Jørpelandsholmen i påska og Vannassen i går

Sauane ute på Jørpelandsholmen er like raggete og kule år etter år. Det var framleis litt tidleg å sjå etter lam då me gjekk der på langfredag, men dei store låg der og var stilige. Tok ikkje så mange bilete der ute, det viktigaste var å komme oss ut og bevege på oss etter fleire dagar med gråvêr og inneaktivitetar. Knipsa denne skumle figuren før me traska til bilen og kom oss tilbake til hytta.

 

Ingen langtur på oss i går sjølv om sola skein. Eg kom meg no i alle fall ut til Vannassen. Himmelen var blå, sola lyste slik at det visne lauvet blei gyllent og svanene laga show der dei jaga etter kvarandre. Om dei ikkje er grasiøse i lufta, er dei ganske så grasiøse når dei landar ;) Fint å sykle til jobben i dag tidleg, med andre ord ein bra start på veka sjølv om eg måtte opp halv seks.

Flotte blomar, bursdagskake, aprilsnø og fleire fridagar

Bursdag på måndag, berre to dagar på jobb og resten av veka fri. Ganske kort oppsummert, men eg ønskjer jo å skrive litt meir. Også me fekk snø denne veka, noko i alle fall eg ikkje var så glad for. All snø er borte no og eg håper verkeleg at me ikkje får meir før det nærmar seg jul. Bursdagen blei feira veldig roleg, dagane på jobb var heilt greie og elles har det blitt mykje lesing og strikking, akkurat slik eg skreiv på fredag. På torsdag var eg ute på Wiig gartneri saman med eit venepar. Gjorde godt å vere litt sosial, for det er neimen meg ikkje mange me treff for tida. Ein ordentleg sundagstur blei det ikkje denne gongen, men eg var ute rundt Vannassen ein liten tur for å kjenne sola varme. I morgon er det morgonskiftet, og det blir difor ikkje særskilt seint før me legg oss i kveld. Som vanleg har eg fleire fine saker å dele i ei sundagsliste, dette har gleda meg denne veka:

✦ bursdagskake og mange kjekke bursdagshelsingar

✦ Superstore-finalen, ei fin og verdig avslutning på denne herlege serien

✦ "The sound effects teachers make" – ha, ha, her var det mange artige og gjenkjennbare lydar

✦ fascinerande å lese En flyktig frihet om Joannas oppleving av å gå Santiago de Compostela

✦ at me plutseleg fann Bruckners fjerde symfoni på Hovedscenen

✦ bruke fridagane mine på å lese i kjekke bøker og strikking

✦ få god hjelp til å fikse den toppen som eg held på å strikke, for den blei altfor lang

✦ digitalt intervju av forfattaren Douglas Stuart i regi av Litteraturhuset i Bergen

✦ Kompani Lauritzen er laurdagens høgdepunkt

✦ liten cappucino og to makronar ute på gartneriet i lag med fine folk

✦ musikalen Kristina frå Duvemåla ute på Bømlo – trur eg må tinge billettar med ein gong

✦ og når me snakkar om musikalar: tenk at den besteste Rent er 25 år i år!

✦ mannen min som fiksa heimelaga pasta carbonara på bursdagen min

✦ Loulou og Coco er venar med alle moglege dyr, dei er så søte

✦ svaneshow på Vannassen i dag

✦ påskeinnlegget til Synne, her var det mykje koseleg

✦ When All Is Said om fem skåler, fem personar, eitt liv – ei sakte og nydeleg bok

✦ Ingunn sin post på Instagram om det å prioritere seg sjølv

✦ å verkeleg kose meg med Mord i paradis og Michael Palins mimreserie (Sahara-episoden)

✦ stilig celloversjon av "Heaven on Their Minds" frå kulaste Jesus Christ Superstar

✦ alle dei fargerike blomane ute på Wiig Gartneri, eit par av dei likna nattehimmelen

✦ tihi, denne lille flodhesten er veldig glad i å bade

✦ spele "Takenoko" på bursdagen min, eller panda-spelet som me berre kallar det ;)

Rett ved hytta og hygge i solveggen

Er det no eg skal syngje "det snør, det snør, tiddelibom"?! For det gjer det faktisk! Og eg som trudde det var vår. Heldigvis hadde eg fri i dag og har kost meg inne med lesing, Mord i paradis og strikking. Då me drog opp til hytta for akkurat to veker sidan, var det ikkje snø, men det var tåke og regn. Om ikkje anna var det koseleg med eit lite besøk rett utanfor hytta – det er nemleg ikkje ofte me ser ender så høgt oppe på fjellet. Ein av dagane var eg ute og traska ein liten tur. Regndropar store som klinkekuler og tjukk, grøn mose på greinene. Lukta ute når det nettopp har regna.

Sola titta no fram i løpet av påskeveka, og særskilt påskeaftan. Me sat ute i solveggen og las i kvar vår bok. Drakk kaffi frå ein finfin hyttekopp ("Livet er best på hytta") og såg ein brennande solnedgang bak hytta. På terrassen såg eg plutseleg ein liten, lilla stemorsblome full av bittesmå regndropar, slike små gleder er alltid like velkomne. Nokon spelte kort og slappa av, akkurat slik ein gjer når det er påskeferie. Som dei fleste helgene no for tida, har me få planar for dei to neste dagane. Satsar på å gå ein tur, sjå ein god film og lese i eit par bøker. Lag deg ei bra helg!

