31. mars 2013

Siste dagane i påskeferien

Nettopp komme heim (til Sola) etter nokre fantastiske dagar på hytta som ligg ved Moslivatnet. Sola har vore å sjå heile vegen, det har vore blå himmel og om kvelden dukka månen opp i all si prakt. Huff, slike feriar går så altfor, altfor fort. Er mykje eg gjerne ville ha gjort som eg ikkje kom i gong med. Men eg tenkjer også at eg har fått gjort ein god del og elles har eg lada batteria mine med tanke på jobb og skule. I morgon er det tilbake til Kr.sand, og på tysdag er det jobb. Tilbake til kvardagen med andre ord. Vel, vel. På hytta har me som nemnt hatt det veldig fint med


dei siste episodane av "Påskelabyrinten"

krimbok

påskegodt

hengt opp ein tuba med lys i på den eine hytteveggen

spelt brettspela "Alias" og "Bezzerwizzer+"

testa ut mitt nye kamera





laga god mat

nydeleg måneskin over vatnet, rundt midnatt

hatt besøk av både to- og firbeinte

hengt opp namneskilt (namnet "Ørneredet", som altså er namnet på hytta vår)

quizkonkurranse

pappa prøvde seg til og med på skøyter ute på det islagte vatnet

og elles har me berre slappa av og nytt dei siste dagane av denne fine påskeferien.

27. mars 2013

"No ser eg atter slike fjell og dalar..."

Dagane her på Sunnmøre går så altfor fort. Ute snør det. I morgon tidleg, før klokka slår seks, er me på veg til flyplassen for å ta flyet til Sola. Om under eit døgn er eg plutseleg heime. Det blir veldig fint, men eg kunne godt å ha vore her litt lenger. For sjølv om det no snør, har me hatt nokre fine dagar, omgitt av vakre fjell, omgitt av Sunnmørsalpane. Påskeroa har senka seg, så eg kunne fint ha hatt nokre dagar til her berre for å slappe av, lese litt, sjå på utsikta... Men eg gleder meg jo til å ha nokre dagar i hytta vår på fjellet saman med familien min. Det er eit eller anna med hytte, fjell og påske som heng i hop. Utanom å lese og slappe av, var me ute på Moa i går der me fekk unnagjort nokre ærend. Utpå kvelden var me bortom nabogarden for å helse på ein barndomskompis av kjærasten min og familien til denne kompisen. Veldig koseleg å treffe dei! I morgon, omtrent på denne tida, er me atter ein gong vel plassert oppe på fjellet i "Ørneredet".

25. mars 2013

Påskevêr

Når du møter ei eldre dame på rundt nitti år som gratulerer deg med trulovinga fordi ho har sett bilete av oss i lokalavisa, jepp, akkurat det opplevde me i går då me var ute og gjekk tur i det fantastiske vêret. Her i bygda veit dei aller fleste kven som er kven. Men eg syntest det var kjempekoseleg og veldig hyggeleg å få ei slik gratulasjonshelsing! Dagen i går gjekk med til å gå ein tur rundt om i nabolaget, me fekk begge to jobba litt med skulearbeid, og utpå kvelden blei det fullt hus her. Kjempekjekt å sjå att broren og svigerinna til han fine; det var ei stund sidan sist. Me satt lenge og spelte "Bezzerwizzer", og det blei nokre høglydte diskusjonar rundt bordet ;) Artig var det i alle fall. I dag skrudde me på radioen klokka ti for å høyre fyrste sending (for i år) med programmet "Påskelabyrinten". For min del er det eit fast innslag i påska, og eg har mange gode minne om det programmet frå påskene som me ofte feira ute på tante og onkel si hytte på Kråkerøy. Herleg med fint vêr, brettspel og gode folk – påska er i gong.

