17. jan. 2022

Litt mjukare start




Kjenner eg treng ein mjuk start på veka, og det kan denne fine pusen gi. Av og til når eg syklar forbi fylkeskommunebygget til eller frå jobb, ser eg denne mjuke pelsdotten av ein sjarmør. Sjølv om han (eller ho) ikkje alltid er like interessert i å helse på meg, er den eit kjærkome syn. Ein gong sat den på vakt oppå eit gjerde, ein annan gong kom den bort til meg for å få kos og no nyleg oppdaga den eit eller anna i buskane – eg lurer på kva. Måndagen har gått med til å lese og sjå nokre episodar av Agatha Raisin. Snartur innom butikken, meir lesing og kanskje eg skal strikke litt. Eller fortsetje å plukke ut bilete til fotoboka frå fjorårets biltur. I alle fall noko som ikkje krev så mykje energi.

16. jan. 2022

Dagar som har vore lange og litt tunge




Kan eg få seie at dette har vore ei lang veke?! Fem tidlege morgonar, to av dei så tidleg som halv fem. Energien har vore lik null, motivasjonen likeins. Å valse rundt i ein svømmehall utan å ha badegjestar der veke etter veke, det er ikkje slik det skal vere. Generelt har eg kjent meg litt utanfor. No opnar hallen litt igjen, så eg satsar på at kveldsvakta neste veke blir hakket betre. Gåturar heim frå jobb, strikking, sollys, kjekke TV-seriar og lesing har fått meg til å smile. Eg har foreløpig avbrote ei bok i år, men dei andre har eg kost meg med. Eit av lesemåla er å lese meir av asiatiske, latin-amerikanske og afrikanske forfattarar, ei slik bok i månaden, og eg har lese ut januarvalet. Meir om bøkene eg las i fjor og om lesemål for dette året kjem i eit eiga innlegg, no er det ei sundagsliste:

✦ fascinerande å lese brevvekslinga mellom Sara og Astrid over fleire år, dette er ei unik bok
✦ tur opp til Vålandstårnet, alt det brune lauvet i Vålandsparken og til slutt Mosvatnet
✦ Synne si årsoppsummering, ho set verkeleg ord på kjensler eg sjølv har hatt i 2021
✦ sollyset på Våland då eg traska heim frå jobb tysdagsettermiddag
✦ nydeleg blåfarge på ein vindaugskarm eg såg langs jobbvegen min
✦ kulaste fuglen Tico som syng med på "Hotel California"
✦ tenne lys i den fine lyshaldaren som heng i stovevindauget
✦ konsert med Stavanger symfoniorkester på NRK Nett-TV
✦ to blogginnlegg inne hos Niina, her og her, og eg berre nyt dei stemningsfulle bileta
✦ laurdagspizza og filmen animasjonsfilmen Whisper of the Heart
✦ byrje å sjå sesong to av Lykkeland
✦ sjekk ut denne kanonfine kjolen som Maria nyleg har sydd
✦ Agatha Raisin er ein herleg karakter i komikrim-serien med same namn
✦ Aune Design har så mykje fint og stilig tilbehør til strikking
✦ spele spel som "Exploding Kittens" i lag med broremann og mannen min
✦ mannen min som er ved mi side kvar dag, så takksam for at du er her ♥︎
✦ "Godt nytt år fra mørket" – kjenner meg igjen i det Ida skriv om å måtte kvile i starten av 2022
✦ har fint kaffiservise allereie, men likte blomemønsteret på dette serviset eg såg i ein bruktbutikk
✦ kjekt å sjå at mottakaren (les: mannen min) er nøgd med sin Vinterseilergenser
✦ to elefantfamiliar som blir kjente med kvarandre, elefantar er nokre fantastiske dyr!
✦ sundag med strikketøy, varmt pledd, kaffi og bok etter ein gåtur – treng slike dagar
✦ lese ut Usynlighetens historie som januarvalet i mitt lesemål

14. jan. 2022

Mjughaugturen


Ut mot havet ein laurdag i januar. Som nemnt i sundagslista, gjekk me den såkalla Mjughaugturen laurdag som var. Noko av det fyrste me såg, var ein klatreplass i stein. Eller ein leikeplass eller kanskje kunst. Eg er noko usikker, men eit stilig blikkfang var det. Turen går eit godt stykke ute langs havet i Kvernevik bydel. Blå himmel, nydelege fargar på svaberga og sola laga lange skuggar.

