

Romjul

Det er stille rundt meg. Dei andre er på hytta mens eg ikkje kom meg opp dit denne jula. Eg skal nemleg bort til ei veninne no i kveld der me skal snakke, høyre på god musikk og bare slappe av. Me blir litt over ti stk., og det kjem til å bli veldig koseleg :) Det hadde blitt så altfor travelt om eg skulle fyke opp og ned hytta, for ikkje berre skal eg vekk i kveld, men om to dagar kjem kjærasten ned att frå Sunnmøre. For to dagar sidan, om kvelden, kom familien frå Florø hit, og me hadde pakkeopning nr. to. Fekk ei kjempefin, lilla lue som tanta mi har laga, og også nokre kjempefine pulsvarmarar som kusina mi laga på skulen til meg :) I går var eg ein tur i byen for å byte ei av gåvene som eg fekk på julaftan, og eg blei veldig fornøgd med det eg til slutt enda opp med. Og på kvelden fekk eg besøk av hu veninna mi som til vanleg bur i Trondheim. Me laga oss god mat, snakka mykje, såg Mamma Mia og Bridget Jones på randen. Er så utruleg kjekt å ha ein slik jentekveld når me fyrst er heime på Sola begge to.

26. des. 2012

Jul på Sola

Og så er me allereie komme til andre juledag. Her i heimen har me det fint; me slappar av og koser oss, prøver ut nokre av gåvene som me fekk på julaftan, koser oss endå meir og som vanleg blir det nok julekaker. Sånn sett så blir det jo litt greitt å komme tilbake til kvardagen om litt over ei veke. Men eg vil ikkje tenkje på det akkurat no. Lille julaftan pynta me treet med masse fin pynt, og me åt god risgraut med mandel i (og den var det pappa som fekk i år). På sjølvaste julaftan var eg i bunad allereie før klokka var elleve! Det må vere rekord! Såg Tre Nøtter til Askepott, og ho fekk prinsen i år også :) Etterpå var me alle bortom mormor ein tur med mat og gåver, og det var koseleg. I år var eg også i kyrkja der eg spelte saman med skulekorpset mitt, altså det korpset som eg spelte i fram til eg flytta til Bømlo. Kjempekoseleg å få vere med dei, og det var dei samme, gamle songane som blei spelt også i år som dei tidlegare åra :) Då eg kom heim, åt me god ribbe og medisterkaker; til dessert åt me riskrem – "same procedure as every year...". Til slutt var det på tide å opne gåvene, og også i år fekk eg mykje fint: klede (blant anna ein kjempefin, kongeblå peplumtopp), fine armband, knallraud kaffikanne og mykje anna. Noko av det finaste var gavekort på Aquarama Spa i Kristiansand som eg fekk av han der fine :) Tusen takk til alle saman! Elles så har eg fått lese ut tre av pensumbøkene for neste semester, deriblant Lasso rundt fru Luna av Agnar Mykle. Boka er på vel 700 sider, men eg må seie at eg blei positivt overraska :) Seinere i dag får me besøk i frå Florø, og då blir det et par gåver til å opne. Og Downton Abbey (julespesial) kjem også i kveld. Jepp, eg gleder meg!

Nokre julebilete

24. des. 2012

God jul!

22. des. 2012

Julebakst

Peparkaker. "Når en pepperkakebaker baker pepperbakerkaker, tar han først en stekegryte og en kilo margarin. Oppi gryta smelter smøret og det neste han må gjøre, er å røre sammen smøret med en teskje med farin." Her heime bakte me som sagt peparkaker på torsdag, men i dag var eg heime hos ei veninne saman med ei til, og då blei det endå meir baking av peparkaker. Kjempekoseleg å gjere noko slik saman no i jula, spesielt fordi me alle bur i forskjellige byar til vanleg :) Sende kjærasten min heim til Sunnmøre i går, og på kvelden var eg på ein liten julefest hos ei her i gata. Kjekt å sjå folk som eg ikkje har sett eller snakka med på ein del år. I morgon skal me i alle fall pynte juletreet og ete ordentleg risgraut til middag; det er jo lille julaftan i morgon!

20. des. 2012

Ordentleg feriehygge!

"Nå har vi vaske golvet og vi har børi ved, og vi har sett opp fuggelband og vi har pynta tre'." Nei, me har nok ikkje komme så langt her i heimen, men me er i gong. Og då eg var innom biblioteket på tysdag, såg eg at dei hadde pynta så fint og laga eit slags juletre. Eg synest det er kjekt at det går an å pynte litt alternativt sånn i blant (men her heime skal me pynte eit vanleg, fint, grønt juletre på lille julaftan). Elles så er kjærasten her på besøk, men i morgon reiser han heim til sin familie på Sunnmøre der han skal feire jul. Ingen av oss vil gi slipp på å feire ein tradisjonell jul saman med våre familiar. Så sjølv om eg så gjerne ville hatt han her med oss i jula, så skjønner eg godt at han vil heim til sin eigen familie og feire jul saman med dei :) I går då alle hadde komme heim og fått i seg litt middag, tok me alle i eit tak på kjøkkenet og bakte peparkaker. Og som alltid smakte deigen mykje betre enn dei ferdigsteikte peparkakene ;) Litt artig er det jo å stå der med mel overalt, deig på fingrane og god lukt i frå ovnen. Blir ikkje heilt lei alle førebuingane til jul. No blir det snart puslespellegging her. Hygge!

18. des. 2012

Kafé- og handletur :)

Dagane her på Sola går fort, og plutseleg har eg snart hatt to veker juleferie. Allereie! Tida går ofte litt for fort når ein har ferie. Det er så mykje ein vil gjere og så mykje som skal bli gjort, og plutseleg er kvardagen her igjen. Men eg skal i alle fall nyte ferien så godt eg berre kan :) Har i dag vore i Stavanger sentrum saman med ei av mine besteveninner på endå meir julehandling. Eg er jo ferdig med handlinga, men det var ikkje ho, og då ho spurde meg om eg ville vere med, så svarte eg så klart "ja". Kjempekjekt å endeleg få treffe ho igjen; det er ikkje så altfor ofte at me får sjå kvarandre når ho bur i Trondheim og eg i Kr.sand. Me gjekk mykje rundt og bare kikka på ting og tang, ho fann nokre julegåver og så var me innom vår stamkafé, Steam. Godt med ein god kopp kaffe, og så blei det jo mykje prating! Før me tok bussen heim, var me innom Meny på Straensenteret, og desse epla møtte oss då me kom inn i butikken. Artig! Var også ein tur innom biblioteket, så no skal det bli mykje lesing her i huset :)

16. des. 2012

"Pakke, pakke, pakke, pakke..."

Pakkar inn julegåver for fullt! No når dei aller fleste gåvene er i boks, kan eg jo like gjerne pakke dei inn slik at dei er klare til julaftan. Nesten eit lite juleverkstad! Har hatt nokre fine dagar saman med kjærasten min, men i går reiste han tilbake til Kr.sand for å dirigere to konsertar. På grunn av det dårlege vêret som har vore her dei siste dagane, var det ei stund usikkert om han kom seg til Kr.sand. Heldigvis letta vêret utpå dagen, og han fekk dirigert den eine av dei to konsertane i dag tidleg. Dagen vår på fredag blei feira med julegåvehandling (eg var vel meir gira enn han), middag på restaurant og som sagt Hobbiten. Det var i alle fall kjekk undehaldning, så opplevinga var eg fornøgd med ;) Mamma og eg har i dag vore på endå meir julegåvehandling. Det var nemleg ope på Kvadrat, og eg må seie at det var veldig greitt å få denne handlinga unnagjort. Elles så sit eg nede på rommet mitt og småputlar med noko temmeleg hemmeleg. Det er jo ofte slik før jul at ein har løyndomar, noko som i alle fall eg synest er litt spennande :)

14. des. 2012

Fire fine år!

