Middagsbuffé med historisk sus

Middag på stranda. Eller, ikkje heilt, men nesten, for på sundag åt me sundagsbuffé på Sola Strand Hotel. Han der fine hadde fått eit heimelaga gåvekort av meg for fleire bursdagar sidan, eit gåvekort me hadde gløymt sidan det sånn sett ikkje var ein frist på det. Endeleg kom me oss av garde, og maten kunne me ikkje klage på; det var noko for ein kvar smak, både salt og søtt, kaldt og varmt!

Alltid litt ekstra stas å vere på ein stad med historisk sus. Flotte bøker og gamle stolar, ein like gammal og flott sylinderomn. Å berre gå rundt og utforske den klassiske stemninga. Noko av det kulaste var gamle middagsbillettar frå 1958 som eg fekk auge på i eit glasmonter.

 

Før me drog heim, gjekk me dei få skritta til stranda, opp på ei sanddyne og berre såg utover horisonten. Fekk med meg mannen min på sjølvknips, både inne på hotellet og ute på stranda, det er ikkje alltid det skjer ;) Sola gjekk ned i havet og me kom oss til slutt tilbake til heimen vår.

Morgon og kveld i februar

Fri i dag, og med ei sol som stod høgt på himmelen, fekk eg gått meg ein liten tur i nærområdet. Men aller mest har eg lese. Ein av dagane førre veke, då eg stod og venta på bussen klokka halv ni om morgonen, var det godt å berre stå ved busshaldeplassen og kjenne sola varme. Skuggespel på naboblokka, eit varmt og gyllent lys, og på veg opp Ullandhaugbakken, titta eg ut av bussvindauget og såg høyballane liggje på eit jorde medan sola strålte og laga ein finfin morgonstund.

Og solnedgangane fleire av dagane. Den dagen då himmelen var knallrosa, blei eg fascinert over lysspelet som laga så tydelege skilje. Sukk, at februar også kan vere slik, ikkje berre snø og sludd.

Tønes på scena ein dag, i avisa ein annan dag

Ohoi, denne veka har verkeleg gått i eitt! Mammut-salet starta på måndag, og det har me merka med alle dei kundane som har vore innom for å kjøpe bøker, både til seg sjølv og til andre. Tihi, eg har funne noko sjølv også, det må eg innrømme. I tillegg var det ein kjekk konsert på torsdag i lag med eit venepar og sundagsbuffe på Sola Strand Hotel i dag. Vel å merke har helga elles vore roleg, men det trong eg etter dei travle dagane. Då eg kom heim i halv seks-tida på fredag, kjente eg tårene komme. For tida har me ein brummande lyd i blokka som kjem me ujamne mellomrom. Trur det er ein vaskemaskin eller liknande som står og vibrerar slik at det kjennest som ein ekkel brumming. Og det er heilt utruleg slitsamt, særskilt når ein er gåen etter ei lang veke. Me er på saka om kor lyden kjem frå, så eg håper det gir seg etter kvart. Både han og eg har verkeleg kost oss med lesinga i helga, og det har vore ordentleg avslappande. Ein liten tur innom IKEA i går (kvitlaukspressa vår rauk og me måtte så klart ha ny), meir lesing, roleg musikk og kjent litt på både sol og regn i dag, sundagen er nesten over. Skal prøve å runde av her no og heller finne fram boka. Og... der var eg ferdig:

 

✦ som eg koste meg med å lese Den fantastiske familien Vanderbeeker av Karina Yan Glaser

✦ Sola kulturhus by night; innmari kjekk konsert med Tønes på scena

✦ og både før og etter konserten fekk me prata med veneparet som var med oss, ein hyggeleg kveld

✦ kakao og bok ein av kveldane etter jobb

✦ raudrutete bruktkjole på jobb 

✦ apropos Vanderbeeker-boka: kjekt å høyre på denne podcasten om boka

✦ for ein strålande morgonsol på veg opp Ullandhaugbakken på veg til jobb

✦ Heartstopper på Netflix: eg såg den siste episoden av sesong to i går, og den serien er berre så fin!