 







Hafrsfjordbrua i motlys, sola bak dei kvite skyene mot ein lyseblå himmel og brua frå eit anna perspektiv. Etter kvart bevegde me oss inn meir inn i bustadsområde og denne gongen fann eg ikkje så mykje særskilt å sjå på eller ta bilete av. Men ein svipptur innom Hålandsvatnet blei det, og der såg me både kanadagjess og kvitkinngås. Nesten litt majestetiske med den lange halsen deira. Eit smilefjes på ein stubbe inne på ein liten skogssti fekk meg til å smile. Og med tanke på denne tunge og mørke starten på året, tar eg i mot med åpne armar alt som får meg til å smile og le.

12. jan. 2022

Vinterseilergenser




Å, eg har heilt gløymt å vise korleis resultatet blei av genseren eg strikka til mannen min. Blei ferdig seinhausten i fjor, og me var nyleg ute og tok bilete. Tihi, han er nok ein som liker best å vere bak kameraet og ikkje foran. Oppskrifta er Vinterseilergenser frå Pickles. Garnet er Tweedy frå same produsent, det same garnet som på min Twiggygenser – eg berre diggar det garnet. Hovudfargen heiter rødbet medan stripane er strikka i fargen natur. Halsen blei litt vid, men elles er den akkurat passe lang og herleg kosete. Mottakaren blei i alle fall veldig nøgd, og det er det aller viktigaste ;)

10. jan. 2022

Luftetur med solstrålar overalt






Traska heim frå jobb i dag. Herleg å ta beina fatt, men noko surt var det. Surt var det ikkje då eg måtte ut på ein luftetur på torsdag. Kaldt, men ingen vind. Rimet låg på strå og greiner, på Mosvatnet låg det eit tynt lag med is der måkene stod støtt medan endene låg på graset og sola seg. Det skjønner eg godt. Sjølv fekk eg solstrålar i håret og var ganske blid. Er framleis veldig nøgd med Twiggy-genseren eg strikka ferdig i fjor, så varm og god, i ein nydeleg farge og unikt garn. 

9. jan. 2022

Den fyrste heile veka i 2022



Snart er det grytidleg opp i motsetnad til heile juleferien og denne veka. Eg har hatt treige morgonar med bok og stearinlys, ein kaffikopp eller to. Motivasjonen er ikkje heilt til stades no når det er publikumsstengt på snart fjerde veka. Særskilt når ingen av oss veit kor lenge me må halde stengt. Men det har no stort sett vore bra vêr, eg har kost meg med bøkene (for ja, eg les som regel meir enn ei bok om gongen), ein kort og ein lengre tur og litt anna smått som lyser opp litt mørke januar:

