Nyttårsaftan heime i sofaen

Klagar ikkje på ein roleg nyttårsaftan, det skal eg ærleg innrømme. Det er kjempekoseleg å feire inngangen til det nye året i lag med andre, men etter ein travel desember med mykje jobb (fire laurdagar på rad!), kjenner eg at ein kveld med pysjbukse, gammal film og ein god middag i lag med mannen min, er akkurat det eg treng. Hadde min siste dag på Norli i går sidan dette var eit engasjement ut desember månad, og eg veit lite kva som skjer vidare. Eg vel å halde motet oppe sjølv om det så klart kjem kjipe dagar innimellom. Måndag og tysdag var dagar fylt med lesing, avslapping, middag og brettspel i lag med familien. Sidan har det gått i eitt på jobb med bytting av gåver, rydde bort ein del av julebøkene og prising av nye varer. Mesteparten av denne sundagen har gått med til lesing, men ein liten tur ut for å "lofta vedet" blei det tid til. Nyleg åt me kalkun til middag, no er det film på skjermen og ein god armkrok, rett og slett ei finfin nyttårsaftan etter min smak. Årets siste sundagsliste er lasta full av romjulsstemning og andre små gleder:

 

✦ ullsokkeduoen slår til igjen – takk for det gamle og godt nytt år! 

✦ glaspynten som heng i kjøkkenvindauget no når det er jul, framleis eit veldig fint bruktfunn

✦ Zalo var veldig med no i jula

✦ julepynta vindauge hos ein skomakar midt i byen

✦ passar bra no på nyttårsaftan: ein liten video full av kule lysteikningar

✦ setje meg ned og sjå fjorårets julespesial av All Creatures Great and Small

✦ og ja, tårene fall og eg kjente at eg til neste år skal lese dei neste bøkene skrivne av James Herriot

✦ koseleg å lese i fleire julebiletebøker

✦ å ha nisselue på jobb ein av dagane

✦ helse på ein miniatyrhest på vår lille sundagstur

✦ å lese Christmas at Carly's Cupcake, nummer to i denne serien av Jessica Redland

✦ veit eg har delt fleire liknande videosnuttar, men Bami og Dami er berre så innmari søte

✦ alltid artig når Tore Renberg stikk innom Norli

✦ julebok med hint av både musikk og kjærleik: A Concert for Christmas var herleg lesing 

✦ brettspel, gode middagar og fine folk både måndag og tysdag

✦ når me snakkar om julespesial: herleg å setje på denne Beat for beat-episoden ein kveld etter jobb
✦ litt for melodramatisk for min del, men likevel kjekt å lese The Christmas Love Letters

✦ morosam selfie på tur den aller siste dagen i 2023 

✦ årets siste film: For Me and My Gal frå 1942 med Judy Garland og Gene Kelly

✦ rørande å sjå Glen Hansard og fleire andre syngje "Fairytale of New York" i MacGowans gravferd

✦ mi nye julekule og det vakraste juleheftet Juleroser

✦ blåtime og vinterlys ved Sølvberget

✦ Ingvild H. Rishøis Stargate er ein hjarteskjerande og varm julefortelling

Zalo i siget!

Jul med gul og kul fugl. For Zalo var verkeleg med no i juledagane, til dømes då me skulle ete frukost juledagsmorgon. Han stod på kjøkkenbenken og ville smake på det varme brødet og blei me oss ut i stova då me sette oss til rette for å ete frukosten. Varm skive med eggerøre var visst ganske så snadder! Pappa er framleis favorittepersonen, og når Zalo ikkje får sitje på hovudet hans, er det til dømes ein mobil som gjeld. Ein liten raring er du, Zalo – ein raring som også er ganske kul!

Så klart ville også Zalo smake på julekakene og krumkake viste seg å vere det aller beste. Måtte le då han også prøvde å opne ein Twist. Han fekk det ikkje heilt til, men han skal ha for forsøket, tihi!

Eit julehefte og fire julebiletebøker

I løpet av romjula, har eg fått lese fleire små julehistorier i tillegg til julebøker. Juleheftet Juleroser er like vakkert i år som i fjor (og åra før) med tekstar frå mellom anna Gaute Heivoll, Randi Fuglehaug og Helge Rode. Fleire nydeleg illustrasjonar er det også, og då eg skulle ta bilete av heftet, passa den nye Snøfall-julekula mi heilt ypperleg som eit lite lys i mørketida. Eg fekk nemleg ei slik julekule til jul, og det er ordentleg romjulshygge i å blåse på den og sjå den lyse opp heile rommet.

