Det siste av september og det fyrste av oktober

Personalsamling med heile Jærmuseet, soloppgangar, mykje rydding på jobb kvar dag sidan det har vore mange barnehagar innom, kjekke bøker, krøllebøllepassar ei heil helg, godt og blanda altså. Nesten som om eg kvar veke sliter med å oppsummere dei siste sju dagane, for det skjer noko nytt kvar einaste dag. Men sjølv om timane fyk av garde på jobb, kjem eg som oftast heim halv fem og har dimed heile kvelden til å lese eller berre høyre på roleg musikk. Joda, eg merkar at det byrjar å bli mørkare om morgonane og at det er litt tyngre å stå opp, men eg kjenner at eg likevel har hakket meir energi med ein meir stabil døgnrytme. Det kjekkaste denne veka, var å passe hunden til tanta mi heile helga – søte og fine Balto – du er hjarteleg velkommen tilbake! Mykje anna er det også:

 

✦ spennande bok frå Clare Mackintosh, kaffi og noko søtt attåt

✦ ei kjempegod veninne som var innom kaféen på jobb, superkoseleg med prat over ein kaffi 

✦ Haru, den bittelille pusen, sjarmerer oss i senk

✦ prate om strikking og musikalar med ein kollega på jobb

✦ vegetartaco og fyrste halvdel av Ringenes herre: To tårn

✦ diggar Olivia Colman, og dette tabbeklippet frå Heartstopper er berre så herleg

✦ at ein frå administrasjonen på Jærmuseet hadde med seg ein søt kvalp på personalsamlinga

✦ laurdags- og sundagstur med krøllebølle

✦ sky på sky på sky (eller: sett i kaleidoskopet på Abelloftet på jobb)

✦ endå såpass med lys om morgonane at eg kan lese på togstasjonen

✦ Trekronå, ser ordentleg kult ut å bu her ei natt

✦ skuggespel på eit fargerikt teppe på jobb og ein glasvegg full av klinkekuler

✦ likte godt den skeive YA-boka Ophelia After All

✦ knallblå hortensia utanfor den nye bustaden til broremann 

✦ ostekake med pasjonsfrukt, denne kaka må eg prøve å lage ein gong 

✦ ete ute på restaurant før orkesterøvinga, finfin kvardagsdate

✦ besøke Garborgheimen (og sjå bestefarsklokka) då me var på personalsamling på måndag

✦ raude haustblad på bakken

✦ intervju med Maud Angelica Behn om psykisk helse og det å vere seg sjølv 

✦ brukskunstutstilling og utsal på Frida Hansens hus no i helga, flotte gåver og bra handverk

✦ kose meg den fyrste episoden av ein ny sesong med Eventyrlig oppussing, jaggu meg frå Jæren

✦ alle dei nydelege soloppgangane eg har fått oppleve desse morgonane