✦ morgonstund med lesing og stearinlys
✦ endeleg nye episodar av All Creatures Great and Small på NRK Nett-TV :)
✦ mannen min som kom med middag til meg då eg var aleine på jobb måndagskveld
✦ ååå, denne minipusen som har fått ein heim er superduper søt!
✦ sollyset mellom trea då eg sykla heim frå enda kveldsvakt onsdag
✦ no er all julepynten nede, men eg lot den fine glaspynten i kjøkkenvindauget hengje litt ekstra 
✦ spele litt "Takenoko" 
✦ kose meg med å sjå Notting Hill for ørtande gong
✦ møte ein nysgjerrig pus – lurer på kva pusen såg inne i buskane
✦ debutromanen til Rijneveld vann Bookerprisen i 2020, og det er ingen tvil om at den er rå
✦ har lyst til å besøke Blaafarveværket i løpet av året 
✦ gå Mjughaugturen i lag med broremann og mannen min, kjekt å starte ute ved kysten
✦ stikke innom Sunde gårdsutsalg etter å ha gått Mjughaugturen
✦ laurdagstaco og kjekk film
✦ fordi me treng noko å le av: her er ti herlege augneblink frå fantastiske Whose Line is it Anyway?
✦ ut for å kjenne sola varme håret og andletet då eg hadde fri torsdag
✦ og i same slengen gå dei få minutta bort til Mosvatnet og fuglelivet der
✦ eit glimt av jula i Mummidalen, Alicias miniatyrar frå Mummiverda er ordentleg stilige
✦ skulle ønskje det var fleire episodar av Endeavour, men det var no ein bra sesongfinale
✦ og apropos finale: The Good Place-finalen synest eg var veldig bra
✦ strikke vidare på kjoletunikaen 
✦ lese den herlege What If It's Us? (og snart kjem oppfølgjaren Here's To Us)

7. jan. 2022

Vinterleg song

 

Du veit når du høyrer ein song som snakkar direkte til hjartet, ein song du får ro i sjela av? "Winter Song" med Adam Douglas er ein slik låt for meg. Stemma hans høyrde eg fyrste gong for nærmare ti år sidan i ein Beat for beat-episode, og sidan har han jo vunne Stjernekamp, vore på juleturnéar, innom Eides språksjov og gitt ut fleire album. For mange er "Winter Song" ein julesong, og sjølv har eg den i julespelelista mi, men den passar vel så bra no i januar. Originalt er det Ingrid Michaelson og Sara Bareilles som syng den, ein kjempefin duett. Trykk på play og få ei roleg start på helga.

5. jan. 2022

2021 i tolv bilete


Korleis oppsummere eit år som 2020, skreiv i fjorårets versjon av året i tolv bilete. Og vel, så sit eg her eit år etterpå og må nesten skrive det same om 2021. Det har vore ei berg-og-dal-bane, som året før. Tre gongar har me måtte stenge hallen for publikumsbading, og me startar dette året likt. Lite sosiale kveldar og orkesterspeling, eit ordentleg hjartesukk. Men i denne årsoppsummeringa vil eg fokusere på det kjekke, for eg har lese ein haug med gode bøker, hatt spelekveldar og gått turar med kohorten, fått oppleve ei ekte hyttepåske, strikka som aldri før, knallbra bilferie i Noreg i sommar, ein konfirmasjon og to musikalturar – 2021 har innimellom vist seg frå ei god side. Januar og det nye året starta med å strikke vidare på den tjukke Twiggy-genseren, middag på Sola der Zalo var heilt med (akkurat som i år), Kristianlystturen i nydeleg vintervêr, sjå Good Omens for tredje gong(!), kose oss med å sjå den gamle Narnia-serien, meir strikking, rim på bakken og mange frostmorgonar, kakao toppa med krem og "Ticket to Ride", bli hekta på Great Canal Journeys, lese Trollvinter av Tove Jansson, liten tur opp til Ullandhaug der me sa "hei" til ein sauetrio, gå heim frå jobb og kjenne sola varme og videoquiz med verdas beste jenter.



Februar: snødekt landskap som fekk meg til å tenkje på slutten av Tre nøtter til Askepott, lese høgt lappane frå minneglaste og ete lussekattar, morgonstund med kaffi og puslespel, gå Byhaugturen og Storhaugturen (hugsar det var ti minusgradar og kjempeklart vêr då me gjekk Byhaugturen), spele "Kortskalle", lage fastelavnsbollar, møte ein finfin katt på vår sundagstur, kjekt å ha publikum i hallen igjen etter nedtstenging, lese ei av årets beste bøker, videosamtale med ei veninne, streamingkonsert med SSO, byrje å sjå Mord i paradis (elskar den britiske humoren), sundagskaffi og "Decrypto" heime på Sola og eit lite kaffiebesøk av eit venepar me ikkje hadde sett på ei stund. 



