3. jun. 2018

Sommarkjole, sommarvêr og (nesten) tilbake til kvardagen

Alltid litt rart å komme heim igjen etter å ha vore borte over ein lengre periode. Rart på ein god måte, for det er ikkje utan grunn at det heiter "borte bra, men heime best". Heimreisa blei nesten to timar lengre sidan siste flyet var forseinka på grunn av tåke. Men, men, det var heldigvis aldri snakk om å miste eit fly eller at det skulle bli heilt kansellert. Hadde nokre fine siste dagar i Moncton med tur i skogen, restaurantbesøk, lesing ute i sola, avslapping og hygge med den finaste. Ikkje fullt så gøy å seie "ha det" på torsdagen, men det er no berre tre veker til han kjem heim, så eg skal ikkje klage. Helga har gått i eitt, eller dagen i går gjorde i alle fall det med jobb og selskap rett etterpå (var ikkje heime før halv eitt, så det seier vel sitt...). I dag har eg gjort veldig lite, vore ein tur ute på balkongen, lese i ei bok, prøvd å senke skuldrene, for det var ein litt pang-start på kvardagen ;) Men no er eg klar til å byrje på ei ordentleg jobbveke, vil berre dele sundagslista fyrst:

✦ gå til jobb i raude sko, sommarkjole og bare leggar på det sommargrøne graset
✦ og etter jobb: feire ei veninne som snart skal ha barn i flott vêr og herleg selskap
✦ sesongavslutninga av Endeavour, for den serien er så bra og eg elskar jo britisk krim
✦ tur i Irishtown Nature Park med bok, fuglar som kvitra, fine stiar og ei hand å halde i
✦ lese ut bok nr. to i krimserien om Vera Stanhope: Telling Tales
✦ det lille flyet som eg såg på golvet på flyplassen i Moncton
✦ lese ute på balkongen i strålande sol no i dag
✦ sjå og tenkje tilbake på alt me opplevde i løpet av vekene på ferie
✦ blomar på trea dei siste dagane i mai
✦ ler nok ein gong av Crosswalk the Musical, og no er det The Sound of Music
✦ takksam for at eg slapp unna den verste jetlagen
✦ siste episoden av thrillerserien The Americans – ei verdig avslutning på ein knallgod serie
✦ ein siste tur ut i sola på campus i Moncton med ei bok i fanget
✦ sove i eiga seng igjen
✦ fortsetje å følgje seglturen inne på Havelle
✦ ferie bryllaupsdagen med restaurantbesøk og etterpå eit glas vin og stearinlys i leilegheita
✦ etter å ha gitt mannen min eit bittelite hint, fekk eg den finaste boka i bryllaupsdagsgåve

Legg igjen ein fin tanke