23. mars 2013

På reisefot

No er me på Sjøholt. Her skin sola, det er vindstille, med andre ord noko heilt anna enn kva vêret har vore på Sørlandet den siste tida. Så fantastisk herleg! Det blei ein lang dag i går, noko som innebar at me var på reisefot i heile tolv timar og vel så det. Turen starta då me tok bussen til byen klokka halv åtte om morgonen, for så å ta bussen til Oslo. Det blei til saman buss, buss, (fly)tog, fly, buss og buss. Så ja, det var absolutt ein lang dag i går. Men me hadde nokre timar å slå i hel på Gardermoen der me blant anna åt litt varm lunsj (eller middag, alt etter som) og drakk ein god kopp med kaffe. Fekk til og med lese litt på den norrøne grammatikken før me måtte gå om bord i flyet. Kom fram klokka åtte i går kveld, og i dag har me berre tatt det med ro. Sov lenge, høyrde på "Popquiz" på radioen før me åt frukost, var ein tur på butikken og elles har me ikkje gjort noko særskilt. Skal lese litt no, og seinere i kveld skal me lage pizza til alle her i huset (fem stk.). I morgon kjem broren og svigerinna til kjærasten min hit, så då blir det omtrent fullt hus her. Koseleg :)

21. mars 2013

God påske!

Siste skuledag før påskeferien er over, og i morgon reiser me til Oslo der me skal ta flyet vidare til Vigra, Ålesund. Som nemnt før så skal me vere hos foreldra hans på Sjøholt fram til skjærtorsdag. På skjærtorsdag landar me på Sola, og me rekk nok å ta ein tur opp til hytta og familien min før me reiser tilbake til Kr.sand andre påskedag. Eg gleder meg, og sjølv om det blir litt jobbing med skulearbeid, har eg lånt et par andre bøker, deriblant krim, som eg skal kose meg med :) For meg er påska krim, brettspel, quiz, "Påskelabyrinten" på radio, hyttetur og mange gode samtalar. Eg trur dette blir ei fin påske, eg :) På skulen i går hadde me to timar med oppsummering av den norrøne grammatikken og utruleg nok blei eg litt klokare (og bittelitt meir motivert til å jobbe med stoffet). I dag var det fire timar der me lærte endå meir om norske dialektar og trekk ved desse. Åt god middag på skulen, var ein tur innom jobb, og no driv me og pakkar kofferten og sekkane våre. For to dagar sidan kom det eit lite postkort til meg i postkassa. Kjempekoseleg å få ei lita helsing sånn no rett før påska (elles også så klart). Tusen, tusen takk til tanta mi! No gjeld det berre for meg å seie...god påske, alle saman!

19. mars 2013

Korpskonsert

Påska nærmar seg og det er så utruleg glad for! Merkar at eg treng litt pause, pause frå forelesningar der me ofte har dårleg tid. Me les eit dikt og skal skjønne det på anten ti minutt, noko som er for lite, eller så bruker me halvannan time på eit dikt me eigentleg var ferdig med for to veker sidan. Ein skal faktisk skjønne det som blir sagt, fordøye det. Det same gjeld den norrøne grammatikken; det er så altfor mykje som skal inn i hjernen på så altfor kort tid. Eg har lyst til å lære, lyst til å forstå, men når ikkje kommunikasjonen mellom studentane og læraren fungerer, er det ikkje like enkelt. Men eg har i alle fall lagt ein liten plan for lesinga i påska, så som de skjønner, blir det ikkje berre krim på meg i år ;) For min del, når eg har slike dagar som er litt tyngre enn andre, prøver eg å tenkje på noko anna, til dømes at det snart er ferie. Og så kan eg draume meg vekk ved å sjå på klede på nettet, som denne peplumtoppen (eg har jo åremålsdag snart, hint, hint). Eller sjå på gamle klede, klede frå ei anna tid, som ein ofte finn på Fretex, eller som kjolen på biletet som eg såg på Shalam brukthandel her i byen. I kveld, klokka seks, skal me i Agder Brass ha konsert saman med Randesund Skolemusikk ute på Dvergsnes skole. Ta gjerne turen innom! Vel, berre ei lita oppdatering herifrå :)

17. mars 2013

Det er kaldt ute. Snøen ligg på bakken, den er på trea, den er overalt. Men den gjer det jo lysare ute, bileta blir klarare enn å ta dei inne i eit vanleg rom. Difor tok me turen ut, trass i kulda, for å ta bilete. Ringen hans kom nemleg i går, så no har me begge to "ring på fing". Dei passar så fint saman, akkurat som oss to, som Fantomet og Sala Palmer eller som Lady og Landstrykaren ♥

16. mars 2013

SNØ!