Mars: lese ut den siste boka i Emily-serien av L.M.Montgomery (å, som eg saknar Prince Edward Island), snøklokker og helleristningar ute på Austre Åmøy der me gjekk ein god sundagstur, sola i andletet på veg til jobb, koseleg kaffidate med ei veninne, ein laurdag med taco, Kompani Lauritzen og to fine veninner, tur i Melsheia (lenge sidan sist), skrive og sende av garde såkalla klemmekort, endå fleire snøklokker, strikke ferdig Twiggy-genseren, lese påskekrim og få oppleve ei superfin hyttepåske med "Påskelabyrinten", ordentleg fjellro, påskeegg, lese ute på terrassen og foran peisen, gode bøker, quiz og diverse brettspel.



April: bursdagskake og mange fine bursdagsmeldingar, gartneritur i lag med fine folk, fargerike fredagsmakronar, lese den fyrste boka i The Paper & Hearts Society, magisk å lese ute på balkongen fleire av aprildagane, blomar på trea, sjå meir av Michael Palins mimreprogram, Ann Cleeves sine krimbøker, endå meir av kulaste Kompani Lauritzen, rosa himmel over naboblokka, heimelaga latte og "koseleg-mord-boka" Torsdagsmordklubben (heilt herlege karakterar), mykje bra eigentrening i bassenget, Stokkaturen i herleg solskin og nytt strikkeprosjekt.



Maispele "Boule" (eller "Boccia") i lag med broren min og han der fine, artig med krimserie frå New Zealand (Mysteria i Brokenwood), byrje å lese Narnia-bøkene. kunne ha publikumsbading i svømmehallen igjen, Grannesturen og ein liten tur i den botaniske hagen, knallgod mat på Spiseriet i lag med fine folk og etterpå ein kjempebra konsert med Kjell Inge Torgersen og SSO, roleg feiring av nasjonaldagen med "sop-i-hop-pavlova" som blei veldig god, trøytte og søte lam oppe på Jernaldergården, kirsebærtre i full blom og seinare alle blomeblada på bakken, sundagstur rundt Hålandsvatnet, og me såg søte sauar overalt, balkonglesing og feire seks år som mann og kone.



Junilese volum to og tre i Heartstopper-serien, å kunne kose meg med kvar einaste episode av Great Canal Journeys, to halvstore, men likevel så søte, kalvar i nærområdet vårt, finaste svanefamilien, ein bitteliten lesepause i sola på veg til jobb, restaurant, prat og kino (In the Heights) med ei veninne, ete lokal is frå Delizia på bursdagen til mannen min, å teste ut REKO-ringen Stavanger/Sandnes, gå ein liten tur ved Hafrsfjord med broren min, den flotte og fargerike buketten eg fekk frå jobb etter å ha vunne den der namnekonkurransen og vere med å strikke Collett Tee gjennom juni månad. 



Juli: gå heile tre kvardagsturar (Eikebergturen, Sundeturen og Skeieturen – håper verkeleg på fleire slike turar i år), balkonglesing både før og etter jobb, kule dyr ved Gausel fritisdgård, syngje på songane frå In the Heights, fin grøftekantsbukett, kaffi og ei Christie-bok, laurdagspizza og latterkrampe av "Ryktet går" i lag med eit venepar, le høgt av Huskestue og Taskmaster, spele litt "Dominion", kjekke filmar, tinge overnattingar til ferien, ete sundagsmiddag på Kronen Gaard i lag med familien, ei lita veke til på jobb, fyrste vaksinedose og sidan bilferie med historiske overnattingar, bading, besøke ein isbre, stikke innom bokbyen i Fjærland, gå turar i vår flotte natur, overnatte i ei hobbithytte og besøke svigers på Sunnmøre.