To ypperlege påskekrimbøker

Krimbøker les eg fleire av gjennom året, men det blir alltid litt ekstra fokus på denne sjangeren i påska. Nyleg har eg lese ut Romy Haumanns debutroman Elskede barn og Harbour Street, den sjette boka i Vera-serien av Ann Cleeves. Begge bøkene var gode der den fyrste var psykologisk nervepirrande og skrivemåten minna meg innimellom om boka Room av Emma Donoghue. Vera-boka var meir typisk britisk krim med mord ute på landsbygda, noko som passa meg ypperleg, for det er lite som slår den britiske krimmen (og det uavhengig om det er på skjermen eller på papiret). Håper på fleire bøker frå Hausmann etter kvart og så har eg heldigvis fleire bøker av Cleeves å ta av i den alltid store lesehaugen min. Med andre ord: her er det berre til å setje i gong med lesinga!

Hyttehygge og bursdagsfeiring

Hipp, hipp hurra for meg som har bursdag i dag! Tihi ;) Vakna til snø og ruskevêr, noko eg ikkje syntest var så veldig gøy. Blir dimed ingen tur eller aktivitetar ute i dag, men eg koser meg inne med bok og påskekrim på skjermen, eg har fått ei lita gåve og kort frå mannen min og det luktar kake i heimen. Det er siste påskedag, i morgon er det tilbake til jobb. Påska har som nemnt vore innmari fin med lesing foran peisen, sjokolade og kaffi medan me høyrde på "Påskelabyrinten". 

 

Tåke over vatnet og fjelltoppane var det fleire av dagane, men me fekk også eit par dagar med sol som skein rett inn i stova. Laga skuggespel på gardinene. Om kveldane spelte me blant anna "Cluedo", og gurimalla, me fekk sånn ordentleg latterkrampe under ein runde med "Kokelimonke". Små og store stearinlys var tende, mange påskegule og to som var forma som egg. Stilig!

 

På fredag feira me dagen min litt på forskot med koseleg kort og gåver, påskegule tulipanar, påskeegg og ein pavlova med gul frukt. Gult er jo nemleg litt ekstra kult i påska ;) Hygge og avslapping på hytta, fred og ro frå kvardagens kjas og mas, ein riktig koseleg påskeferie!

Ei heil veke på hytta

Sundag i byrjinga av april. Fyrste påskedag og ein heil ferie er snart over. Men som me har slappa av desse dagane, det var akkurat det me trong. Bytte stove for ei dryg veke, vere utan nett og lite TV, høyre lite anna enn susinga av vinden og fuglane som kvitra, lese mykje og strikke like mykje, vere i lag med familien. Mamma og pappa drog opp på tysdag, så sjølv om me drog heim i går, fekk me fleire flotte dagar alle saman i lag med både sol og gråvêr, latter, quiz, spel og god mat. Eg kjem til å dele fleire bilete i løpet av veka som kjem, eg får ikkje med meg alt her i dag, men det er vel inga overrasking at sundagslista denne veka kjem til å vere full av påskerelaterte punkt:

✦ lese påskekrim og drikke ein god kopp kokekaffi

✦ følgje med på "Påskelabyrinten", og det var kult med oppgåver som Mummidalen og Hafrsfjord

✦ "Ull er gull" er eg så einig i, og så denne fine buketten inne på den same bloggen

✦ sauane ute på Jørpelandsholmen – litt for tidleg for lam, men fine er dei likevel

✦ høyre "Six Ribbons" på radioen ein morgon

✦ sjå litt på endå ein episode av Michael Palins mimreprogram

✦ kvar gong Niina postar eit innlegg, blir eg bergatt av bileta hennar – sjå her, her og her

✦ ta fram det fine påskeegget med den søte kyllingen på lokket

✦ kult med ein liten vintagebutikk på eit loft

✦ Zalo har vore med oss på hytta i påska og han har vore heilt i hundre og ti ;)

✦ lese den tredje boka i spionserien om Jackson Lamb og dei andre ved Slough House

✦ Katha skriv så godt i denne teksten om det å prøve å passe inn i ein viss stil på Instagram

✦ kos med stearinlys kvar kveld oppe på hytta

✦ kjenne fjellroa og senka skuldre

✦ tihi, denne uskyldige lille rakkaren 

✦ lese litt ute på terrassen, lese inne foran peisen og lese i sofaen

✦ Hans Zimmer sin filmmusikk med blant anna Løvenes konge i eit program på radioen

✦ ein litt spesiell, men likevel veldig søt fugl

✦ gøy å ta i bruk den nye Twiggygenseren 

✦ Beatrice som har fanga ei heil veke av solnedgangar

✦ finaste Moslivatnet ♥︎

✦ sjølv om toppen eg strikkar no ikkje blir den beste, har det vore herleg å slappe av med strikkinga

✦ vakker versjon av filmmusikken frå Le fabuleux destin d'Amélie Poulain

✦ spele blant anna "Trivial Pursuit"

Påskehelsing 🐣

Gult er alltid kult, kanskje no i desse tider: palmesundag er her og påska er i gong. Når dette blir posta her på bloggen, er me oppe på hytta, for i år blir det hyttepåske. Kjem til å ta heilt fri der analoge aktivitetar står på planen. Eg har ikkje førehandspublisert fleire enn dette eine innlegget, så med andre ord kjem det til å bli litt stille her ei vekes tid. Tenkte eg ville helse og ønskje alle ei riktig god påske med denne gule påskekoppen med litt snop oppi som eg fekk frå jobben :)