Eg lærer aldri! No som eg faktisk, sånn heilt på ordentleg, trudde at våren var komme for å bli, byrjar det å lave ned med kvite dottar frå himmelen. Eg er så himla lei den kvite massen som berre skaper kaos og kulde! Men når det er sagt, har eg elles hatt ei veldig fin veke der eg har lært mykje om dansk, og med flinke forelesarar, gjekk det overraskande greitt å forstå det som blei sagt. Skulle gjerne hatt fleire av slike forelesarar, dei som verkeleg gir av seg sjølv, får oss studentar med og skaper engasjement. For min del kunne me godt ha hatt endå ei veke med dansk :) Trass i at snøen kom i går, blei det ein fin dag fordi eg hadde ein avtale med to av mine beste veninner her i byen. Det var altfor lenge sidan sist at me alle tre hadde vore med kvarandre, så difor var det ekstra kjekt å ha ein heil kveld på oss til å lage god mat, slappe av og berre snakke om alt mellom himmel og jord. Ein treng ein slik jentekveld i ny og ne. Denne helga her kjem til å bli roleg med litt lesing (både pensum og ikkje-pensum), får besøk av ei anna veninne i kveld og det er vel eigentleg det... Og for de som lurer: ja, det var verkeleg så grått ute i går som det de ser på biletet!

14. mars 2013

"Å lese en god bok er den største lykken på jord"

Det er så godt skildra, for det er akkurat den kjensla eg får når eg les ei god bok (sitatet i innleggstittelen: Brikt Jensen). Ei god bok kan vere rørande, den kan vere morosam, den kan vere spennande, eller kanskje er boka ei blanding slik at du den eine augneblinken ler og i det andre bit negler av spenning. Du kan gøyme deg bak ei bok, kanskje fordi du græt eller fordi du prøver å kvele ein latter. Du kan bruke ei bok til å vifte vekk ei fluge eller du kan leggje den over ansiktet når det er mykje sol ute og du vil sove litt. Det å lese gir meg mykje glede og nokre bøker drar meg inn i eit eige univers der berre eg og boka finst, berre oss og ingen andre. Nokre gongar har eg ikkje fått sove, for boka har vore så spennande at eg berre måtte lese den ferdig, då ofte krim skrive av Agatha Christie. Det har også hendt at eg har gråte meg i søvn, godt over midnatt, fordi boka var så rørande (til dømes Idas dans og Minnenes melodi) Eg har alltid likt å lese, og gjer det enno, men eg merkar det at no når eg har så mange skjønnlitterære bøker på pensumlista, går det litt for lenge mellom kvar gong eg verkeleg gleder meg til å lese. Slik som Samuel Johnson sa, så skal ein lese det ein har lyst til; det ein leser av plikt, har ein liten glede av. Nokre av bøkene på lista har vore heilt ok å lese, mens andre har eg verkeleg slitt meg gjennom. Men no, dei siste vekene, har eg endeleg fått tilbake leselysten igjen; fyrst var det Ildvitnet av Lars Kepler (på lesebrett, må få seie at det er ein eigen sjarm med papirbok, det er det aller beste) og no er det den nyaste boka til J.K. Rowling, nemleg Den tomme stolen. Det er ei fantastisk kjensle å berre kunne setje seg ned med ei god bok, ta pause frå pensumlesinga, kanskje med ein kopp kaffe i handa og eit teppe som er breidd godt over meg. Snart er jo også påska her, og då blir det i alle fall tid til litt lesing. Og for ein lesehest som meg, har eg sett meg ut ein del bøker eg gjerne vil låne på biblioteket allereie. "Jeg husker den dagen jeg kunne lese. Det har jeg aldri glemt. Jeg satt på gulvet ved siden av bokhyllen, og så kunne jeg lese. Det betød at jeg kunne velge selv." (Anne-Cath. Vestly).