August: slutten av bilferien vår med Røros, Sjusjøen, Hadeland Glassverk, Kistefos, Langhus og Suleskarvegen, komme heim og sove i eiga seng, ha ei ferieveke heime der eg og ei veninne drog til Bømlo og Moster Amfi for å sjå musikalen Kristina frå Duvemåla, kjekt å overnatte på hotell, dra på gulljakt og stikke innom ein kjempebra bruktbutikk, koseleg med dagstur opp til hytta, biblioteksbesøk og restaurant med mannen min, meir strikking og krimserie på skjermen, gå Buøyturen og feire bursdagen til ei veninne, laurdagskaffi på Heddas, roser frå mannen min som ønska å gjere dagen min mjukare og lesestund om kvelden ute på balkongen med boka i fanget og stearinlys i lanterna.



September: morgonlyset over Breiavatnet, togtur til Oslo og Langhus for å vere med i konfirmasjonen til niesa vår, veldig stas å ha på bunaden, helse på finaste katten Bambus då me budde hos onkelen min i Oslo, ta andre vaksinedose, kunde som over telefonen takka og bukka for god hjelp, liten tur blant haustfargane i Sørmarka, øve på orkesternotane i lag med mannen min, lese ute på balkongen, kaffi og kake i lag med ein god ven før kveldsvakta på jobb, lese vidare i Narnia-serien, alle fargane i den botaniske hagen, storfangst på REKO-ringen, meir lesing, liten tur rundt Mosvatnet der eg såg de fine svanene og bli heilt ferdig med den eplegrøne Shine Short Sleeve.



Oktober: eit glimt av vanlege tider då me kunne skrote bookingsystemet, dynefrukost ein sundagsmorgon, adoptere den søtaste elefanten Esoit, byrje på ein stilig genser til mannen min, konsert med orkesteret etter nesten eit heilt år sidan førre gong, høyre på Tønes sitt nye album, vemodig på ein fin måte å sjå ferdig den aller siste episoden av The Durrells, ete på Døgnvill og etterpå sjå Dune på kino miniferie der me køyrde til bokbyen Tvedestrand og sidan Oslo (du veit, eg skulle sjå musikalen Mamma Mia! på Folketeateret), tur opp til hytta for både dugnad, hygge og avslapping, meir strikking, bokklubbmøte over nettet, knallgod middag på Zoug og så Bond-filmen No Time to Die på kino, le høgt av Coda KORK, nydeleg tur blant haustfargane i Rogaland Arboret, køyretur og kaffi i lag med ein god ven og spele "Takenoko".



November: brukskunstmessa i Åsenhallen, pizzakveld heime på Sola, vise fram min kongeblå Collett Sweater, sjå den nye Wes Anderson-filmen på kino (The French Dispatch, digga den), to ekstra fridagar etter stemnehelg, ny sesong av Beat for beat, bruktbutikk med kule teakmøblar,  kort tur ute i Kuneset park, tenne lys om kveldane, framleis fullt av haustfargar ute, The Great Britsh Bake Off, spele Nøtteknekkeren fire gongar i lag med orkesteret på tampen av månaden, og heilt på tampen av november pynte juletreet på jobb og juletrepynting og middag hos eit venepar.



Desember: traske heim frå jobb, ta toget til Egersund og julebyen i lag med broremann, mannen min og ei god veninne, bokklubbmøte over nettet, den tradisjonelle julekakebakedagen med broren min, lese årets siste Christie-bok, ny sesong av Eides språksjov, juletapas og pakkeleiken med dei på jobb, lese mange herlege julebøker, spele julemusikk på trombonen for badegjestane våre (før me måtte stenge hallen for publikumsbading), Maskorama-finalen, gå Forusstrandaturen med vind og strålande sol, byrje på eit nytt strikkeprosjekt, lage heimelaga latte då eg fekk ei god veninne på besøk, Love Actually, nettkonsert med Adam Douglas, juletrepynting lille julaftan, feire jul med familien (og herlege Zalo), brettspel og quiz, sollyset i Hålandskogen fyrste juledag, taco og brettspel med eit venepar tredje juledag og ei roleg nyttårsfeiring berre han og eg.