✦ ete sundagsmiddagen på Sola Strand Hotel, så mykje god mat å velje mellom

✦ sjølvknips på ei sanddyne etter middagen på strandhotellet 

✦ så vidt byjre å lage fotobok frå turen vår til Finland i fjor sommar

✦ tihi, to supersøte videoar med ein liten golden retriever i hovudrolla

✦ likte godt The Troubles som bakteppe i boka Ovetredelser av Louise Kennedy

✦ morgonsola på ei av naboblokkene

✦ før torsdagens konsert: lesestund i ein gul og kul stol inne på Sola bibliotek (ungdomsminne)

✦ vindaugskunst i flotte fargar på Vågen vgs.

✦ vil berre nok ein gong anbefale OL-boka 16 dager på Lillehammer av Magnus Helgerud 

✦ høyre på Enya medan me las i kvar vår bok, "Caribbean Blue" er ein av dei aller finaste songane

✦ mange gode bøker å velje mellom på Mammut-salet, mellom anna Å vanne blomster om kvelden

✦ sundagsmorgon med kaffi, eit par sjokoladeruter og Tønes sine underfundige tekster i Dag og Tid 

✦ mykje lesetid både i går og i dag, akkurat det eg trong for å senke skuldrene

Trombonekonsert og ein heil symfoni

Utruleg kjekt å spele konsert med orkesteret sundagskveld. På programmet stod det Nino Rotas trombonekonsert og Tsjajkovskijs sjette symfoni ("Pathétique"). Som solist hadde me med oss Sølve Grødem, og det var ein fryd å høyre på (sjølv hadde me messingblåsarar pause på dette stykket). Rota er aller mest kjent for å ha skrive musikken til Gudfaren-filmane, artig å høyre annan type musikk komponert av same fyren. Når det gjeld symfonien til Tsjajkovskij, var det med eitt meir å gjere, og eg skal innrømme at eg var litt nervøs før konserten. Heldigvis gjekk det aller meste bra, og me fekk skryt for koralane våre frå dirigenten. Mellom øvinga og konserten, var me fleire som gjekk ned i Langgata i Sandnes for å ete på restaurant. Det var nemleg Madugå førre veke, og på mange av restaurantane i byen kan ein ete ein god middag for 100 eller 150 kroner. Maten var veldig god (me åt på Zouq), og så var det hyggeleg å gjere noko anna med orkestergjengen enn å "berre" spele musikk saman ;) Godt besøk på sjølve konserten, og det var stas å spele for nesten full kyrkje.

16 dagar på Lillehammer

Tretti år sidan verdas auge var retta mot Lillehammer. Det er tretti år sidan "...the best Olympic winter games ever!". 12.-27. februar 1994 var det vinter-OL på Lillehammer. Sjølv hugsar eg fint lite av det, men så klart er det likevel mykje ein har fått med seg om kva som skjedde under Lillehammer-OL nettopp fordi det er eit kollektivt minne blant mange nordmenn. Det var Johann Olav Koss sine tre gull på skøyter, spenninga under stafetten på 10 km langrenn for menn, det var Dæhlie og Alsgaard, pinsfeber, dramaet mellom Harding og Kerrigan, Vladimir Smirnov som alle heia på under 50 km klassisk og det rørande augneblikket då Dan Jansen endeleg tok gull. I boka 16 dager på Lillehammer av Magnus Helgerud får me dag for dag ta del i alle dei små og store augneblikka som skjedde under OL-dagane, alle dei små og store historiene. Tenk, det er berre tretti år sidan ei kvinne – Stine Lise Hattestad – tok Noreg sitt fyrste individuelle OL-gull på ski. Rart med tanke på at det no er ei kvinne – Marit Bjørgen – som er den mestvinnande vinterolympiaren nokosinne. OL-floka, Sissel Kyrkjebø som song den olympiske hymna, Stein Gruben som hoppa med den olympiske ilden (Ole Gunnar Fidjestøl, som eigentleg skulle ha hoppa med ilden, fall stygt under generalprøva) og dei mystiske vetta og trolla. Ei opningsseremoni som blei abrunda med ei stor fredsdue. På NRK Nett-TV kan ein sjå og (gjen)oppleve mange av høgdepunkta frå OL på Lillehammer, og på YouTube kan ein faktisk sjå heile OL-filmen. Heime på Sola har mamma nokre av dei offisielle OL-glasa medan pappa har nokre minnemyntar, og dei passa perfekt då eg skulle ta bilete av boka. Helgerud har skrive ei bok med ekte nostalgi, og for min del nostalgi for noko eg eigentleg ikkje hugsar, berre har høyrt om. Fyrst las eg boka, og mykje av det eg las, berre måtte eg lese høgt for mannen min. Tihi, ler litt, for det enda opp med at då eg var ferdig med boka, ville han også lese den. Å, alltid gøy når me les den same boka, leseglede på høgt nivå for oss begge to!