12. mars 2013

Dansk uge

Seks skuletimar (forelesningstimar) på dansk har gått utruleg fort. Hadde to timar i går og fire i dag, og eg må få seie at det har gått over all forventning! Til no har me lært om dansk litteratur og litteraturhistorie dei siste femti åra; i morgon og på torsdag er det det danske språket me skal lære meir om. Forelesaren som me hadde i går og i dag, var veldig strukturert, og sjølv om eg ikkje forstod absolutt alle orda som blei sagt, var det enkelt og også kjekt å følgje med. Så får me sjå korleis det blir med den forelesaren me skal ha dei to neste dagane :) På sundag var me jo på besøk hos eit venepar, og sjølv om det var litt kaldt, fekk me grilla. Men det var for kaldt til å sitje ute, så sjølve etinga måtte me ta inne ;) Ein kjempekoseleg kveld med mykje fin prat, og eg håper det ikkje blir så altfor lenge til neste gong. Ein av tekstane som me gjekk gjennom i dag, var "Hjulet", ei novelle frå novellesamlinga Eftersøgningen og andre noveller. Ei litt artig og merkeleg novelle skrive av Peter Seeberg i 1962. Det er her eg har henta teksten som de kan lese på biletet (trykk på biletet for å få det større). Kjekk øving i går, og i kveld blir det jobb på Grim.

10. mars 2013

Draumereisemål

Eg følgjer jo nokre bloggar via bloglovin', og på fabelaktive.com er det kvar månad ei utfordring. Denne månaden er utfordringa å skrive noko, vise noko, om sitt draumereisemål. Sjølv så har eg så mange, alt fra Roma til Praha til Australia til Korfu. Eller kanskje ein tur til Tromsø (eg har ikkje vore lenger nord enn Trondheim), eller til Paris (mykje for å sjå Euro Disney, og litt for å shoppe). Og så klart står både New York og London høgt på lista på grunn av Broadway og West End. Eg er jo ein stor fan av musikalar! For litt over tre år sidan var eg jo på tur til Aust-Afrika saman med klassen min frå folkehøgskulen, og det er også land eg gjerne skulle ha besøkt igjen. Okei, ein ny tur vil jo aldri bli det same som den turen eg hadde for tre år sidan, men likevel. Me var i Kenya, Uganda og Tanzania, og dei har alle så mykje meir å by på enn det me er klar over. I tillegg hadde det ikkje gjort noko å reise endå ein tur til finaste Krakow. Men å skulle komme fram til berre eit draumereisemål, det er vanskeleg, det. Eg er kanskje ikkje den største draumaren eller den som reiser mest, men som nemnt ovanfor, er det mange stadar eg gjerne vil sjå og oppleve før det er for seint. Så konklusjonen på denne utfordringa er... MANGE! Eg har mange draumereisemål, og då gjerne saman med han eg bur i lag med, ei av mine beste veninner eller ein jentetur med mamma (sa du London?!). Det må vere ein stad der eg kan oppleve ting, gjerne historiske; ikkje berre gå rundt og sose eller berre shoppe. Eg legg difor med ein kollasj med bilete av desse reisemåla som eg har nemnt i innlegget, og dette blir då mitt bidrag med tanke på denne utfordringa. Klarar de å sjå kva bilete som er frå kva by, område eller land? Nokre av bileta har eg tatt sjølv (dei plassane eg har vore på før og som eg har lyst til å besøke igjen); dei andre er frå colourbox.com (Australia, Paris, Roma, New YorkTromsø og Praha) Elles så gjekk det veldig bra med speleoppdraget i går; me fekk til og med tatt ein tur innom skulen også denne laurdagen (etter spelinga vel og merke). Det blei ein vanleg laurdagskveld heime, og så gleder eg meg til i seinere i dag, for då skal me på grilling (viss vêret tillater det) hos eit venepar av oss :)

8. mars 2013

Vår og speleoppdrag

No blomar miniorkidéen sånn heilt på ordentleg (det er åtte dagar mellom dei to bileta), og det blomar jo også ute, så no er den her – våren! Det er lysare ute, og sola skin så mykje at det faktisk går an å gå til skulen uten å ha på ullstrømpebukse! Denne veka har vore som dei fleste veker, nemleg fylt med skule, jobb og korps. I morgon tidleg skal nokre av oss i brassbandet ut på eit lite speleoppdrag, noko me alltid er på jakt etter, både for å marknadsføre oss sjølv og også får å få inn litt til korpskassa. Speleoppdrag er jo den kjekkaste måten å gjere det på, for då får me faktisk spele og ha det gøy :) Ikkje for det; ein vanleg dugnad, som til dømes parkeringsvakt, er jo greitt og kan vere gøy det også, men det er jo spelinga me verkeleg brenn for. Og som vanleg blir det nok ein del lesing i helga; neste uke er det nemleg "dansk uge" på mitt studie, og det er ein del pensum som skal lesast til då (og det på dansk så klart). Eg tar jo nordisk språk og litteratur som siste året i bachelorgraden min, så det at me skal ha ei veke med danske forelesarar, er ein del av studiet dette semesteret. Eg trur det kan bli interessant og lærerikt. Håper berre eg greier å forstå det dei seier ;)

