16. mai 2022

Skinande fargar




Overalt kor eg går, ser eg blomar og grøne vekstar. Løvetann og markblomar langs grøftekanten, grøne blad på trea eg passerer medan eg syklar og fargerike blomar i alle slags variantar i den botaniske hagen. Å sykle til jobb ti over seks i dag tidleg var ikkje så ille med ei sol som allereie stod relativt høgt på himmelen. Og det ser ut til å bli like strålande i morgon, på sjølvaste 17. mai. Våren som kjem, år etter år, ei lysare tid der fargane får skine. Sykle utan skjerf og hanskar, kjenne dagane som blir lengre og lengre, sitje ute på balkongen i sola og lese ei bok og alle blomane – små ting som alle lyser opp kvardagen. Måndagen er snart over, og eg tar vare på desse små stundene.

15. mai 2022

Utekafé, krimdronning og blomar i fleng


Heisann, hoppsann. Om ikkje så mange timar er det ut av senga og av garde til jobb; eg byrjar nemleg på morgonskiftet i morgon. Kjenner eg har vore litt sliten etter kveldsskiftet, og det har vore godt å ikkje ha altfor mange planar. Men bøker og strikking blir det alltid litt av, og eg var ute ein tur for å få unna nokre ærend på torsdag. I går hadde me ein effektiv handletur før me køyrde ut til Hundvåg for å vere med på 1-årsfeiringa av kafédrifta og planteutsalet på Heddas gård. I dag var me ein snartur oppom Ullandhaugtårnet. Kjøpte ein vaffel i kaféen og sat ute på ein benk i nokre minutt og berre naut sola og utsikta. Han der fine sa at det kjentest ut som om det var sommar, og eg kunne ikkje vore meir einig! Følgde med på ESC-finalen i går, så mange rare songar, sceneshow og kostymar, eit sirkus! No må eg avslutte, senga ventar. Sjekk ut alt det fine frå denne maiveka:
 
gleder meg kvar månad til å lese ei av Christies bøker, og denne gongen blei det Den åpne graven
korpsmusikk utanfor blokka då eit av skulekorpsa øvde til 17. mai
strikke medan eg las om Shetland (siste del av reisereportasjen eg tidlegare har nemnt)
og apropos Shetland: såg ferdig den nyaste sesongen av krimserien Shetland denne veka
tilbakeblikk på ei hyttepåske inne hos Et katteliv – her var det mykje hygge og koseleg stemning
fem flotte porselenskupp i ein nydeleg mosegrøn farge
strikke endå meir og ete heimelaga is medan me såg den andre ESC-semifinalen
rørt til tårer av gardens versjon av "Bruremarsj fra Lødingen" (minne om vår eigen bryllaupsdag)
laurdagsmorgon med dagens andre kaffikopp, ein liten sjokoladebit og ei bra bok
tihi, småhumrar litt av desse Friends-tabbane
Maisie gjer magiske bøker endå meir magiske ved å teikne på sidekantane av bøkene
høyre på ein av songane frå In the Heights medan me vaska ute i svømmehallen
tulipanar i den botaniske hagen
små, høge "god morgon"-mjau frå den søtaste, lille katten 
rosa blomar på trea overalt kor eg går
laurdagstaco og gjensyn med den herlege musikalkomedien On the Town frå 1949 
stikke innom Heddas gård for ein prat med fine folk, kaffi og ei stykke knallgod suksesskake
indigofarga, stilig bil og blomar i omtrent same farge
kjekt å lese ein akkurat passe søt romantisk komedie, nemleg Lease on Love av Falon Ballard
nyte ein vaffel oppe ved Ullandhaugtårnet medan sola varma andleta våre

13. mai 2022

🌸🌳🌸





Daff fredag med gråvêr og lite energi. Eg har no vaska badet og fått tid til å strikke og lese, så det er ikkje altfor ille. Men det skjer eit eller anna med energien når ein har jobba åtte dagar i strekk og det i tillegg er mørkt og trist ute. Fram med bilete av blomande tre, for dei lyser opp kva dag som helst! Når eg syklar til jobb, er det ein plass der det står fleire slike tre på rekkje og rad. Fleire gongar har eg stoppa for å nyte synet eit minutt eller to. Passar på å ikkje komme for seint til jobben, men eg får energi av å ta meg tid til å berre sjå på dei vakre blomane, dei klare fargane. Å finne glede i det eg finn langs vegen eg syklar, det store i det små. "That is one good thing about this world...there are always sure to be more springs." (Anne of Avonlea, L. M. Montgomery). Og det er så sant
 