Snart årets store boksal

Veke sju av tjuetjuefire har verkeleg vore godt og blanda. Snø og trafikkaos i byrjinga av veka, sol og ordentleg vårstemning i går, og regn og meir gråvêr i dag. Eg har truffe fine folk både før jobb og i lunsjpausen, ordna bøker til Mammutsalet og me har spelt konsert i lag med orkesteret. Rett og slett ei veke som har godt fort sidan det stort sett har vore ting å gjere heile vegen. Men eg har klart å setje av litt tid til lesing kvar dag, altså, for lesing for meg er som balsam for sjela. Hi, hi, akkurat det har eg sikkert skrive her på bloggen ørten gongar opp gjennom åra, men det er framleis sant. Trur ikkje eg har så mykje meir å nemne, så her kjem resten av veka oppsummert i dei vanlege punkta:

 

✦ innmari gøy å vere med på #readchristie også i år, og i februar las eg Den hemmelige fiende

✦ ordentleg kvardagsglede: å komme heim etter seinvakt til raude roser på Valentinsdagen

✦ prate med ein kollega om Ringenes herre og irsk musikk

✦ småhumrar av "One Zoom to Rule Them All" – for eit herleg Ringenes herre-gjensyn! 

✦ sollyset ved naboblokka medan eg venta på bussen midt i veka

✦ og ikkje lenge etterpå: sollyset over ei snøkvit eng, sett gjennom bussvindauget 

✦ pastellhimmel ein av ettermiddagane då eg var på veg heim

✦ lesing på kafé blir eg aldri lei av ;)

✦ som vanleg ein liten video av dei aller søtaste Bami og Dami

✦ så vidt byrje å sjå den aller siste sesongen av Endeavour (eller Unge inspektør Morse)

✦ laurdagsøving med orkesteret, og sidan ein kjekk konsert no i kveld

✦ mamma som kom innom ein kveld for å hjelpe litt med orkesterets reikneskap

✦ tihi, både den lille og den store golden retrieveren er heilskjønne i denne videoen 

✦ gøy å pakke ut bøker på jobb og opddage at fleire favorittbøker skulle ut på hylla

✦ litt treig bok, men Catching the Light hadde nydelege skildringar av Newfoundland og Nova Scotia

✦ ikkje kjekk lesing, men viktig lesing: om kvardagsrasismen som framleis skjer her i landet

✦ gøy å leggje fram bøker og gjere alt klart til Mammut-salet som startar på måndag

✦ knallgod laurdagspizza og kjekk film etter orkesterøvinga i går

✦ Haugesund folkebibliotek ser ut som ein ordentleg biblioteksdraum

✦ kafédate med ei veninne av meg før jobb på onsdag, rett og slett superkoseleg

✦ og jaggu meg blei det kafébesøk med eit venepar i lunjspausen min på fredag

✦ boka One Evening in Paris er ein hyllest til kinoen og vakraste Cinema Paradiso blir ofte nemnt