To norske klassikarar når ein tenkjer jul, er Snekker Andersen og Julenissen av Alf Prøysen, illustrert av Hans Normann Dahl, og så klart Reisen til julestjernen av Sverre Brandt. I sistnemne er det Oliver Neerland som har måla omslaget og bileta inni boka. Snekker Andersen og Julenissen er rett og slett ein akkurat passe søt og koseleg forteljing medan Reisen til julestjernen er noko meir skummel med den onde greven og heksa. Boka er litt annleis enn filmen, men det var no likevel litt artig å lese den i bokform, og tenk – det er nesten hundre år sidan den kom ut fyrste gong!

Canada og England har eg besøkt i dei to siste biletebøkene. Forfattar Kallie George har i lag med illustratør Geneviève Godbout laga ei herleg, lita forteljing om Anne Shirley. Eller "Anne with an E" som ho så ofte seier ;) Teksten er kanskje litt enkel, men eg berre elskar Godbouts illustrasjonar. Og så James Herriot. No har jo sesong fire av All Creatures Great and Small nyleg komme på NRK Nett-TV, og eg gleder meg til å etter kvart sjå den sesongen. The Christmas Day Kitten var ei ordentleg søt dyrehistorie i julehøgtida, og eg har heldigvis fleire Herriot bøker i bokhylla mi.

Glimt frå våre juledagar

Klokka åtte i dag tidleg var eg på plass på jobb. Berre tre dagar ferie denne jula, men det er slik det er av og til. Om ikkje anna hadde me nokre avslappande dagar heime på Sola i lag med familien før me drog heim i går. Lille julaftan åt me graut (broremann fann mandelen) og pynta treet. Mummi-julekula og den der rarsøte ugla måtte jo vere med på treet. Drog heim om kvelden og starta julaftan heime under dyna i lag med mannen min, kvar vår bok, kaffi og ein liten julekake. Askepott fekk prinsen og Sonja fann vegen til julestjerna i år også. Utpå dagen var det på med julekjolen, inspirert av kjolen Ali MacGraw hadde i filmen Love Story, henta broren min og køyrde saman til Sola.

Bordet var julepynta, mellom anna med nokre knallflotte smellbonbonar frå Morris & Co, og nokre kjempesøte nisselys. I år var julemiddagen kalkun, ein ny variant for vår del, men det var i alle fall noko alle likte i staden for å lage både ribbe og pinnekjøt. Desserten var derimot den same: risgraut. Med heimelaga bringebærsaus, nam! Zalo og Balto var også med på feiringa, fyrstnemnde ofte høgt oppe for å ha oversikta, og det var artig å sjå kor gira Balto var på å opne si eiga gåve.    

Kaffi frå eit nesten hundre år gammalt servise og den finaste juleduken. Eit fat med julekaker og nokre timar med gåveopning. Eg kan ikkje anna enn å seie at me er heldige. Heldige som har mat og varme, som har kvarandre, som har moglegheit til å gi. Takksam. Og smiler av Balto som var pynta med raud julesløyfe og ler av alt det rare som blei teikna då me spelte "Ryktet går" ein av dagane. Juledagsmorgon var treig med lesing før frukosten, og der var det jaggu meg noko for alle og ein kvar. Tihi, Zalo ville også ha frukost og nåtte prøvesmake det varme brødet. Nok ein roleg dag i går før me åt god middag og spelte spel i lag med familien min, pantertante og hennar kjæraste på Bogafjell. Ny jobbdag i morgon, dette var små glimt frå vår julefeiring her på Sørvestlandet.

24. desember og ei sundagsliste

Sundagslista denne veka er skriven tidlegare i dag (faktisk medan eg sat og såg på Tre nøtter til Askepott), for i kveld er det julaftan. Den blir feira heima på Sola med nærmaste familie, utan mykje bruk av skjerm ;) Altså, dagane denne veka har verkeleg flydd av garde med travle dagar på jobb, fredag var det utruleg mange innom for å kjøpe dei siste julegåvene (hihi, alle dei som ikkje stakk innom torsdag på grunn av uvêret, stakk heller innom på fredag), julekonsert og pynting av treet i går ettermiddag. I dag starta me dagen roleg med fire tente lys, kvar vår bok og noko attåt kaffien. Me er heldige, eg veit det. Tankane går til dei som står midt i vonde dagar, ei vond tid. Ta vare på kvarandre, lag deg ein så mjuk høgtid som du kan med gjengen din. Dette var mi veke:

