Det byrjar å nærme seg jul

Ser at det blir litt sein sundagsliste i dag, men betre seint enn aldri ;) Trass i at eg har mått stå opp grytidleg, har dagane på jobb vore kjekke. Og eg har fått tid til både å slappe av, pynte litt til jul, lese (ha, ha, den bokhaugen blir liksom ikkje mindre) og vere med vener. I går tok me toget til Egersund der me besøkte sjølvaste julebyen. Ei god veninne var med oss i tillegg til broren min, og me hadde det kjempekoseleg med å gå rundt og prate, sjå så mykje flott handarbeid – alt frå strikk til julepynt av smijern – og berre oppleve atmosfæren. I dag var det julekakebakedag, og eg kjenner at julestemninga sakte, men sikkert snik seg innpå. Og det kan ein kanskje sjå i vekas oppsummering:

✦ lese ut Den siste striden, den sjuande og siste boka i Narnia-serien

✦ gå heim frå jobb og sjå alle dei flotte adventsstjernene i vindauga

✦ Posten sin julereklame, tenk at me har komme så langt at nissen kan vere skeiv

✦ frostdag

✦ Knut Marius Djupvik som song Ylvis-songen "Jan Egeland" på Beat for beat

✦ "Top 10 Musical Moments in Christmas Movies" – her finn du Love Actually og White Christmas

✦ julekakebakedag med broremann

✦ kontrasten mellom det brune haustlauvet og den vinterkvite snøen

✦ Gaute Heivoll har nok ein gong skrive ei knakande god bok

✦ Rey er ein bitteliten og kjempeskjønn geitekilling

✦ ei heilt magisk lys over Hafrsfjord ein ettermiddag

✦ få noko trollhassel av ein kollega og pynte den med juletrepynt

✦ ta toget til julebyen Egersund og vere der nokre timar i lag med fine folk

✦ enkel og flott novemberbukett inne hos finaste Ida

✦ ete middag heime hos eit venepar, og i same slengen pynte deira juletree

✦ pynta forresten også juletreet på jobb medan me høyrde på julemusikk

✦ sykle forbi eit lite kor som song julesongar utanfor ei blokk

✦ og sykle forbi køen på motorvegen, like stas kvar gong det skjer

✦ små elefantar er så utruleg leikne og morosamme å sjå på

✦ lese den herlege Tre små venner av Kjell Aukrust

✦ Herman Flesvig og alle dei rollene han speler i Førstegangstjenesten, eg har ledd høgt!

✦ Alma Pöysti speler Mummitrollets mamma med ein varme og briljanse i filmen om Janssons liv