Kontrast: før og etter

I byrjinga då eg fann ut at det fyrste Monthly Makers-temaet i år skulle vere kontrast, hadde eg få idéar til kva eg kunne lage. Kontrast kan jo vere så mangt, men det som slo meg fyrst var fargekontrastar, svart-kvitt og liknande. Eg ville likevel gi det ein sjanse. Leita litt gjennom Pinterest-tavlene mine då eg kom over denne. Fann ut at det er jo ein kontrast; kvite, kjedelege konvoluttar blir til kule på ein-to-tre. Laga fyrst ein mal (eller to for å vere nøyaktig, ein stor og ein mindre fordi eg hadde to forskjellige storleikar på konvoluttane), og malen bør vere noko mindre enn sjølve konvolutten. Fram med dei fargerike magasinsidene som eg har tatt vare på nettopp til slike prosjekt, klippa ut etter malen og fekk dei nedi konvoluttane. Tok på litt lim slik at dei sat betre og...ferdig. Stor kontrast mellom før (kjedeleg) og etter (stilig), og sjølv om dei fleste konvoluttane blir rive opp, er det kjekt å sende av garde noko meir enn ein vanleg, kvit konvolutt.

Og då eg fyrst var i gong, kom eg over endå eit bilete eg hadde lagra på Pinterest, nemleg eit syltetøyglas med slipte glasbrot og led-lys. Her er også kontrasten på før og etter. Dei aller fleste tenkjer nok at slike glasbrot er søppel, dei er ikkje noko å samle på, ein kan ikkje bruke dei til noko spesielt. Den gong ei ;) Til jul fekk eg brente mandlar på glas av ei veninne, og det glaset kom no til bruk. La oppi mange av glasbrota, fann fram ei lita lenkje med led-lys, fekk på lokket og snudde glaset på hovudet. Skal innrømme at det ikkje gir så veldigg mykje lys, men ei lita, varm stemning gir det jo, og så var det gøy å prøve det ut. Mine to små bidrag i årets fyrste Monthly Makers-tema :)