3. jan. 2022

Boktatt 📖




Måndag. Ei ny veke i eit nytt år. Hei og hå, eg startar veka med kveldsvakt, noko som betyr ein roleg morgon med lesing, kaffi og kanskje litt strikking. Aisatos illustrasjonar er med meg denne veka også, for me la nyleg ferdig dette puslespelet. Då eg kom over hennar puslespel i ein butikk i haust, kunne eg ikkje la vere å kjøpe eit og ta det med heim. Vanskeleg å velje berre eit, men valet fall til slutt på "Boktatt", ein av illustrasjonane frå boka Jenta som ville redde bøkene av Klaus Hagerup og Aisato. Kjenner meg veldig igjen i jenta som sit på ein haug med bøker, heilt i si eiga verd. Ei bok i fanget som nesten sluker ho, ei bok ho sluker. No som me har pusla det ferdig, klarer eg ikkje å ta det frå kvarandre, og dette blir det fyrste puslespelet me skal prøve å ramme inn. For så fint er det.

2. jan. 2022

Siste rest av jul og sidan inn i eit nytt år


Eigentleg kjenst det som om eg ikkje har gjort noko denne veka anna enn å strikke og lese, verkeleg prøve å setje pris på det å ha ferie når ting er litt kjipt. Men så ser eg på bileta at jøsses, det har blitt spelekveldar, middagslaging med Zalo, puslespel og generell hygge. Byrja på kveldsskiftet på onsdag, var der også torsdag, fri fredag og i går og ein liten tur innom i dag, med andre ord ei ganske kort jobbveke. Nyttårsaftan var som nemnt roleg, berre oss to, utan nokon forventningar. Starta året like roleg med veksle mellom å ha boka og strikketøyet i fanget. Jula er så å seie rydda bort, men eit siste dryss av jul og juleferie kjem no i denne sundagslista, ei liste frå både 2021 og 2022:

✦ julekaker, finfin juleduk og kaffi i eit nesten hundre år gammalt servise
✦ knallgod, heimelaga pasta carbonara og tente lys den aller siste dagen i 2021
✦ la adventsstjerna hengje i vindauget ei lita stund til
✦ "You jingle, you lose" – TwoSetViolon er alltid like artige
✦ Lisa Aisatos illustrasjonar er nokon av dei aller finaste, og eg finn så glede i dette puslespelet
✦ sjå animasjonsfilmen Solan og Ludvig – jul i Flåklypa, likte den godt
✦ stå ei lita stund ute på balkongen og titte på fyrverkeriet
✦ Wilda reflekterar og skriv veldig godt om det at me ikkje kan klare å planleggje alt
✦ få ein flott sjokolade frå ein av vikarane som byttar skift i morgon
✦ lese ei siste julebok
✦ utdrag frå musikalen Matilda på Royal Variety Perfomance 2021
✦ og kulaste Bill Bailey var også med, alt det han finn på!
✦ desemberbuketten inne hos Et katteliv er så stor og nydeleg
✦ Zalo ville også ha krumkake med fromasj, og det skjønner eg godt ;)
✦ blei utfordra på Instagram i #fivefingersstackchallenge, sjå her for mine fem bøker
✦ me laga laurdagspizza heime på Sola i går, og jaggu skulle Zalo vere med på det også
✦ jula er rydda bort, men før eg tok bort pynten, skein sola så fint og flott rett på vegghylla
✦ ete taco, prate og spele "Azul" i lag med eit venepar i starten av veka
✦ litt på etterskot, men her kjem det digitalt julegodt frå Synne
✦ latterkrampe då me spelte "Ryktet går" i lag med familien i går :D
✦ "Bare vent, snart blir jeg majestet" frå Løvenes konge i ein episode av Beat for beat
✦ eg smeltar når eg ser denne minikoalaen!
✦ starte året heilt avslappa med lesing og strikking