Siste arbeidsveke på Vitenfabrikken

Avslutning på jobb på måndag, var heime hos ho eine frå jobb på tysdag i lag med tre andre (kjempekjekke folk som inviterte til ein miniavslutningskveld), og sidan siste jobbdag på fredag. Rart det der, kor fort tida har gått. Akkurat no er ting litt i det blå, eg har ikkje landa heilt enno og det heile er uvant. Men det er no sommar og eg skal prøve å senke skuldrene. I alle fall innimellom. Til dømes var eg ute og åt på Døgnvill i lag med mannen min og broremann på torsdag, og etterpå såg me Asteroid City, den nyaste Wes Anderson-filmen, på kino. For ein fest av ein film! Og i går blei det laurdagstaco heime på Sola i lag med mamma, pappa, broremann, pantertante, onkel og kjærasten hans. Balto og Zalo var jo også med så klart ;) Sundagen har vore roleg, kjente at eg var litt gåen i hovudet. Strikking med eit favorittgarn, prøvde å planleggje ein ferie, kaffi og balkonglesing. Før me legg oss, vil eg lese litt meir, så her kjem ein haug med bra saker frå siste veke i juni:

✦ den var litt sukkersøt, men eg likte Bokhandelen ved bredden av Themsen (bøker om bøker, altså)

✦ alltid gøy å høyre "Superstar" frå den kulaste musikalen på radioen om morgonen

✦ blå Marimekko-serviettar, god mat, mykje latter og prat i lag med nokre herlege folk frå jobb

✦ eit siste Tesla coil-show 

✦ å, finaste Jonna og videoane hennar

✦ fargerike LEGO-blomar hos ho veninna mi eg var heime hos på tysdag

✦ fleire prideflagg som nokon hadde laga på LEGO-veggen, blir varm om hjartet av sånt

✦ stilig retro sykkelreklame i den nyopna Øglænd-utstillinga på Vitenfabrikken

✦ og apropos sykkel og Øglænd: her er ei sak om DBS og ein el-sykkel frå 1998

✦ avslutning på jobb der det blei både kake og blomar

✦ sundagskjensle med bok, kaffi og chilisjokolade frå Lysefjorden sjokolade 

✦ søtaste hunden som prøver å vekkje ein gjeng skjønne kattungar

✦ skuggespel inne på kjøkkenet om morgonane

✦ boka A Little Bit Country av Brian D. Kennedy var akkurat passe søt om musikk og skeiv kjærleik 

✦ fleire gode filmtips i samband med juni og pridemånaden

✦ gurimalla, eg storkoste meg då me torsdagskveld såg Asteroid City på kino! 

✦ moro å fortsetje å sjå den fyrste sesongen av Good Omens medan me venter på andre sesong

✦ strikke vidare på ein kjekk topp

✦ brasskoralen frå Mahlers andre symfoni, femte sats, er berre utruleg vakker – høyr her og her

✦ gul sommarkjole i det grøne graset

✦ laurdagstaco heime hos mamma og pappa i lag med fleire andre fine folk

✦ diktsamlinga Hus med sjel og soge er ei nydeleg og litt trist bok om forlatte hus og minne