12. feb. 2016

Eit heilt nytt soverom!

Dette blir det store oppussingsinnlegget her på bloggen, for sjølv om det berre var eitt rom me pussa opp i haust, var det nok å gjere før me var heilt nøgde. Skrudde senga frå kvarandre, rydda rommet for nattbord og anna stæsj og byrja prosjektet med å måle heile rommet (dvs. tre veggar; me måla ikkje den veggen der garderobeskapa står). Fargen me brukte var Sans frå Jotun, og om de lurer, så er det den fargen som er mørkest på biletet ovanfor :) Ein litt varm og herleg lun farge.


Gløymde så klart å ta bilete av heile rommet før me byrja å måle det, men ein får no eit lite inntrykk, i alle fall av den eine veggen. Som ein kan sjå, hadde me gjort veldig lite før me flytta inn: me hadde hengt opp eit bilete og elles ei enkel snor over senga med nokre små bilete, kort og illustrasjonar. Ikkje noko fancy, og me mangla til og med nokre gardiner. For sidan det var ei rullegardin der frå før, blei gardiner til soverommet vårt nedprioritert i fyrste omgang.


Etter å ha måla rommet to strøk med Sans, var det på tide å ta fram meir maskeringsteip og ei ny bøtte med måling. Eg trur fargen me brukte heiter Marrakesh. Me hadde nemleg bestemt oss for å lage nokre store trekantar på den eine veggen. Og så må eg berre beklage at ein del av bileta er litt mørke – er neimen ikkje berre berre å ta bilete inne i eit lite rom når det er så himla mørkt ute.


Og ikkje nok med Marrakeshfargen; me skulle ha ein tredje farge, nemleg ein farge som liknar mosegrøn. Denne fekk me blanda på målarbutikken, så den har ikkje eit namn, berre eit nummer som eg ikkje hugsar i farten. Sånn som dette såg veggen ut etter det fyrste strøket med grønfargen.


I same slengen som me tok soverommet, ville me også gjere noko med senga vår. Den har me arva frå svigers, og sjølv om den er god, var me begge lei den gulaktige furufargen. Me brukte lakkfjernar og pussa med pussemaskin for harde livet før mannen til slutt beisa senga i ein grønfarga beislakk.


Kanskje litt mange bilete i eit og same innlegg, men no er eg ferdig. Dei siste bileta viser sluttresultatet. Okei, me treng nokre fleire bilete på veggane, men sånn bortsett frå det er soverommet no endeleg ferdig. Veldig nøgd med jobben og korleis det heile blei til slutt, og eg tror nok det me begge to er mest nøgde med, er veggen med dei store og kule trekantane på!

6 fine tankar - legg igjen noko fint du også

Røverdatter sa...

Så tøft det ble! :D Det er alltid digg med oppussing. Litt nytt liv i rommet :)

Silje sa...

Tusen takk! :D Ja, eg er så einig! Oppussing kan gjere eit rom til eit heilt anna, og som du seier så blir det litt nytt liv, noko friskt og annleis :)

Luisa Fernanda del Mar sa...

Så utrolig stilig det ble!

Silje sa...

Me synest også det kan du tru ;) Tusen takk, Luisa! :D

Sandra sa...

Men wow, så fint det blev! Underbart med lite färg :)

Silje sa...

Vi var lei helt hvite vegger, så det gjorde godt med litt mer farge på veggene :) Tusen takk for kjekk kommentar, Sandra! :D

Legg igjen ein fin tanke