23. jul. 2017

Sommar i Stavanger

Trur ikkje eg skal klage på vêret her i byen denne veka. Joda, me har hatt eit par regnvêrsdagar, men dei fleste dagane har vore heilt topp med sol og knallblå himmel. Så godt å endeleg få kjenne sommartemperatur og verkeleg nyte årstida. Gladmatfestivalen, herlege turar og mykje lesing har stått på programmet, heilt greitt med andre ord ;) Har jo også jobba ein god del, og sjølv om eg stortrivst blant alle bøkene og fine folk, må eg seie at når sola står høgt på himmelen, vil eg jo heller ut enn å sitje inne ved ein skjerm. Men sånn er det berre, synest jo likevel at eg har fått kjenne sola og vore ute i godvêret. Elles er det lite nytt, men eg har no i alle fall mykje fint på sundagslista:

✦ det fantastiske vêret me har hatt nokre av dagane, berre sjekk ut Vågen i Stavanger sentrum
✦ er alltid interessant og fint å lese boktankane til Ida
✦ lese ut den rare, såre og fine boka Vokteren av tapte ting
✦ "The End of an Era" – tenk at det allereie er ti år sidan den siste Harry Potter-boka blei utgjeven
✦ sykle til jobb i kjole og bare leggar
✦ ein bit god sjokolade i helga, og eg diggar jo den vakre innpakninga
✦ gode tips til korleis ein rimelegare kan oppgradere eit bad
✦ me var ein tur på Gladmatfestivalen, og med steikande sol, var knallgod is det store høgdepunktet
✦ sjå filmen Wonder Man med Danny Kaye (og skrattle av denne scenen)
✦ tur til IKEA der me fann akkurat det me skulle ha
✦ den nyaste boka til Camilla Läckberg var superspennande
✦ superkul idé til ein heimelaga knagg
✦ sommarfugl på tur rundt vakre Stokkavatnet i dag
✦ kanskje litt meir fargar, men liker stilen på desse romma
✦ lese ute på balkongen i shorts og T-skjorte
✦ å sjå at Byttebuå hadde sette fram flotte bøker på Gladmaten som ein kunne ta med heim

21. jul. 2017

Ut på tur i ulendt terreng

Landskapet ved hytta er nokså ulendt for å seie det mildt. Og då me bestemte oss for å gå ein tur til eit vatn førre laurdag, eit vatn det ikkje er oppgitt ein sti til på kartet, var me ikkje heilt sikre på å nå fram. Men ut på tur skulle me likevel, og med kart, vatn og litt kjeks i sekken var me klare. Over kampesteinar, ned ein sti, innom ein myr, opp ein bakke og ned igjen fordi det plutseleg var ein fjellvegg i vegen. Puh, me fann ikkje fram til vatnet denne gongen, men ein liten pause (som gjorde veldig godt) ved speidarhytta blei det i alle fall. Ein bra tur i eit endå betre selskap var det uansett.


På veg tilbake til hytta kom me oss på ein av toppane opp slik at me fekk utsikt.  Ikkje over vatnet der hytta ligg, men eit som ligg rett ved. Så flott, berre sjå utover, kjenne den friske fjellufta, oppdage små regndropar som ser ut som perler. Ein tur på fjellet er alltid ei lita glede.

20. jul. 2017

Bokryggpoesi 📚



Lenge har eg gått rundt med tanken om å lage det ein kallar bokryggpoesi. Om ein lurer på kva det er, så er bokryggpoesi det å finne bøker med titlar som ein tenkjer kan passe saman som eit lite dikt. Denne månadens tema i skaparutfordringa Monthly Makers har vore "noko du ikkje har prøvd før". Og vel, poesi er ikkje noko eg har for vane å skrive ned eller lage, så eg fann ut at no var det på tide. Når ein jobbar på eit bibliotek, har ein jo nok av bøker å velje mellom. Men eg ville at det skulle vere meir utfordrande enn å berre plukke bøker og setje dei saman utan å ha noko forhold til dei utvalde bøkene. Difor bestemte eg at minst halvparten av bøkene som eg ville bruke skulle vere bøker eg tidlegare har lese. Til saman blei det ni små bokryggdikt, og sidan det også er ganske sjeldan at eg lager video, sette eg saman alle bileta til ein liten videosnutt med bokryggpoesi. Songen er henta frå Purple Music Planet og heiter "Shadowlands". Med andre ord: dette er mitt bidrag i Monthly Makers denne månaden, og det blir spennande å sjå kva andre har komme på :)

