Litt av det eine og litt av det andre den fyrste veka i april

Bursdagshelg, orkesterhelg, ei helg der eg har vore grasenkje. Han har nemleg vore i Trondheim på NM for janitsjarkorps. Skulle så klart ønskje at me kunne ha feira dagen min saman, men slik er det av og til. Korpset han speler i tok andre plass og gruppepris i fyrste divisjon, og speler difor i eliten neste år. Og jaggu meg fekk dei Komponistforeningens heiderspris! Stor stas! På jobb denne veka gjekk dei to fyrste dagane med til å telje varer (gjett om me blei leie etter kvart), og elles har det gått slag i slag med all slags moglege oppgåver. På torsdag opnar hallen og me kjem til å ha opent alle dagar i heile påska. Full trøkk. Helga starta med bursdag og kafébesøk og sidan me skal ha konsert i kveld, har det vore øving med orkesteret i går og det blir ei miniøving før konserten seinare i dag. Dagane før påska kjem til å fyke av garde, men fyrst kjem denne vekas kjekke punktliste:

✦ konsert med orkesteret med Fauré og Schubert på programmet
✦ kult å sjå bilete frå Hopewell Rocks under ein episode av QI
✦ god latte og kjekk prat på Ostehuset med ei veninne etter jobb på fredag
✦ gå ute i finvêret etter orkesterøvinga i går og vere litt meir med ho veninna mi
✦ herlege vinterbilete inne hos Niina, ho er så god på å fange stemninga
✦ fontena i Breiavatnet er på for vår- og sommarsesongen
✦ sykle heim frå jobb på bursdagen min i solskin, nærmare tjue gradar og lukta av grillmat
✦ måtte le då eg høyrde temaet og teksten frå Pokémon på Beat for beat
✦ koser meg med bloggen Et katteliv, her med eit innlegg om bruktfunn og eit om førre månad
✦ to bilete av den heilt nydelege soloppgangen eg såg på måndag, den fyrste dagen i april
✦ heimelaga latte og kritikarrost krim: Vuggesang (bra bok sjølv om slutten ikkje nådde heilt opp)
✦ og ein kosekrim, nemleg The Sleeping Lady, som eg las ut på ein dag
✦ "Top 10 Disney Moments That Made Us Ugly Cry" – tenkjer særskilt på dei fyrste minutta av Up
✦ har ikkje smakt på den endå, men fekk grøn bringebærte i ein finfin Mummi-boks til bursdagen
✦ apropos bursdagen: fekk også gåvekort på spa og mange flotte og kjekke helsingar
✦ opptak av "Nessun Dorma" med The Three Tenors – ein heilt eigen klasse
✦ vareteljing, kanskje ikkje like kjekt medan det stod på, men eg diggar jo å skape orden og system
✦ me likte veldig godt Bohemian Rhapsody sjølv om ikkje alt var portrettert riktig
✦ framleis setje av ein del tid til lesing