Tida går utruleg fort! Tenk at det allereie er fire år sidan me to, han der fine sambuaren og eg, blei saman. Det er fire år sidan fyrste gong me kyssa, det er fire år sidan fyrste gong me heldt hender, det er to og eit halvt år sidan me flytta saman, det er eit og eit halvt år sidan me flytta saman til bustad nr. to. Me har opplevd mykje i løpet av desse fire åra. Eg budde jo eit år på folkehøgskule utan han, før me flytta saman, men det gjekk eigentleg ganske bra. Så klart var det mykje saknad, men eg trur det er bra å kunne oppleve ting på eiga hand også. Det året opplevde eg så utruleg mykje, eg vaks, og sjølv om det var utan han, har eg aldri angra på at eg følgde draumen min om eit år på folkehøgskule før ein eventuell høgare utdanning. Eg er glad for at me tok sjansen på å bu vekke frå kvarandre, og eg er glad for at me tok sjansen på å flytte saman sjølv om eg då syntest at det var litt skummelt. Me er ikkje alltid einige om ting og tang, men me utfordrar kvarandre; me blir jo einige til slutt (om ikkje anna, så blir me einige om at me er ueinige). Gratulerer med dagen!

13. des. 2012

Snøkaos

"Det snør, det snør, tiddelibom. Det er det det gjør, tiddelibom. Nå snør det mye mer enn før, tiddelibom – og huttemeg tu". Ja, her har snøen verkeleg lava ned, og eg kan ikkje påstå at eg liker det! Det er greitt med litt snø som berre ligg der, litt for å pynte opp den elles så triste naturen no om vinteren. Men når snøen berre skapar kaos, og ein må ut for å moke i alle fall tre gongar i løpet av dagen, då er snøen berre i vegen. Den er jo fin å sjå på, eg skal innrømme det, men det er òg det einaste som i mine auge er positivt med den kvite massen. Nok klaging; det kunne vore mykje verre. Eg har kjærasten min her, og då blir det med ett så mykje betre. I går bakte me serinakaker, eg rydda i heimen og han moka snø, me laga middagen, og elles slappa me av. Me har ikkje gjort så mykje i dag i og med at eg, igjen, har klart å bli forkjøla. Får håpe det går over til julaftan om ikkje anna ;) I morgon, om eg er litt betre, skal me til byen for å handle nokre julegåver, og så skal me på kino for å sjå Hobbiten. Eg har ikkje nokre store forventningar fordi den har fått blanda kritikk, men det blir likevel kjekt med ein kinotur :)

11. des. 2012

Nydeleg solnedgang!



Vinterdag på fjellet

Eg lar biletet tale for seg sjølv! Pappa og eg var oppom hytta i går med litt "juleproviant", og der møtte me dette nydelege synet. Sola stod høgt på himmelen, snøen var krittkvit og det var is på vatnet. Me bar ved opp til hytta, sette fram litt juledekor og elles sjekka at alt stod bra til. På veg heim, om bord på ferja, fekk me sjå ein nydeleg solnedgang (bilete kjem seinare)! Herleg tur ein ordentleg, fin vinterdag. Har fått unnagjort litt julehandling i dag; i kveld kjem kjærasten min hit :)

9. des. 2012

Førjulstid på Sola

Heime på Sola! Nesten ein månad med juleferie skal bli herleg. Har hatt nokre travle, men fine dagar i Kristiansand. På torsdag var eg jo på styremøte, og mesteparten av fredagen brukte eg til å pakke kofferten med klede og det eg elles skulle ha med meg. Frå seks til ni var eg på nissespeling saman med ein fin gjeng i frå brassbandet. Me brukte litt tid på å komme i gong, men etter kvart lydde det ganske ålreit :) I går fekk eg pakka resten av kofferten, og eg stod ei stund på kjøkkenet der eg bakte sjokoladestenger som me skulle ha med til julebordet med Agder brass. Det er der biletet blei tatt. Me hadde det veldig artig med quiz, "Eyetoy" og mykje lått og løye. Og i dag måtte eg tidleg opp; bussen som eg skulle ta, gjekk klokka ni. Bussturen gjekk fint, eg høyrde på musikk og slappa av. Eg gjekk av på Helleland, for mamma og eg skulle jo innom julebyen Egersund. Kjempekoseleg med ein liten jentetur, og no byrjar verkeleg førjulstida!

7. des. 2012

Finaste songen i desse førjulstider



Jula byrjar å nærme seg, og då er det alltid ein song som eg berre må høyre, nemleg "Walking in the Air" frå teiknefilmen The Snowman. I filmen er det Peter Auty som syng songen, men det er Aled Jones som verkeleg gjorde songen kjent nokre år etter at filmen kom ut. Det er han du kan sjå i videoen ovanfor. Her syng han med seg sjølv, og det er ca. tjue år mellom lille Aled Jones og den vaksne versjonen. Eg har nok delt denne videoen før, men eg må dele den i år også. Vakkert!

5. des. 2012

Ferdig – no er juleferien her!

Eg er ferdig med alle eksamenane mine, og har no offisielt JULEFERIE! For ei herleg kjensle! Sjølve eksamen kunne gått betre (men også verre), men eg er strålande fornøgd i og med at eg har strevd med å skjønne alt i dette emnet. Det har vore så mykje å halde styr på, og ikkje alt har vore like enkelt å forstå. Men no er eg ferdig. På sundag ber det mot Sola, men på vegen blir det ein stopp innom julebyen Egersund saman med mamma. Det er et par år sidan sist gong eg var der, så eg gleder meg litt ekstra mykje i år. Der er det alltid så god stemning med folk i nissekostyme, julemusikk og fleire, små torgbuer der det blir selt heimelaga produkt. Saman med pynting av treet på lille julaften, Tre Nøtter til Askepott, Reisen til Julestjernen, og vere saman med familien i jula, er det dette som er jul. Prøv ut julebyen du også! På biletet ser de kor glad eg er etter overstått eksamen; semesteret er over (ikkje skuleåret altså...). I morgon er det siste dag på jobb for dette året, og seinare på kvelden skal eg på styremøte med brassbandet. Og elles skal eg pakke og slappe av dei neste dagane :)

3. des. 2012

Kvitt så langt auget ser

Ute er det heilt kvitt. Inne sit eg og les til eksamen. I natt har det snødd veldig mykje, og det gir seg ikkje. Eg er jo ikkje den som liker snøen mest, men no er det siste veke her i Kristiansand for i år. Etter klokka tre om to dagar har eg offisielt juleferie, og på sundag reiser eg heim til Sola. Eg har rett og slett ein månad med juleferie. Skal ikkje klage på det, nei :) Fekk ordentleg julestemning i går då eg hjelpte skulekorpset (Hånes og Tveit) med å spele på familiegudsteneste. Mykje bra julemusikk og ein varm stemning. Resten av dagen i går gjekk med til lesing, me høyrde mykje på julemusikk og me hadde risgraut til middag. Med andre ord: desember! I kveld blir det årets siste øving med brassbandet. Men på laurdag skal me på julebord saman med den gode gjengen, så i kveld blir ikkje den aller siste gongen før neste år saman med dei. Eg må seie det at sjølv om eg eigentleg er eit janitsjarmenneske, så trivst eg veldig godt saman med alle dei flotte folka i Agder brass :) Vel, no må eg tilbake til lesinga. Eksamen om to dagar...