"Og det er kirsebærtreet
innafor hageleet
som blømar i tidleg vår.
Mot gråe kytjeveggen
luter det krokne leggen
og signar oss atter eit år."
(Olav H. Hauge)

11. mai 2022

Fem mosegrøne porselenskupp




Framleis litt rart å stå opp halv seks om morgonen dagen etter å ha hatt kveldsvakt. Men det er siste dagen før turnusfri og det er lagt opp på denne måten slik at me kan gå av skiftet på dagtid og dimed ha meir igjen av dagen. Vel, det var eigentleg ikkje det eg skulle skrive om. Tidlegare i år var eg som nemnt innom ein kjempeflott bruktbutikk der eg blant anna fann eit avlangt porselensfat i akkurat passe storleik. Frå før hadde eg eit stort fat etter mormor og ei lita skål, og alle desse tre kjem frå Stavanger flint. Stilig med lokal porselen! I hylla på badet har eg ei lita fløtemugge og ei sukkerskål i veldig lik farge og design. Desse to er laga i Colditz i GDR med CP som merke. Må seie at sjølv om desse seriane er frå kvart sitt land, passar dei veldig godt i lag sidan dei liknar såpass mykje.

9. mai 2022

Ut togvindauget to seine aprildagar


To dagar i april, dei to siste faktisk. I eit togsete på veg til Oslo, og sidan på veg tilbake igjen. Fredag for halvanna veke sidan tok eg morgontoget til hovudstaden, og sjølv om eg hadde med meg nok bøker å lese, blei eg lenge sitjande og berre sjå ut vindauget. Blikkstille vatn og blå himmel, det flate, jærske landskapet. For meg er det noko meditativt å la landskapet fyke forbi saman med tankane.
 



Heim igjen. Toget gjekk halv to frå Oslo S, og nok ein gong måtte eg stadig titte ut. Robåtar og koselege hytter ved eit vatn. Las ein god del også, men då me byrja å nærme oss Jæren, blei det til at eg for det meste naut synet av landskapet. For eg fekk oppleve ein mjuk solnedgang over markene, over togskjenene og over fjorden. Å reise på denne måten, å ha god tid. Eg finn roa. 

8. mai 2022

Vanlig veke med eit svømmestemne på tampen




Inga overrasking at helga går fort når det er svømmestemne på jobb og det var mi jobbhelg. For det meste har ting rulla og gått av seg sjølv, men så klart var det litt ekstra vasking og rydding då stemnet var ferdig utpå dagen i dag. Eg kan vel ikkje seie at eg har gjort noko spesielt denne veka. To fridagar, orkesterøving, mykje lesing, mimring tilbake til Canada-turen vår og ein laurdagskveld på Sola i lage med mamma, pappa, broremann og ein onkel. God pizzasnurrvariant, kake og kaffi, latter og diskusjon om årets ESC-låtar (ikkje at me har følgt med noko særskilt, men litt artig er det no likevel). Søte lam og fine blomar ute, og viss du vil vite meir om mi veke, så les rett under:

Emily Henrys People We Me on Vacation er perfekt balkonglesing
artig at James herriot blei nemnt i ein episode av Drømmeslottet
✦  "Top 10 Ridiculous 1980s Music Videos" – det glade 80-talet, her var det mykje løye
laurdagsmiddag og knallgod sitronostekake heime på Sola
fargesterk blome
få litt frukt og noko til kaffien av dei som arrangerte svømmestemnet
solnedgangen sett frå bussvindauget på veg heim frå orkesterøvinga
små, kvite blomar på eit tre på campus
gøy å lese om Vlad og Elena i Isn't it Bromantic?, bok nummer fire om The Bromance Book Club
min nye og vårlege Shine Short Sleeve 
tilbakeblikk på ein full bokhylle på kulturhuset i Oslo
Jonnas videoar er alltid like magiske
for to dagar sidan var det nøyaktig fire år sidan eg reiste til Moncton i Canada – saknar finaste PEI
må småhumre like mykje kvar gong: "Beaten må være litt bakpå"
søtaste lamma oppe på Ullandhaug 
finne roa med strikking
råkult med ein heilt ny LEGO-arm til ein åtteåring
påskekrim er like bra året rundt, attpåtil fjorårets, og med kaffi og noko godt attåt 
ny sesong av Fader Brown ligg ute på NRK Nett-TV

6. mai 2022

Fluffy topp i ein farge som roper vår





Knalloransje farge, ein mjuk og luftig topp, heilt perfekt for våren. Nyleg blei eig ferdig med min andre Shine Short Sleeve frå Novemberknits. Garnet er tynn silk mohair frå Sandnes Garn. Toppen sit akkurat passe laust og kjem til å bli ein favoritt som eg tar fram no og på seine sommarkveldar.
 