6. mars 2013

Noko søtt og herleg



Nokre gongar er det så lite som skal til for å gjere ein grå dag litt lysare, eller berre det å få le litt og slappe av midt i ein travel kvardag. Youtube (og også cuteoverload.com) er ei fin kjelde til å finne noko søtt, noko artig, noko å le av. Videoen over er akkurat slik. Den får meg til å le samtidig som eg sit og sukkar fordi den er så søt. I tillegg vekker den gode minne frå den gongen eg var i Afrika saman med klassen min frå folkehøgskulen. På den turen besøkte me nemleg eit senter for foreldrelause elefantungar. Ikkje at elefantungen i videoen er foreldrelaus, men den er like søt og herleg for det om :) Forelesningsfri i dag, men det betyr ikkje at eg tar meg heilt fri i frå skulearbeidet. Har fått lese ein del pensum, jobba litt meir med den norrøne grammatikken, og seinare i dag skal me rydde litt i skuffar og skap her i heimen. Ikkje fordi det er så himla rotete, men det er jo greitt å ta ein liten opprydding i ny og ne, og no er det lenge sidan sist ;)

4. mars 2013

Vårteikn

Sjå her! No har eg endeleg sett snøklokker, det eg ser på som sjølvaste Vårteiknet (nettopp med stor V). Me var ute og gjekk ein liten tur rundt om i nabolaget i går, og det var då eg fekk auge på dei – snøklokkene. Eg har alltid likt desse kvite og grøne blomane. Eg veit ikkje kvifor, men eg berre synest at dei er så utruleg fine. Kanskje er det fordi dei er så enkle?! Ved det huset mormor budde då me var små, vaks det snøklokker i fleng. Eg hugsar at me gjekk og plukka dei, satte dei i eggeglas, eller andre små glas, med vatn oppi. Satte dei på kjøkkenbordet og der sto dei til dei var visne. Gode minne! Var jo ein tur innom skulen i dag, og bortsett frå forelesning, fekk eg prata lenge med to veninner som eg ikkje hadde sett på år og dag. Kjempehyggeleg! Blir middag om ikkje så altfor lenge. Og frå halv sju til halv ti blir det korpsøving, noko eg også i dag gleder meg til :)

2. mars 2013

Nummer femhundre!

Innlegg nummer femhundre - 500! Sidan september 2009 har eg skrive her på bloggen om mitt liv slik at dei der heime på Sola (og andre som er, og har vore, interesserte) veit korleis eg har det. Det starta på folkehøgskulen ute på Bømlo, den nydelege øya, og sidan har eg berre fortsatt. Så får me sjå kor lenge eg held på ;) Har utruleg nok vore ein tur på skulen i dag. Hadde ingen oppgåve som skulle skrivast, ei heller noko spesifikt pensum som måtte lesast (det gjorde eg nemleg i går). Men eg fekk melding på mobilen i går om at dei to bøkene som eg hadde resevert no var klare til å bli henta. Og dimed tok me oss ein tur til skulen i dag. På ein heilt vanleg laurdag. Tok like godt med meg ei av pensumbøkene sånn at eg fekk gjort noko fornuftig sjølv om eg ikkje var absolutt nøydd til å gjere det i dag :) Har også fått printa ut nokre dokument, og er no klar for ein ordentleg laurdagskveld! No som våren byrjar å nærme seg, fekk eg så utruleg lyst til å gå med kjole i går; det var sol og knallblå himmel ute. Som sagt, så gjort! Og her ser de bilete av kjolen, ein herleg, rød kjole som har eit litt gammalt preg over seg. Denne kjem til å bli ein av mine favorittar – både utover våren og også når sommaren kjem :D