1. des. 2012

"...det er første desember i dag"

Og der var det plutseleg fyrste desember, gitt! Her i Kristiansand har det snødd i natt, så då me våkna, var det ganske kvitt ute. No som det er desember, synest eg det er heilt greitt med litt snø, men eg er glad for at snøen venta såpass lenge (fyrste året med budde her, kom snøen fyrste helga i november og låg fram til april!). Også i år har me pakkekalender, men i år byter me på å opne slik at me har annankvar dag. Sambuaren var fyrst ut, og han fekk ei nisselue med bittelitt snop oppi. Eg har ei nisselue frå før, så no kan me gå rundt og vere nissar saman, men berre her heime i så fall ;) Trass i at det er laurdag i dag, har me vore ein tur på skulen; han har eksamen på tysdag og eg på onsdag, så no er det verkeleg siste innspurt. Kjem nok til å ta det med ro i kveld :)

29. nov. 2012

Herleg, heimestrikka hals

Lesinga til neste (og siste) eksamen er i gong for fullt. Både i går og i dag, rett etter frukosten, har det vore fram med bøkene, på med musikk og så klart litt kaffe i koppen. Merker at det er mykje pensum som skal på plass, bli forstått, i hovudet mitt, og det er verkeleg ikkje berre berre. Nokre ting set seg, andre går inn det eine øyre og ut det andre. Men eg har jo lese jamt og trutt gjennom heile semesteret, så heldigvis er det ein god del som eg faktisk hugsar og som eg skjønnar. Innimellom alle togturane, eksamenslesing og korps, har eg strikka ein hals til meg sjølv. Og som de ser på biletet, er eg veldig fornøgd (trass i eit trøytt og forkjøla tryne). Fekk inspirasjon herifrå, men sidan eg ikkje brukte det same garnet eller same storleik på strikkepinnane, måtte oppskriften justerast litt. Men som sagt så blei eg veldig fornøgd! Kjekt å bruke noko som ein har laga sjølv, akkurat som med lua eg laga i fjor haust. I tillegg så har eg jo den nye og fine genseren som mamma strikka til meg (og eg har endå meir heimestrikka i klesskapet som nok blir med meg heim til Sola i jula).

27. nov. 2012

Ei dryg veke igjen

Gleder meg så innmari til juleferie! Skulle gjerne hatt ferie no, no med ein gong! Når ein er forkjøla, og i tillegg skal vere opplagt for å kunne lese til eksamen, tja, det er ikkje den beste kombinasjonen. Men eg lever og har ikkje feber, så eg kjem meg nok gjennom denne eksamensperioden, eg som alle andre. Eg får i meg litt kaffi og te (som på biletet, der det er te oppi ein kaffikopp), og det hjelper jo i alle fall litt. Og så hjelper det jo at eg no har fått levert frå meg heimeeksamenen, og berre har ein eksamen igjen! Om ei veke og ein dag er eg ferdig, då har eg juleferie (så no skal eg slutte å klage, for eg veit at eg får ein lang juleferie i år). Hadde ei kjekk øving med brassen i går, og hadde det også kjekt på jobb i dag. Blir så glad og engasjert når eg ser at musikantane forstår det eg seier, eg ser dei får det til og eg trur dei kosar seg! No sit me her og slappar av med god bok, strikketøy og julemusikk. Kanskje litt tidleg, men, men ;)

25. nov. 2012

"Singin' in the Rain"

 

No stormar det og ular ute. Skikkeleg haust! Eg sit her inne i sofaen med pensumbøkene framfor meg, prøver å motivere meg sjølv til å skrive. Heimeeksamen er ikkje alltid like kjekt når ein heller vil sjå film og drikke kakao i sofaen saman med kjærasten mens ein høyrer på det stygge vêret ute. Men, men. Sånn er det jo når me er midt oppi eksamenstida. For å holde motet oppe, høyrer eg på musikk, og då synest eg at dette er den optimale songen på slike tunge og grå regnvêrsdagar :)

23. nov. 2012

Heimeeksamen

Slik har dagen min vore i dag: pensum, boka Nedstörtad ängel av Per Olov Enquist, halspastillar, litt sjokolade og kaffi. Byrja å få vondt i halsen i går, og då eg kom heim frå jobb, hadde han der fine kjøpt både halspastillar og sjokolade til meg. Slik at eg kunne føle meg betre :) Sparte det til i dag, for eg visste det kom til å bli ein lang dag med mykje lesing. Ja, eksamensperioden er i gong for fullt. Var på skulen i går og fekk skrive ned ein del tankar ang. oppgåva, og eg fekk kladda litt. Og – det blir nok skulen på oss begge to i morgon. Ingenting er betre enn å stå opp tidleg om morgonen på ein laurdag, få i seg ein god frukost, dra på skulen, få gjort ein masse og så komme heim, slappe av i sofaen og ete ein god pizza eller anna laurdagsmiddag. Eg gleder meg allereie!

21. nov. 2012

No er me i gong!

Og...der! Eksamensperioden er i gong. I dette semesteret har eg berre to eksamenar, men det er likevel eksamenar som eg må gjere og eg vil jo helst gjere det bra :) Denne fyrste eksamenen er heimeeksamen, noko som vil seie at me får ei veke på å skrive denne oppgåva, med dei hjelpemidla me har for handa. Enkelt?! Tja, sensorane har jo desto høgare krav til kva ein god heimeeksamen er enn ein eksamen me skriv på skulen utan noko form for hjelpemidlar. Eg er i alle fall i gong med denne heimeeksamenen etter at oppgåveteksten blei lagt ut tidlegare i dag. I går hadde me (klassen min og eg) siste forelesning for dette semesteret, og no er fokuset retta mot eksamenane. Og litt korps innimellom. Har ikkje tatt nokre nye bilete i det siste, så eg legg heller ved nok ein bileteserie i frå Downton Abbey. Alle er nok ikkje like hekta som det eg er, men eg viser desse bileta likevel ;)

19. nov. 2012

Tung måndag

Ei ny veke er i anmarsj. Etter å ha høyrt på korps og elles slappa mykje av i helga, merker eg at det er tungt å komme i gong med veka. Eg veit at eg må lese mykje pensum i løpet av veka i tillegg til at me får utdelt heimeeksamenen no på onsdag. Dette hjelper ikkje akkurat på motivasjonen. Men om under tre veker er det juleferie (som eg allereie har nemnt), og eg gleder meg! Noko anna som også gjer starten på veka litt tung, er at alt som kunne gå gale gjekk gale i dag morges: smøret smakte vondt, eg brann meg på brødristaren, hjulet på sykkelen min var ikkje heilt fiksa (det blei eigentleg fiksa førre onsdag...), kjeda hoppa av og det var så glatt at me måtte gå av syklane. Ja, slik kan det også gå. Men eg trur det fiksar seg med øving i kveld :) Alltid kjekt å spele saman med dei i Agder brass. Må berre få legge ut "diplomet" me fekk av dei herlege musikantane i Grim skolemusikkorps (klikk på biletet, så blir det større) :D Tusen takk alle saman!

