Juliveke med mykje jobb og ei veldig roleg helg

Blir aldri lei bøker! Og med kaffi og ein bit sjokolade attåt når det er helg, er det alt eg treng. Etter så mange jobbdagar på rad har eg prøvd å gjere veldig lite no i helga. Eit par ærend og ein tur blei det i går, men elles har det stort sett vore kaffi og bok eg har brukt tida mi på. Så avslappande og herleg! Rart å jobbe annan kvar dag tidleg og seint, men det er no slik opningstidene er i sommar, så me gjer det beste ut av det. For det meste har det gått greitt, men det er ikkje alle som er nøgd med opningstidene, dei automatiske dørene funkar ikkje og innimellom nokre andre småting. Vel, slik er det å jobbe i servicebransjen, både på godt og vondt ;) For me treff mange flotte badegjestar også, det er det ingen tvil om! Vêret har verkeleg vore av og på denne fyrste veka i juli, så det blir spennande å sjå korleis dei neste vekene blir. Over til ei liste som eg så ofte deler på sundagar:

✦ liker godt bøkene til Rainbow Rowell, og Landline var ei søt og litt underfundig bok
✦ "Top 10 Behind the Scenes Secrets About The Princess Diaries" – fordi guilty pleasures ;)
✦ slappe av med te og ei god bok på måndag etter jobb
✦ kulning og nøkkelharpe, så vakker musikk av Jonna
✦ kafébesøk etter jobb på fredag saman med ei av mine beste veninner
✦ å lese om Sola kommune som plantar blomsterenger for biene etter at Sofie skreiv eit brev
✦ rosene og regndropane ute i hagen til eit venepar av oss, akkurat passe kvardagsmagi
✦ ein liten "staycation" i sin eigen by, slik som Alicia i Stockholm
✦ hunden Loulou, ein kjempesøt dachs
✦ og denne søte, lille villkatten
✦ den blågrøne taksteinen på eit hus då eg sykla ein annan veg heim frå jobb
✦ ikkje så ille å ha seinvakt når ein kan sykle heim og oppleve ein slik nydeleg solnedgang
✦ så viktig å setje fokus på dyr og ferie, så les innlegget "Den vanskelige sesongen" hos Et katteliv
✦ Hvem drepte faren min, nok ei god bok skrive av Édouard Louis
✦ gode tips til korleis å reise med toget til utlandet frå Noreg
✦ ha, ha, måtte ha det litt moro då eg venta på bussen i tolv gradar og regnjakke – i juli!
✦ 25 år sidan den finaste Forrest Gump hadde premiere, og her er nokre artige fakta om filmen
✦ litt stas at forfattaren av Lukta av klor likte biletet eg la ut på Instagram