Sollys eit par minutt før jobb

Bileta lyg litt, for slik ser det ikkje ut her i byen lenger. Snøen er så godt som borte etter regnet som kom i går og i dag, men det passar meg fint. Eg vil nemleg ha vår! Samstundes lyg dei ikkje viss ein berre går eit par dagar tilbake i tid. Trafikken stod og det var fullt kaos heile måndag på grunn av all snøen som kom dalande. Kom meg greitt på jobb på tysdag (sikra meg ved å ta ein tidlegare buss enn det eg eigentleg hadde tenkt), og då eg skulle ha seinvakta på onsdag, skein sola som aldri før. Gjorde godt å stå ute eit par minutt og berre nyte sollyset før eg kom meg på bussen og var inne på jobb resten av dagen. Håper det ikkje kjem meir snø før vinteren er over (ikkje ofte me får såpass mykje snø her i siddisland), for no er eg klar til å ta sykkelen fatt til jobb. Tjo og hei, det blir orkesterspeling på oss både laurdag og sundag, ønskjer deg ei superduper februarhelg.

Solasundag

Sundagsettermiddag heime på Sola, for jaggu meg var det morsdag og fastelavn på den same sundagen. God middag, knallgode bollar til dessert, koseleg prat og ordentleg hygge. Balto var med oss etter kvart, og også han måtte ha ein liten pause etter feiringa, tihi. Før me køyrde tilbake til Stavanger, blei det ein liten quizrunde med spørsmål frå Aftenbladet, klagar ikkje på ein slik sundag.

Bussutsikt i februar

 

Glatte vegar og fullstendig kollektivtrafikkaos, både i helga og no i dag. Heilt greitt at verken han fine eller eg skulle på jobb i dag. Det er sjeldan me har ein slik vinter som det me har hatt denne gongen, og den der snøen er liksom i vegen når ein lengtar etter vår. Når det er sagt, fekk eg oppleve eit par flotte morgonar i førre veke medan eg sat i busskø. Lysande skyer ein dag og pastellhimmel ein annan dag. Så får me sjå kor lenge alt det kalde, kvite blir liggande. Eg ser fram til neste årstid.

Snødagar i ei full jobbveke

Berre ein dag utan snø, skulle helst ha hatt mange fleire. Det var så kjekt kunne sykle til jobb og sjå gåsungar på eit tre førre veke, noko eg kunne sjå langt etter desse dagane. Med all den snøen som kom på tysdag (og endå meir i går!), har eg tatt bussen til jobb og frå jobb. Tysdag og onsdag gjekk tida til å spegelvende butikken, og det blei til slutt veldig fint med bøker på den rette veggen og spill og kontorartiklar på veggen som går på skrå inn i butikken. Prising av Mammutvarer og hjelpe kundar å finne den riktige boka har eg også gjort mykje av på jobb. Om kveldane har eg prioritert lesing, men eg har også strikka og sett litt på TV. Tur med ei god veninne og orkesterøving (konsert om berre ei veke!), og utpå ettermiddagen i dag var me heime på Sola. Middag, morsdag og fastelavn, ein koseleg kveld med familien. Og Balto som me passar frå i kveld til i morgon. Om litt er det på tide å finne senga, veka er snart omme, skal berre leggje ut nokre punkt fyrst:

 

✦ Valérie Perrin har gjort det igjen: Glemt på en søndag er ei sår, nydeleg og vakker bok!