17. nov. 2012

Stavanger Open 2012

Helga byrjar å nærme seg slutten, noko som alltid kjem som ei overrasking. Helgene går så altfor fort, spesielt dei der ein er fri og frank, og ikkje treng å gjere så altfor mykje. I går sov me lenge og vel, men me fekk utruleg nok lese noko pensum (for eksamenane nærmar seg med stormskritt) i tillegg til å berre sitte i sofaen og sløve. Ute har regnet verkeleg hølja ned. Både i går og i dag. Men det er jo slik det ofte er her på Sola og i Stavanger-området; regn, regn og atter regn. Har i dag vore i Stavanger forum for å høyre på Skolekorpset Sola (skulekorpset i mitt hjarte) og Grim skolemusikkorps. Det er skulekorpskonkurransen Stavanger Open no i dag – det er jo derfor me er her denne helga – og eg må seie at eg er imponert! Eg blei faktisk rørt der eg satt i salen og såg mitt gamle skulekorps på scenen. Dei er så flinke alle saman, både Sola og Grim! Det blir Kr.sand i morgon, men om berre tre veker har eg juleferie, og då blir eg jo her til over nyttår.

15. nov. 2012

Herleg, heimestrikka genser






















Har nettopp komme heim til Sola for nok ei helg med korpskonkurranse. Som de ser så er eg strålande fornøgd med den heimestrikka genseren som mamma har laga til meg. Den er veldig varm og god, så eg skal iallfall ikkje fryse i vinter ;) Elles, etter mykje rydding, støvsuging og kutting av frukt, hadde eg styremøte (Agder brass) i leilegheita i går. Det var eit produktivt og koseleg møte. I dag har eg lese pensum og vore på jobb før me tok toget til Sandnes der me blei henta av pappa. Har fri i morgon, men det blir forhåpentlegvis noko pensumlesing i løpet av dagen.

13. nov. 2012

Svevande lyrikk

Svevande, flytande, abstrakt. Tropar er ikkje tropar, figurar er ikkje figurar og symbol er heller ikkje handfast. "Det (språklige) ordnede kosmos bryter sammen i takt med at man nærmer seg det iakttagende, ordnede blikkets punkt, m.a.o. subjektet." Når ein blir servert setningar som dette på forelesning, då lurer ein verkeleg på kva ein eigentleg gjer der. Lyrikk, poesi, altså det me ofte kallar dikt, har eg hatt om på universitetet før og eg synest det var spennande. Men no verkar alt berre som eit einaste stort samansurium, og når oppgåvene me får lyder "finn verkemiddel", er det ikkje like lett. Kor skal ein starte, kva skal me eigentleg sjå etter?! Heldigvis har me ikkje berre om lyrikk, men også om drama og sakprosa, og eksamenen i dette emnet er heimeeksamen. Så eg trur det skal gå bra, men eg merkar at eg i forelesningstimene lar blikket vandre, for det blir for abstrakt for min del. Me er alle forskjellige, andre synest kanskje desse timene med lyrikk er alle tiders. Eg for min del tenkjer heller på at det snart er jul. Jul med familien og alle tradisjonane som høyrer julen med :) I morgon blir det styremøte her i heimen med styret i brassbandet, så eg må nok rydde og fikse litt før dei kjem hit i morgon kveld. På biletet kan de sjå nokre av dei dikta me har på pensumlista vår no i haust. Så var det om å gjere å forstå dei, då... :P

11. nov. 2012

Helg med stor H

Sit her i stova med kaffekoppen i handa. Nyt morgonen, det er sundag. Nyt at det er helg, ei helg der eg faktisk har fri. Okei, eg burde nok ha lese pensum eller gjort noko husarbeid, men ein må kunne nyte ein fin morgon, det er jo sundag. Eg har i tillegg vore litt småforkjøla, så eg kjenner det er greitt å ta det litt med ro før turen til Stavanger og før eksamenane kjem. På torsdag, etter at eg hadde vore på jobb, tok me oss ein tur ned til byen for å sjå Skyfall, den nye James Bond-filmen, på kino. Bra underhaldning med mykje spenning – alt i ekte Bond-stil! Har så klart fått dilla på den offisielle songen til filmen, nemleg "Skyfall" med Adele. Den er så typisk Bond, og de kan høyre den her. Helga har gått med til å spele spel, vaske litt klede (i maskinen altså), sjå ein episode av Heartbeat, rydde litt, handling i butikken, og i går kveld såg me den vakre filmen Så som i himmelen, med stearinlys på bordet. Eg hadde sett den ein gong før, men det var veldig lenge sidan. Den er så fin, så utruleg fin med vakker musikk, alvorlege, men viktige tema, og innimellom ein dose med lun humor. Filmen rører ved meg, og tårene mine berre rann og rann i går kveld. Så som i himmelen er ein film eg verkeleg tilrår, og om ikkje anna, sjå i alle fall dette klippet. Og heilt på tampen: gratulerer med farsdagen, pappa! Håpar du får ein kjempefin dag og at du nyt denne sundagen :)

9. nov. 2012

Inspirasjon

Sjølv om eg har Pinterest og finn masse inspirasjon i frå den sida, er det nokre gongar endå kjekkare å finne inspirasjon frå magasin, avis og reklame som kjem i posten. Sitte inne i stova mens det regner ute, klippe i magasina, lage fine kollasjar fylt med bilete av klede, smykke, sko, møblar, draumeheimen osv. No har eg kjøpt meg ei kladdebok og dekorert den, og i denne boka kjem eg til å samle på alle desse bileta, dei som gir meg inspirasjon og kreativitet. Dekorasjonen er kanskje litt jentete, men eg synest ikkje det gjer noko, eg. Dei fyrste sidene er fylt med bilete av klede og sko, men etter kvart kjem det nok nokre bilete av hus og heim også (har til og med fått med meg eit bilete i ekte Downton Abbey-stil...). Og så kjem eg sikkert til å lime inn kopiar som eg har liggande, kopiar med hekleoppskrifter, idéar til julegåver og liknande. Men det blir ikkje matoppskrifter å finne i denne boka, for det har eg denne boka til :) I helga håpar eg på å få lese noko pensum og elles gjere veldig lite. Skal jo til Stavanger ein tur neste helg, i tillegg til at det no byrjar å nærme seg eksamen, så eg får nytta sjansen til å kvile litt når eg faktisk kan.

7. nov. 2012

"I won't be happy with anyone else as long as you walk the earth"

Det er lite nytt å skrive om her frå Kr.sand; det går for det meste i skule og i korps. Derfor legg eg heller ut endå fleire bilete i frå favorittserien min. Fine bilete. I ein slik dramaserie som Downton Abbey er det naturleg å ha fleire parallelle historier sjølv om de aller fleste hovudpersonane kjenner til kvarandre. Det er historier om intrigene og maktfordelinga blant tenerskapet, det er historier som fortel om lagnader i samband med forliset av "Titanic" og fyrste verdskrig, det er historier om tap, og det er historier om kjærleik. Kjærleiken mellom lord og lady Grantham, lady Ediths evige jakt på ein ektemake, William sin kjærleik til kjøkkenjenta Daisy og varmen mellom herskapet og tenerskapet. Om ein ser bort frå det fine paret lady Sybil og Thomas Branson, har eg to klare favorittar når det gjeld desse kjærleikshistoriene og de kjem her: kjærleiken mellom Anna Smith og John Bates, og også den mellom lady Mary og Matthew Crawley. Begge desse para kjempa lenge for å få kvarandre. Etter mykje om og men, gifta Anna og John seg i siste episode av sesong to; lady Mary og Matthew gifta seg i fyrste episode av sesong tre. Og ja, eg er hekta!