 

✦ Göran Tunströms Juleoratoriet er jo ein klassikar

✦ pakke inn dei siste gåvene medan eg såg Love Actually (for den filmen høyrer jula til)

✦ travle og kjekke dagar på jobb

✦ å, denne kattungen som helsar på ein liten kylling 

✦ Adam Douglas sin julekonsert var ei kjempekjekk oppleving

✦ og gøy å ha på meg ein kongeblå kjole på konserten

✦ "My Happy Place" frå Markéta Irglová, denne julesongen er som balsam for sjela

✦ gå forbi eit stor, nesten skummelt tre – i alle fall skummelt når det er mørkt og stormfullt ute

✦ koseleg å sjå Nissens postkasse midt i byen

✦ lese juleboka The Geek Who Saved Christmas

✦ Tore Renberg som kom Norli fleire timar på fredag for å signere Lungeflyteprøven 

✦ stor, lysande julekran på Stavanger storsenter, fint når morgonane er mørke

✦ likte godt denne versjonen av "Carol of the Bells" på strengeinstrumentet dulcimer

✦ kult at dei nemner terrellaen i Snøfall 2

✦ må le av kulaste Zalo: julekakesmaking, og krumkake var den alle beste!

✦ søt julepynt då me pynta treet på Sola i går kveld

✦ pus i farta då eg gjekk til jobb på tysdag

✦ veit eg deler mange liknande videoar, men hallo, Bami og Dami er dei aller, aller søtaste

✦ starte julaftan under dyna, drikke dagens andre kopp med kaffi, ei lita kransekakestong og bok

✦ siste bok i årets lesemål (å lese ei diktsamling kvar månad): Gave av Gro Dahle

✦ lite dryss av snø medan eg venta på bussen mo morgonen i går
✦ Christmas Wishes at the Chocolate Shop, for ei herleg julebok (den fyrste i Castle Street-serien)

Ikkje berre grå jul

Leita ei stund etter den perfekte plassen der me kunne ta årets julekortbilete, for i tankane mine ville eg at det skulle vere mykje fargar. Me treng ein sterk fargepalett om hausten og vinteren. Stavanger har mange bygg rundt omkring som er dekka av gatekunst, både med konkrete motiv og meir abstrakt kunst, og berre ein liten køyretur unna fann me denne veggen. Synest i alle fall sjølv det blei ganske stilig! Om litt får me sjå om prinsen får sin Askepott og om Sonja kan finne vegen til julestjerna. Akkurat no er det kaffi og litt lesing, ein passe roleg start på julaftan. Seinare blir det julefeiring på Sola, og i kvar vår heimestrikka ullgenser, vil me ønskje alle ei riktig fin jul ♥︎

Ein "amerikansk" julekonsert 🎤

I fjor var det Bugge Wesseltofts It's Snowing on My Piano som blei årets julekonsert for vår del, i år blei det An American Holiday med Adam Douglas. To veldig forskjellige konsertar, men begge to har i alle fall gitt med julestemning. Rett og slett ein kjembera konsert i går, "Winter Song" er ein storvfavoritt (ja, det kom nokre tårer) og det var gøy å høyre Ida Jenshus og Adam Douglas syngje i lag. Og kongeblå kjole er alltid ein vinnar, eller kva?! ;) Sjølv om det har gått i iett på jobb i dag og eg skal jobbe halve morgondagen, er skuldrene eigentleg ganske senka. Ute på bakken ligg det eit bittelite lag med snø, her inne sit me og høyrer på julemusikk. Fredag og bittelille julaftan.

Lysande bysentrum

Stavanger sentrum no i desember, heilt enkel kvardagsglede. Lys og vinterstemning over heile byen, og det gjer ingenting å måtte vente ti minuttar før eg kjem meg inn på jobb. Plassen foran biblioteket med lyslenkjer på det store treet, eit ordentleg Skomaker Andersen-vindauge hos Byens Skomaker (til og med tubaen får vere med) og alle dei koselege skilta med titlar henta frå Stavanger-historiene til Ajax. "Håler i himmelen", "Di små armane" og "Englar på tage" er berre nokre av historiene, mange av dei høyrde me på lydbok som adventskalender for fem år sidan. Og så Fargegaten med sitt teppe av fleirfarga lys rett over hovudet, byen blir liksom litt ekstra lun og koseleg.