19. jul. 2017

Høge fjell, blikkstille vatn og ein vakker solnedgang

Lite som slår fjellroa. Berre stå ute på terrassen, titte utover vatnet som er heilt blikkstille om ein ser bort frå nokre som ror. Lufta der oppe er så rein, og det er godt å sleppe bylydane for nokre dagar. I tillegg blei dei høge fjella farga raudgylne fredagskveld, og det var ordentleg sommaridyll.

18. jul. 2017

Avslappa hyttehelg

UNO og quiz er alltid klassikarar på hyttetur. Noko godt attåt sidan det var helg. I tillegg til familien, var også Zalo med opp til hytta, og han kvitra og var heilt med når radioen stod på eller når me prata. Om kvelden tente me stearinlys og parafinlampa og det blei eit par rundar med "Bezzerwizzer". Me las mykje, slappa av og senka skuldrene. Eit lita, men veldig bra helg på hytta.

17. jul. 2017

Vålandsparken v7

Okei, eg veit det no: det er ikkje dei største forandringane i Vålandsparken no i sommarmånadene. Så om eg skal gjere eit liknande fotoprosjekt neste år, ønskjer eg å finne ein stad der ein tydelegare ser forandringar frå månad til månad. Men parken og skogen er no fin uansett, berre sånn at det er sagt ;) Tok ein tur bort i dag, og innimellom titta sola fram blant dei små blada. Bra start på veka!

16. jul. 2017

Full jobbveke og ei helg på hytta

No i helga var me ein tur oppe på hytta, og det gjorde godt etter ei veke med mykje jobbing. Eg må få seie at dagane og veka berre har foke av garde, og plutseleg er me halvvegs i juli. Allereie. Puh, kjenner at denne sommaren kjem til å vere over fortare enn svint, og det utan at det er noko særskilt sol og sommartemperatur ute. Men så lenge det er kjekt på jobb og eg får tid til å lese, gå nokre turar og drikke kaffi skal eg vere nøgd ;)  Som vanleg har eg litt å dele på tampen av veka:

✦ gå ein tur (om enn i ulendt terreng) ikkje så langt unna hytta
✦ eit lite esel som elskar å få klem
✦ hente ein favorittkjole på posten
✦ ei helg oppe på hytta med bøker, quiz og fine folk
✦ hekle vidare dei sekskanta lappade
✦ at det var ein som sa "god morgon" til meg på veg til jobb, ein super start på dagen
✦ ha, ha, eg kjenner meg igjen i denne Harry Potter-greia her
✦ lese ut den underfundige og fine boka Den lille kjærligheten
✦ sjå nye filmar, den eine betre enn den andre
✦ høge fjell og blikkstille vatn
✦ kult å sjå ei blokkleilegheit bli forvandla til noko heilt eige
✦ kanin og ekorn oppe ved Ullandhaugtårnet
✦ vise fra dei to små Krtek-figurane me fann i Praha (Den lille muldvarpen på norsk)
✦ spele UNO om kvelden oppe på hytta
✦ setje av tid til å lese og drikke ein kopp eller to med kaffi, litt kvar dag

14. jul. 2017

Fantastisk symfoniorkesterkonsert og endå ein dag i Berlin 🎻

Aller fyrst vil eg berre få seie "riktig god helg". Mykje jobb og mykje lesing denne veka, noko som eigentleg passar meg veldig bra :) Men no, la oss ta ein titt på nokre fleire bilete frå Berlin. Eit av dei store høgdepunkta på heile Interrail-turen var konserten med Berliner Philharmoniker. For eit flott bygg, både utvending og inne (og for dei som lurer: Herbert von Karajan er ein kjent østerriksk dirigent). Den kvelden me var der spelte dei musikk komponert av Ravel, Berlioz og Stravinsky, og eg sat med tårer i auga då dei spelte siste tonen. For ein konsert med dyktige musikarar!