6. nov. 2012

"It's doing nothing that's the enemy"

Hekta! Eg er rett og slett hekta på Downton Abbey. Serien er skapt av Julian Fellowes (og litt Gareth Neame) og blir i Storbritannia sendt på ITV. Her i Noreg er det NRK som sender den og me er godt i gong med tredje sesong; eg kan ikkje få nok. Eg har følgt med sidan fyrste sesong og har (utruleg nok) fått med meg alle episodane så langt. Og for de som kjenner meg godt, er det sikkert ikkje så vanskeleg å sjå for seg at eg lever meg inn og blir veldig engasjert. Eg tenkte eg skulle legge ut nokre bileteseriar i frå denne serien og eg startar med å vise fram den vakre lady Sybil som blir spelt av den engelske skodespelaren Jessica Brown Findlay. Tar også med nokre bilete av lady Sybil og Tom Branson, han som i løpet av serien blir hennar ektemake. Alle bileta er skjermdump frå diverse episodar, og om de vil høyre kjenningsmelodien frå serien, kan de trykke på den lille playknappen heilt nedst i innlegget (henta frå youtube.com). Er elles godt i gong med veka, men eg må seie at eg ser fram til å endeleg få ei heil helg der eg kan gjere akkurat det eg sjølv vil :)

4. nov. 2012

Kjekk helg med brassbandet

Årets Siddis brass er over, og eg skal vere ærleg og seie at det gjekk ikkje så veldig bra for oss denne gongen. Men, men. Eg har hatt ei kjempefin oppleving med korpset, og sidan det ikkje gjekk så bra i år, har me mykje å gå på til neste år :) Og så satsar me på at me gjer det litt betre i NM. Det blei ein lang, men kjekk dag i går med speling og mykje sosialt samvere. Eg kan ikkje legge skjul på at eg blei veldig stressa rett før me skulle på scenen då det viste seg at partituret og ess-tubastemmen låg att heime på Sola. I tillegg blei det mykje styr med ekstrautstyret me skulle ha med oss på scenen, og ikkje alle var like glade for det. Men alt ordna seg til slutt, og eg koste meg på scenen! Åt middag på restaurant saman med resten av korpset og hadde det gøy på fest med dei same folka :) I dag har me tatt det med ro, mamma og eg var ein tur innom mormor, og til slutt var det toget heim til Kr.sand. Har med andre ord hatt ei veldig fin helg, og så skal me, nok ein gong, ein tur til Sola om to veker :)

2. nov. 2012

Windows of the World

Heime ein tur. Heime på Sola. Ute regner det, nei, høljar det ned. Me vakna til sol og blå himmel, men det har snudd. Ja, ja. Det gjer jo eigentleg lite og ingenting. Me skal spele konkurranse i morgon, uansett om vêret er bra eller ikkje ;) Me tok toget seint i går og pga. diverse forseinkingar, var me ikkje på Sola før halv tolv. Men til trass for at det var seint, måtte me jo snakke litt med mamma og pappa før me la oss. Det er jo nokre månadar sidan sist me såg dei! Vel, me tok oss god tid i dag tidleg med god frukost, nykokt kaffe og dagens avis :) Var ein tur nede i Sola sentrum for å handle noko garn, og elles fekk eg både tid til å øve litt og få lese i Bjørnson (i boka Arne i frå 1859). Me hadde tacograteng til middag, og frå seks og til ca. elleve hadde me øving med brassbandet. Må seie at det var litt rufsete i starten, men det kom seg etter kvart. Så eg trur det kjem til å gå greitt i morgon. Om det er nokon i nærleiken som er interessert i å høyre oss, speler me i Zetlitz-salen i det nye konserthuset i Stavanger i morgon kl.1350 :) Og stykket me skal spele, heiter Windows of the World, eit stykke i seks satsar med variasjonar i både tempo og stil.

31. okt. 2012

Snart Stavanger og Siddis brass

Travle dagar. Det er jo ofte slik at når ein fyrst har mykje å gjere på ein front, til dømes skulen, skjer det også mykje på andre frontar. Men eg har valt det sjølv, og det er jo kjekt å ha noko å henge fingrane i :) På måndag hadde me vår siste øving med brassbandet her i Kr.sand før konkurransen. Då var me så heldige å få besøk av to journalistspirar frå Mediehøgskolen Gimlekollen. Dei ville lage ein liten reportasje om vår veg fram mot Siddis brass. Veldig kjekt med publisitet, men det er alltid rart å sjå seg sjølv på video. De kan sjå innslaget og reportasjen om de trykker her. I tillegg til at me begge to er engasjerte i brassbandet, jobbar me også i det eine skulekorpset saman, nemleg i Grim skulemusikkorps (eg jobbar jo også i Hånes & Tveit skulekorps). Dei hadde årsfest i går, og når ein gjer ein større innsats, anten som dirigent, instruktør eller forelder, er det jo vanleg å få ein liten oppmerksemd i form av ein blome eller noko anna. Derfor enda me opp med to slike som de ser på biletet. Luksus! I morgon tar me toget til Stavanger, heim til familien og, sjølvsagt til det viktigaste, Siddis brass. Eg gruar meg bittelitt, men aller mest gleder eg meg. Dette blir spennande!

30. okt. 2012

Ting som gjer hausten litt lysare

No som hausten verkeleg er her for fullt, og dagene blir mørkare, merkar eg at det blir tyngre å stå opp om morgonen, enkle gjeremål tar mykje lenger tid å fullføre enn det eg hadde planlagt. Eg likar å lage lister over ting eg skal gjere i løpet dagen, og eg likar å lage lister som fortel noko om saker og ting som får meg i betre humør, som gjer ein grå dag betre. Slike lister har eg publisert her før; de kan finne listene her, her og her. Men det er alltid noko nytt ein kan føye til på ei slik liste, og no som hausten er her, er det veldig greitt å kunne ha nokre ting å sjå fram til når dagane blir lysare, eller kjekke ting det går an å gjere om hausten sjølv om det er litt kaldt og grått ute:

ta på seg varme klede, gå ein tur ut og plukke fargerike blad – raude, gule, grøne

ein stor kopp med kakao eller te

få ei herleg melding frå han fine midt i ein keisam forelesningstime

gå på kino for å sjå den nye james bond-filmen

tusenfryd

ullpledd

høyrespelversjonen av tordivelen flyr i skumringen

ete ein god middag heime med stearinlys på bordet, saman med kjærasten

jentekveld med ein romantisk film og mykje snakk

få opp energinivået på øving med brassbandet

finne inspirasjon til draumehuset, dekorasjonar, oppskrifter og liknande på pinterest

28. okt. 2012

Vakre fargar

Sjå så vakre fargar hausten bring med seg! Desse fargane lyser opp ein grå og keisam dag, og med eitt blir dagen så mykje betre. Det same gjeld ein varm kopp med te eller kakao, ullteppe, stearinlys, eit lite glimt av sola, varme og fargerike klede, ein god film og kjærasten. Kanskje ikkje alt på ein gong, men som eg har sagt før er det slike ting som, i alle fall for min del, kan gjere hausten litt kjekkare og kvardagen litt lettare. Denne helga har gått så altfor fort, men sånn er det jo når ein har det kjekt. Seminar med den flotte gjengen i Agder brass er alltid like kjekt :) Så klart blir ein sliten og (kanskje) litt lei musikkstykket når ein øver på det same stykket ei heil helg. Men det gjer ikkje noko så lenge folka ein speler med er positivt innstilt og har ein god dose humor. På fredag bakte han fine og eg pestonsnurrar, så i tillegg til alle dei fine folka, hadde me med oss ein ordentleg god lunsj. I dag spelte me i nokre timar før me så hadde ei gjennomkøyring og også speleoppdrag i samanheng med fleirkulturell dag i Grimstad. Meir øving i morgon før konkurransen på laurdag.

