For nærmare fire år sidan gav Laurence Fox ut sitt fyrste album Holding Patterns (meir om det her). No er han ute med eit nytt album, nemleg A Grief Observed. Eg har allereie lenkja til musikkvideoen "The Distance" – ein av songane som er med på albumet – i ei sundagsliste, men eg legg no ved videoen direkte i innlegget likevel slik at du får ein smakebit. Det byrjar å bli ein god del år sidan eg fyrste gong høyrde Fox syngje, men stemma hans er framleis like særeigen og nydeleg. A Grief Observed blei til då han gjekk gjennom ei tung tid, og i omslagsheftet skriv han sjølv at det no er rart å lese tekstene sidan han er forbi den tida. Det er ei nerve i både melodiane og tekstene som eg trur kan treffe mange av oss. Alltid like vanskeleg å plukke ut ein særskilt favoritt, men "The Distance" og "You Don't Know What I Need" er to songar som eg ønskjer å nemne. Eg kjøpte albumet fysisk for å kunne ha ståande i hylla, og eg klagar ikkje når CD-en i tillegg er signert. Så i desember blir det nok ikkje berre julemusikk her hos oss. Eit lite måndagstips frå meg til deg.
Legg igjen ein fin tanke