✦ Balto måtte også ha pause etter morsdags- og fastelavnsfeiring

✦ stilig å lage dekorblomar av kongler

✦ setje av tid til lesing kvar kveld etter jobb 

✦ prate med ein kunde om ei god bok eg nyleg las som vedkommande også ville ha tak i

✦ søtaste hunden med hengeøyre som er ven med ein like søt kattunge

✦ sjå filmen Maestro i lag med venar (Bradley Cooper er veldig god i rolla som Leonard Bernstein)

✦ laurdagskveld med to nye kortfilmar av Wes Anderson, taco og ordversjonen av "Bezzerwizzer" 

✦ og sundagslista blir ikkje komplett utan ein liten video av Bami og Dami ;)

✦ pastellhimmel oppe på Ullandhaug fleire av morgonane

✦ koseleg å ta lunsjen på Madla bibliotek der ei av mine tidlegare kollegaar skulle gå av med pensjon

✦ og snøen som plusteleg dekka trea då me kom heim frå orkesterøvinga tysdagskveld

✦ eg er ikkje ein dataspelperson, men dette Mummi-spelet kjem snart og det ser utruleg kjekt ut

✦ If Only You av Chloe Liese, bok nr. seks i ein av dei herlegaste bokseriane

✦ starte veka med ein akkurat passe gåtur i lag med ei god veninne, mykje prat og me såg kaninar

✦ "Ting å gjøre når den man er glad i forsvinner" – fint å vite om demens

✦ sundagsmiddag heime på Sola (og så blei det litt fastelavnsbollar og ei lita morsdagsgåve)

✦ strikkeprosjekt med eit av mine favorittgarn (er glad i både garnet, fargen og sjatteringane)

✦ senterleiinga som stakk innom før helga og gav oss litt "MadlaLove"

✦ alltid morosamt med Tennant, Sheen og Good Omens-relaterte videosnuttar, her ein spørjerunde

✦ kult at Bakemesterskapet er i gong på NRK

✦ Kazuo Ishiguro si novellesamling Nokturner om musikk og artistar var ei finfin leseoppleving

Eit anna favorittgarn

Elsk på dette garnet frå Pickles! Det er eit tweedgarn i merino og garnet har eit heilt nydeleg fargespel. Veldig glad for at eg kjøpte nokre nøste på tilbod for eit par år sidan, for no har dei det ikkje lenger til sals i nettbutikken. Eg har så vidt byrja på eit nytt strikkeprosjekt, og til slutt skal det bli ein Twiggygenser. Og så må eg le litt av meg sjølv, for den raudlilla fargen er nokså lik fargen på Markagarnet frå Oslo Mikrospinneri som eg  også har strikka med no nyleg – det er visst tydeleg at dette er ein farge som fell i smak! Så får me sjå korleis sluttresultatet blir; eg har for lite garn til å strikke genseren i berre ein farge og er spent på kva fargekombinasjon eg til slutt ender opp med ;)

Kladdkake

Lurer på om eg har funne ei ny favorittkakeoppskrift: nemleg sitronkladdkaka frå Det søte liv. På sundag var me invitert til eit venepar, og eg hadde lyst til å lage noko godt å ha med til kaffien. Det som er så kjekt med denne oppskrifta, er at ein lett kan bytte ut sitronsafta med til dømes appelsinsaft, noko eg prøvde denne gongen. Sjokolade er vel den vanlegaste smaken når ein tenkjer på kladdkake, men jaggu meg er den knallgod også med sitron- eller appelsinsmak. Enkel å lage, og den seige konsistensen er det som gjer heile kaka (derav namnet kladdkake)! Te, kaffi og popkorn blei det også, med andre ord noko for ein kvar smak, og me hadde ein hyggeleg sundagskveld.

Prat i frisk luft

Starta veka med ein akkurat passe kvardagstur i lag med ei god veninne. Turen treng ikkje alltid å vere så lang for å vere bra, og det var kjempehyggeleg å prate om alt og ingenting samstundes som me fekk frisk luft i trynet. Gjekk opp Fantastien, og vel oppe på haugen, såg me tre søte kaninar. Tihi, dei gjekk no nesten i eitt med graset som framleis ikkje er sommargrønt (det skulle berre mangle, me skriv jo berre februar). Sidan traska me ned Sørmarkbakken, også kalla Grisabakken, forbi Sørmarka Arena og ned til blokka. Stod der og prata litt før ho kom seg heimover. Klagar ikkje på ein slik start på veka. Eg har elles lese mykje, og i morgon er det ein heilt vanleg jobbdag.