26. okt. 2012

Sjølvportrett versjon 2

Då sluttar eg utfordringa der eg starta den, nemleg med eit sjølvportrett – av meg sjølv sjølvsagt. Ikkje noko særleg fiksfakseri med tanke på kreativitet eller fantasi, det er berre eit bilete som viser andletet mitt, akkurat slik eg ser ut her og no. Men det viser i alle fall den nye frisyren min veldig bra :) Har nettopp vore hos frisøren og eg må seie at eg blei veldig fornøgd. Herleg å bli kvitt ein del hår (for det byrja å bli altfor langt for min smak). Har elles gjort veldig lite i dag; me sov lenge, brukte lang tid på frukosten, og då den var ete opp, var eg innom frisøren. No nærmar det seg middag (vegetarlasagne) og etterpå blir det øving med Agder brass. Det blir det heile helga, for me skal ha seminar i høve korpskonkurransen Siddis brass som går føre seg i Stavanger neste helg. Eg er litt spent, men eg trur det blir kjekt og så er det alltid hyggeleg å sjå familien min igjen.

24. okt. 2012

Svart og kvitt

Trettidagarsutfordringa nærmar seg slutten, og etter dette innlegget har eg berre eit bilete igjen å legge ut. Det har vært utfordrande (det er jo trass alt ei utfordring), men det har vært utfordrande på ein bra måte. Eg har mått skru på kreativiteten og det er ikkje berre enkelt å skulle gjere det på kommando. Alle produkta, altså bileta, har heller ikkje blitt like bra som det eg hadde sett for meg i tankane mine, men øving gjer meister. Dagens bilete skal vise eit motiv med tittelen "black and white" eller "svart og kvitt" om ein skal seie det på norsk. Ein kan jo tolke det på mange moglege måtar, og det du ser på biletet er mi tolking. Du som les dette ville nok heilt sikkert ha brukt kreativiteten på ein annan måte og ha kome opp med eit heilt anna forslag. Men det er det som er det kjekke med slike utfordringar; det finst ikkje ein ordentleg fasit, ingen løysing er meir rett enn ei anna. Har vore på skulen i går og i dag, men i morgon er det ikkje undervisning, så då blir det nok heimekontor og pensumlesing akkurat som på måndag. Men eg har nok å gjere, så sjølv om eg ikkje skal på skulen, skal eg nok få gjort det eg har på tapetet. Og slik går dagane...

22. okt. 2012

"Ein fin liten blome..."













"Raindrops on roses and whiskers on kittens. Bright copper kettles and warm woolen mittens. Brown paper packages tied up with strings. These are a few of my favorite things...". Eg veit at ein på biletet ser ein stemorsblom og ikkje ein rose, men eg likar så godt teksten til denne songen (og songen er jo frå den fine musikalen Sound of Music, noko som berre gjer den endå finare). Er det noko eg saknar om hausten, så er det dagslyset som no om hausten forsvinn så altfor fort, og så er det blomane. Blomane i alle moglege fargar, blomane som duftar så godt, dei lysar opp ein grå kvardag. Men sjølv om det er haust, er det nokre blomar som nektar å visne, slik som stemorsblomen på biletet. Den gjer ein kald og mørk oktoberdag litt lysare og det er noko ein kan like. Forelesningen på skulen blei i dag avlyst på grunn av sjukdom, så planen i dag er å lese litt i pensumbøkene mine, kanskje øve litt og så blir det jo øving med Agder brass utpå kvelden. Så sjølv om måndag ikkje er min favorittdag i veka, trur eg dette kan bli ein fin dag :)

20. okt. 2012

På avstand

Dagens jobb, haustmarknaden sammen med Hånes & Tveit skulekorps, er unnagjort. Sjølv om ikkje alle musikantane var på plass i tide (!), fekk me øvd litt og sjølve konserten klokka ett gjekk veldig bra. Aspirantane hadde jo sin fyrste konsert og eg må seie at eg synest dei var flinke! Det blei også litt kaffe, kake og lodd, og for dei som var interesserte var det nok av lopper å ta av (sjølv så prøver eg å unngå loppemarknad i og med at leiligheita vår ikkje er av den største sorten, og også det faktum at me har det meste med treng). Vêret viser seg ikkje frå si beste side denne helga, så det blir nok ikkje noko særleg med uteaktivitetar. Det blir nok film, laurdagsmat og stearinlys i kveld. Og i morgon blir det (kanskje) ein del skulearbeid (les: lesing av skjønnlitterære bøker som står på pensumlista). Men det er kanskje like så greit at me har ei roleg helg, for tre av dei fire neste helgene er opptekne med korps, både på den eine og den andre fronten. Det blir både seminar og korpskonkurranse med Agder brass før det brakar laus saman med Grim skulemusikkorps på korpskonkurranse i Stavanger! På biletet: flugesoppen på avstand.

18. okt. 2012

Tett på

Fyrste styremøte med (det nye styret i) Agder brass er gjennomført og eg er fornøgd. Eg har med meg ein god gjeng i dei andre styremedlemmane, så sjølv om eg enno er spent og litt smånervøs, trur eg dette kjem til å gå bra, og at sesongen blir alle tiders! Det blir nok å henge fingrane i etter kvart, men det fyrste som skjer er Siddis Brass om to veker (ein korpskonkurranse), og der har det førre styret gjort mesteparten av det som trengst. Eg hiver meg på og tar utfordringane som dei kjem. Det er i alle fall den innstillinga eg har no, akkurat no, og som eg håpar eg klarar å halde på :) I dag har eg vore på skulen, eg har skrive litt oppgåva i NO-145 og eg har vore på jobb ute på Hånes. På laurdag skal me ha haustmarknad, og der skal aspirantane opptre for fyrste gong. Eg må seie at eg er litt spent, ja! Dagens emne er "close-up", eller "tett på" som eg har omsett det med. Tett på ein flugesopp.