Dagen etterpå hadde me ikkje lagt nokre store planar. Me drog til Unter den Linden, ei brei gate med parkområde, store tre og flotte bygningar. Humboldt-universitetet og domkyrkja står der, store og ragande. Etter kvart kom me oss vidare til Alexanderplatz der me slappa av på ein benk nær Marienkirche. Eigentleg godt å berre sitje der, sjå på bylivet og nyte det å ha ferie.


I løpet av dei to vekene me var på tur, hadde me (eller les: eg) eit lite prosjekt på gong, og det var å besøke eit bibliotek i kvar by. I Berlin blei det to, Berliner Stadtbibliothek og Staatsbibliothek zu Berlin. Tok ikkje veldig mange bilete frå desse biblioteka i og med at det for meste var faktabøker i heilt vanlege hyller og enkle lesesalar, nesten som universitetsbiblioteka her i landet som eg har besøkt. Men døra inn til Berliner Stadtbibliothek var ganske kul, og sjekk ut vindeltrappa inne i staatsbibliotheket. Ved sistnemnde måtte me ha eit gjestekort for å komme inn. Stas å sjå korleis bibliotek kan vere svært forskjellige samstundes som dei har ein ting til felles, nemleg bøker :)

13. jul. 2017

Fine dagar med gode bøker

Er så gøy når lesegleda verkeleg er på plass. Å kunne dykke ned i eit eige univers gong på gong. Bli kjent med nye karakterar, gråte, le, smile eller bli irritert fordi hovudpersonen gjer noko dumt. Og med ein kopp kaffi ved sidan kan det ikkje bli betre. Er ikkje så mykje som skal til. Kvardagsglede.

12. jul. 2017

Rosendals Trädgård

Før me går vidare med bilete frå Interrail-turen, har eg ein siste stad frå Stockholm som eg ønskjer å vise dykk. Etter å ha ete lunsj hos Rosendals Wärdshus, traska me vidare til Rosendals Trädgård ikkje så langt unna. Også her kan ein ete lunsj blant nydelege omgjevnadar, ein kan kjøpe planter og blomar og ein kan gå innom butikken der dei har alt frå syltetøy til kokebøker, kaffi og sjokolade i fargerik innpakning. Altså, så mykje Willy Wonka-vibbar av sjokoladepapiret på bileta over ;)


Vêret var jo som nemnt heilt fantastisk, og det var mange som hadde tatt turen for å ete lunsj eller slappe av med ein kopp kaffi. Me kjøpte kvar vår lille is, ein med vanilje og ein med kokos, og fann plass på ein benk. Godt med ein is i sola, og Djurgården på ein slik dag vil eg gjerne oppleve igjen.

10. jul. 2017

Tjensvollturen

Sjølv om det ikkje var strålande sol eller sommartemperatur på laurdag, fann me ut at me ville gå ein litt lengre tur, for no hadde me tid. Skyene var mørke og lyse om kvarandre, men me slapp unna regnet. Me valde oss ut ein av dei femtito kvardagsturane som ligg ute på kommunen si nettside, og denne gongen blei det Tjensvollturen. Det som er så gøy med desse turane er at dei tar oss med til kjente område, men på nye stiar, frå hus tett i tett til jernaldergarden med sauer som eter gras og folk som balanserer på steingard. Mykje grønt ute no, akkurat slik det skal vere om sommaren. Fargerike revebjeller, ein fin sitjeplass og ein smal, smal sti. Ein akkurat passe laurdagstur.