Dynesundag. Kaldt her i byen no, og i dag har me berre vore inne. Gjort litt husarbeid, høyrt på julemusikk, lese og slappa av under dyna som eg tok med ut i stova. Opning av astronomiutstilling var det som me på Vitenfabrikken var opptekne av fyrste halvdelen av denne veka. Gøy at den endeleg er open! Middagsbesøk og eit julebord kan også nemnast. Snøen kom torsdagsmorgon og ligg enno. Trur ikkje den ligg fram til julaftan (skal aldri seie aldri), men om ikkje anna, skaper den ei flott førjulsstemning. Nei, eg er framleis ikkje ein stor snøfan, likevel kan eg sjå det fine i den. Prøver å vere kort i dag, for no vil eg til sengs og fortsetje å lese i ei av dei kjekke bøkene eg les for tida. Håper du har hatt ei flott førjulsveke og at morgondagen blir bra. Ekte vekesoppsummering:
✦ solskinet inn i vår julepynta heim
✦ skrive og sende ut fleire julekort
✦ månelyst over ein del av byen medan eg venta på bussen
✦ ordentleg kult med ein planeterrella på jobb, som eit miniatyrnordlys
✦ bokklubbmøte over nettet med den besteste gjengen
✦ på onsdag opna me ei ny utstilling der ein mellom anna kan utforske romskipet Delta
✦ snø i Langgata som saman med vinterlysa skapte flott førjulsstemning
✦ vakker solnedgang over eit bygg rett ved Vitenfabrikken
✦ julehjarta og svanene i Breiavatnet midt i Stavanger
✦ heimelaga vegetarlasagne, mormorserviset, latter og mykje prat i lag med eit venepar tysdagskveld
✦ og ettermiddagssola over det same bygget ein annan dag
✦ har kost meg med å lese Dyrlege i spinn, tenk at me var i det området i sommar
✦ stilig med bøker som pynt på veggane på Ogna scene der me hadde julebord med jobben i går
✦ og All Things Wise and Wonderful, endå ei bok av James Herriot
✦ dynesundag med god kaffi og kjekke bøker
✦ Vintereventyret av Sarah Morgan var ei kjempeherleg julebok
Legg igjen ein fin tanke