16. okt. 2012

Something pink

For litt over ti år sidan, kom det ein song som blei ein hit både her i Noreg og i heimlandet Sverige, nemleg Rosa Helikopter. Det var ein song som verkeleg satte seg på hjernen, og på sommarkurs (NMF) året etterpå (eller var det året etter det...) spelte me den songen om morgonen for å vekkje folk. Eg kan også rosasongen: "Rosa, jeg liker bare ting hvis de er rosa". Men sjølv om eg kan, eller har høyrt, nokre songar om rosa objekt, kan eg ikkje seie at rosa er min favorittfarge. Det er veldig få gjenstandar her i stova som er rosa, og skal eg telje kor mange klede eg har som er rosa, kan eg telje dei på ei hand. Men dagens emne er, som tittelen på innlegget tilseier, noko rosa. Så sjølv om eg ikkje eig så mange rosa ting, har eg noko som eg synest det er verd å vise, nemleg den fine fleecegensaren som er designa av Kari Traa. Til trass for at den er rosa, er eg faktisk veldig glad i den (for dykk som likar designen; sjekk ut karitraa.com). Nok om rosa. Kjekt på korpsøving i går, og har nettopp vore på jobb. I morgon blir det lang skuledag; på kvelden styremøte med det nye styret i Agder brass :)

14. okt. 2012

Skulekorpsseminar

Helga har gått så altfor fort, slik den alltid gjer. No sit eg her og høyrer på vinden som blæs ute. Mannen i huset er på seminar i Laudal, sjølv så var eg der i går saman med resten av korpset (Grim skulemusikkorps) og dei andre instruktørane. Då alarmen ringde klokka halv åtte i går (om morgonen altså), var det så mørkt ute at eg ikkje skjønte at det faktisk var morgon! Eg likar ikkje at det blir så mørkt no om hausten! Då hjelper det litt å ha på fargesterke klede, tenne eit stearinlys eller rett og slett berre sitje inne, slik eg gjer no, og høyre på den ulande vinden ute. Var kjekt på seminaret i går med aspirantane, og dei var jaggu meg ivrige etter å lære notar og nye songar :) Kom seint heim i går, og det blei ein roleg kveld. Var nedom byen ein tur i dag for å sjå litt på ting og tang på ein vintagemarknad (nesten ein loppemarknad). Fann ein herleg boleroaktig jakke i ein knallgul farge (som eg ikkje ga så mykje for). Blir kjekt å kunne ta den i bruk når det nærmar seg vår, sølv om det er ei stund til. Legg ved eit bilete av nokre ender som me såg då me var på tur førre helg (emnet for biletet er "animal"). Og så kjem jo Downton Abbey på skjermen i kveld!

12. okt. 2012

Solskin og solstrålar

"You are my sunshine, my only sunshine. You make me happy when the skies are grey...". Akkurat slik hadde eg det førre sundag då me var ute på tur i Baneheia. Det var så fint vêr, sola den skein som aldri før og den gav oss lys og varme! Dei siste dagane har det også vore sol, men neste veke er det nok ein gong meldt regn og grått vêr. Men det er jo slik hausten ofte er. Ein får derfor nytta sjansen når den fyrst er her (godvêret altså). Oppgåva i NO-143 er levert, så får me sjå om eg får den godkjent. Men i og med at det i dag kom ei obligatorisk oppgåve i det andre emnet eg har dette semesteret, kan eg ikkje leggje inn årene :P Har sett på oppgåva og eg har allereie skrive ned nokre små stikkord. Som eg skreiv i førre innlegg er det seminar i morgon. Seminaret er med aspirantane i det eine skulekorpset, så då blir det nok ein del lek og moro i tillegg til speling. Dei resterande timane av denne veka kjem nok til å gå med til å lese pensum, rydde i heimen og slappe litt av før det atter ein gong er måndag og ny veke. Og kanskje burde eg øve på instrumentet; det er jo Siddis brass om ikkje lenge...

10. okt. 2012

Hand i hand

Hand i hand, du og eg, eg og du. Eg føler meg tryggare når eg er saman med deg, når du held handa mi og ser på meg dei fine augo dine. Eg er glad for at det er oss to, og om ikkje lenge har me vore i lag i heile fire år! Har sagt det mange gongar før, men tida går så altfor fort (og den ringen på fingeren som er med på bilete er ikkje ny om nokon skulle lure...). Vel, på berre to dagar har det skjedd ein del. Eller; det er vel eigentleg ei stor hending: på måndag var det årsmøte med brassbandet, og litt ut av det blå blei eg valt som styreformann i korpset! Eg føler meg ikkje heilt førebudd, men eg vel å ta det som ei utfordring, og så vil eg jo bli ei erfaring rikare :) Neste (og fyrste) styremøte blir allereie neste veke, så dette blir spennande! Og sånn elles er eg snart ferdig med oppgåva i NO-143, men om to dagar kjem det ei oppgåve i det andre emnet, og så blir det seminar på laurdag, så eg har nok å henge fingrane i. Men det er jo slike dagane ofte er... :)

8. okt. 2012

Hoppande glad

Dette er meg hoppande ute i hagen. Sjølvportrett utan andlet. Okei, om ein ser nøye etter, kan ein sjå litt av munnen min. Eg meiner likevel at dette er eit bra døme på nettopp sjølvportrett utan andlet. No skal eg innrømme at eg ikkje ofte er ute i hagen for å hoppe. Men i går var det herleg ute, skikkeleg fint haustvêr, ikkje det grå og regnfylte som me har hatt dei siste dagane. Me tok syklene bort til Baneheia, satte dei frå oss og tok beina fatt på ein oppkvikkande tur rundt om i løypene. Sola skein, blada på trea var både grøne, raude og gule, me såg både sopp og ender, og me hadde med oss god niste og kakao. Sundagstur med andre ord! Og då me kom heim, blei det litt hopping i hagen. Gjorde ikkje så altfor mykje resten av dagen, og høgdepunktet var definitivt andre episode av Downton Abbey. Eg veit ikkje kvifor eg er så glad i den serien, men ein ting kan eg seie: den er så utruleg gjennomført – på alle plan!

6. okt. 2012

Effektiv og fin laurdag

Nettopp kome heim frå skulen. Ja, me var på skulen i dag, på ein laurdag! Eg held jo på med den oppgåva, og eg veit at eg jobbar mykje betre på skulen. Kjærasten min har i tillegg åtgang til eit eige rom (for dei masterstudentane som studerer matematikkdidaktikk slik han gjer), så då er det ganske enkelt å finne seg ein ledig plass der det faktisk er stille. I alle fall i helga. Før me sykla til skulen, tok me oss god tid, åt ein god laurdagsfrukost og høyrde litt på radioen. Det er noko med helga som gjer morgonen så fin :) Eg fekk skrive ein god del på oppgåva før me pakka saman tinga våre og gjekk ut av skulebygningen. Då me skulle låse opp syklane våre, høyrde me ein person, ein Securitasvakt, som gjekk rundt og plystra for seg sjølv. Eg ropte til han: "Er det Kamilla og tyven du plystrar på?", han lo og eg fekk eit "ja" til svar. Artig! Kvelden i kveld blir nok roleg, men fin. Og sjå så fine fargar ein finn ute i naturen no - eg blir litt glad inni meg til trass for grått og kaldt vêr :)

4. okt. 2012

Something orange

Hausten er verkeleg her med mykje regn og grått vêr. Her har vêret skifta kraftig frå dag til dag, alt frå regn som berre dett ned og ikkje vil stoppe til sol og vindstille. Regnkledet har derfor blitt flittig brukt. Men eg skal ikkje klage; i og med at skulane rundt om i Kr.sand har haustferie, har me ikkje vore fysisk til stades på jobb og det har dermed ikkje blitt altfor mange eller lange turar ut i det ekle haustvêret. Og med eit slikt vêr og litt meir tid til overs enn vanleg, har me nytta sjansen til å sitje inne med ein film på skjermen, noko varmt i kruset og stearinlys på bordet. Og med eit teppe rundt så klart. I tillegg blir det jo så fine fargar ute på trea no om hausten. Har fått begynt på oppgåva som me fekk tildelt på tysdag. Foreløpig har eg ikkje skrive så altfor mykje, men eg er i gong og eg trur det kjem til å gå bra :) I samanheng med trettidagarsutfordringa, vil eg vise dykk denne boka med tanke på noko som er oransje. Den er berre genial og inneheld så utruleg mykje artig om ting som både er nyttig og unyttig :P Om de finn den på biblioteket ein dag - sjekk den ut!