Perlestrikken på erma, den markante halsen og ragnlanaukinga, denne toppen er i mine auge så pen og elegant. Etter inspirasjon frå Instagramkontoen Stickjournalen, avslutta eg kanten på erma med ein liten i-cordkant denne gongen i staden for vrangbord slik det eigentleg står i oppskrifta. Synest det passar ypperleg til den flotte perlestrikken og generelt heile det mjuke utrykket. 

4. mai 2022

Idyll i mai




Rett ved universitetet ligg det fleire gardar, og akkurat no er det nusselege lam å sjå både på den eine og den andre plassen. Tok ein tur dit her om dagen: to små og kvite lam kan ein sjå beite i lag med høner i tillegg til mora deira. Liten idyll omtrent på campus. Oppe ved den økologiske garden på Ullandhaug måtte me bort for å helse på dei tre store grisane. Den eine rulla seg i søla, snøfta og verka nøgd. Etterpå rista den av seg den resterande søla medan dei to andre tok det heilt med ro.


Ikkje så lett å fange på kameraet med ein sol som stod høgt på himmelen, men jaggu var også dei spraglete lamma ved jernaldergarden supersøte! Hi, hi, den eine heva hovudet og stod stille ein augneblink med nasen høgt i sky. To små lodne pelsdottar som hoppa rundt på haugane, for dei har god plass inne på området. Såg også fem andre små lam, og då meiner eg små, på eit anna jorde, men dei var for langt unna til å kunne bli tatt bilete av. Men tru meg, dei var berre heilskjønne!

3. mai 2022

Tjuetre timar i Oslo saman med fine folk


Sidan eg berre skulle vere i Oslo eit snaut døgn, ønskte eg å reise lett, og eg tok difor ikkje med meg verken systemkameraet eller speilrefleksen. Litt rart å reise utan "ordentleg" kamera, men det gjekk no greitt å berre bruke mobilen. Så her kjem ein liten haug med mobilbilete frå min lille helgetur. Kaffi og bok på toget medan landskapet fauk forbi, eg lot tankane fare og hadde det riktig så bra. Togturen gjekk ganske fort, og vel framme i Oslo fann eg raskt fram til hotellet – måtte humre litt for meg sjølv då eg såg kor stort rommet var, for det var jo berre meg som skulle overnatte der (veninna mi og søstera hennar overnatta på eit anna hotell, men der var det fullt). Fekk så vidt tid til å skifte før eg møtte veninna mi. Saman traska me til Sørengkaia der me åt ein knallgod middag på Castello. Og så høgdepunktet: Hans Zimmer-konsert i Telenor Arena. Låta "House Atreides" frå Dune som opningsnummer, filmen Zimmer vann sin andre Oscar for, inga overrasking at tårene byrja å renne. Trøkk med musikk frå mellom anna Man of Steel og Pirates of the Caribbean, sidan nydeleg vokal med musikk frå Gladiatoren blei spelt, Inception som ekstranummer og tårene rann nok ein gong då musikken frå sjølvaste Løvenes konge endeleg ljoma frå høgtalarane.
 



Som du sikkert skjønner var det ei utruleg konsertoppleving! Stilig at Loire Cotler var med for å syngje, det var nemleg ho som song på Dune-albumet, og ho har ein heilt unik måte å syngje på. Og at Lebo M. også var med på scena, mannen bak store delar av Løvenes konge-vokalen, var omtrent endå større! Takk for at eg fekk vere med, fine deg, Randi! Rart å ete hotellfrukosten aleine dagen etterpå, men eg hadde god tid og slappa til og med av med ei bok på senga før eg gjekk ned i resepsjonen og sjekka ut. Skulle møte veninna mi ved Stortinget, og medan eg venta, sat eg på ein benk og naut sola i andletet. Grøne blad på trea, ein knallblå himmel, eit flott hotell. Me skulle møte ei anna veninne ved kulturhuset (i same bygg som Folketeateret), for det hadde eg plutseleg funne ut at det skulle vere Strikkernes marknad den laurdagen. Fann ikkje noko garn (ikkje så lett når det er så mange folk), men veldig gøy å ta ein titt likevel. Etterpå blei det kafétur på oss, kjempekoseleg å ha eit par timar i lag med desse to finingane. Toget mitt skulle gå fem på halv to, og det rakk eg med fem minutts margin. Puh, tjuetre timar i Oslo gjekk fort. Men denne turen var absolutt verdt det! :D