2. okt. 2012

Mine nye sko

Sko er ikkje det eg interesserer meg mest for og det er dermed ikkje det eg eig mest av. Men no i haust måtte eg berre innsjå at eg trong nye sko- eller støvlettar. Dei eg kjøpte førre vinter, var eg eigentleg veldig fornøgde med, men plutseleg sprakk den eine skoen på tvers (sjølve yttersolen), og dermed var dei ikkje noko tess lenger. Prøvde å lime og fikse, men dengong ei. Så for eit par veker sidan var me begge to nede i byen og leita etter nye haust-/vintersko. Og me fann det me leita etter begge to :) På sundag var eg i ekstase, for då var det endeleg tid for sesongpremieren på Downton Abbey. Eg er storfan og då eg høyrde at dei (NRK) hadde framskunda premieren ein månad, var eg eit stort glis. Episoden innfridde så til dei gradar, med bryllaupet mellom Mary og Matthew som det største høgdepunktet. Kjolen var nydeleg, og eg gleder meg til vegen vidare!

30. sep. 2012

Sundag og fri

Sundagen er her. Me har fri. Kaffen er nykokt. Ute er det grått, men det gjer ingenting fordi det er sundag. Planen for dagen er å lese morgendagens pensum, kanskje få begynt på ei av de skjønnlitterære bøkene som også står på pensumlista, og elles har eg ingen andre konkrete planar enn å ta livet med ro og nyte stilla før eg tar fatt på ei ny veke i morgon. Her i Kr.sand er det haustferie no denne veka som kjem, så det blir ikkje noko jobb på meg. Men skulen tar ikkje fri, og på tysdag får me på nordisk utlevert ei oppgåve i NO-143 som me må få godkjent for å kunne ta eksamen når desember nærmar seg. Eg er litt usikker på korleis oppgåveteksten kjem til å sjå ut, men eg er ved godt mot og trur det kjem til å gå bra :) Hadde det forresten kjempekjekt og veldig koseleg på fredag saman med dei to veninnene mine! Eg håpar det ikkje blir så altfor lenge til neste gong me har jentekveld saman :)

28. sep. 2012

Jentekveld

Gleder meg til seinare i kveld. Då skal eg nemleg bort til ei av veninnene mine frå kommunikasjonsklassen og saman med ho og ei til skal me ha jentekveld. Ein treng det innimellom og no er det ei stund sidan sist. Me jentene går alle i forskjellige klassar dette siste året (i bachelorgraden vår) og når me i tillegg bur litt rundt omkring (Lund, Arendal, Søm), er det ikkje så altfor ofte at me ser kvarandre. Derfor gleder eg me litt ekstra til i kveld :) Denne veka har vore som ei helt vanleg veke med skule, korpsøving og jobb. Då eg kom heim frå skulen i går, var heile leilegheita støvsoge, det sto raude roser på bordet og kaffen var nykokt. For ein flott fyr eg har! Og så vil eg berre seie at eg hadde det veldig kjekt på jobb i går saman med aspirantane "mine". Biletet som eg legg ved, er eit forsøk på å vise lang lukkartid, men eg har ikkje det aller beste kameraet, så biletet blei så som så...

26. sep. 2012

Silhuett

Eg veit at eg lova dykk nye og ferske bilete i samanheng med trettidagarsutfordringa som eg held på med. Men når dagens motiv er "silhuett", berre må eg vise dykk eit bilete som eg synest viser motivet, altså silhuetten, ganske bra. Biletet (som de altså ser ovanfor teksten) er tatt i ein minibuss på ein skranglete veg i Kenya. Det blei tatt for nærare tre år sidan då eg var i aust-Afrika saman med klassen min frå folkehøgskulen. Eg har så mange minne frå den turen, og kvelden då dette biletet blei tatt, er ein av desse. Me var på veg til Kisumu, ein havneby rett ved Victoriasjøen, og på vegen til hotellet blei me møtt av eit ordentleg uvêr og eg måtte fram med kameraet for å ta bilete av dette uvêret. Ikkje like lett å ta bilete i fart og spesielt ikkje når vegane ikkje er av norsk standard. Men eg var heldig og fekk eit ordentleg blinkskot. Og så må eg berre fortelje at då me kom til hotellet og hadde fått tildelt rom, sto me ute på balkongen og såg på uvêret. Lyset frå lynet var så sterkt og det same var lyden frå tordenet. Alt dette opplevde me med utsikt over Victoriasjøen. Det, både uvêret og heile turen, er ei oppleving eg aldri ville vore forutan!

24. sep. 2012

Kjekt speleoppdrag

Har hatt ei fin helg, i dag er det måndag og ei ny veke er i gong. På laurdag var me jo i sentrum og spelte med brassbandet på "bilfri dag". Det såg mørkt ut ei stund i og med at det på yr.no var meldt mykje regn som skulle falle ned frå himmelen. Men då me vakna om morgonen på laurdag, skein sola og det blei ein kjempefin dag. Me hadde ein kort og effektiv øving før me kom oss til byen. Mykje liv og røre, og mange som stoppa opp for å sjå og høyre på oss, så det var eit kjekt speleoppdrag. Nokon av oss i korpset dro på Peppes pizza etterpå for å spise lunsj saman, ha det litt sosialt. Kjekt! Elles hadde me ein rolig kveld her heime med god mat og avslapping i sofaen. I går vakna eg og kjente at eg ikkje var heilt i form, litt småforkjøla. Dermed blei det ikkje gjort så altfor mykje fornuftig, men eg fekk i alle fall lese ut Ibsens En folkefiende, for den er pensum til i morgon. Eg er heldigvis betre i dag, og så gleder eg meg (som vanleg) til øvinga i kveld. Forresten: "to øyne ser bedre enn ett".

22. sep. 2012

Tretten ting

No er det sikkert fleire av dykk som lurar på kva i alle dagar det er eg har tatt bilete av. Sit eg slik til vanleg, nede på golvet, med ting og tang rundt meg?! Nei, eg gjer jo ikkje det, men dagens motiv er nemleg, direkte omsett, meg sjølv og tretten ting. Måtte jo prøve å finne ting som seier noko om kven eg er og kva eg likar å holde på med. Og så nummererte eg tinga. Om de synest at biletet blir litt lite, går det an å trykke på det for å få det større :) Gjenstand nr.1 er min kjære Dumbo // 2 er måleriet av min fine og meg som eg måla på folkehøgskulen for drøyt to år sidan // 3 er den same flaska som eg la ut for nokre dagar sidan (eg er jo så glad i blått) // 4 er prikkekjolen min, har for tida dilla på prikkar // 5 rockeringen min // 6 den beste filmen, nemleg Forrest Gump med Tom Hanks i spissen // 7 Hercule Poirot (både som bok og som TV-serie) // 8 kattar // 9 er musikalar, her representert ved noteboka mi frå musikalen RENT // 10 krimbøker // 11 TV-serien Heartbeat // 12 er Macen min som eg er så glad i // 13 og sist, men ikkje minst, trombonen min. Eg kunne fint ha hatt med endå fleire ting, men eg skulle berre ha med tretten ting, så det får holde for denne gong.