Grøftekantsbukettar

Overalt når eg syklar til jobb eller går til byen no i juni. Blomar i så mange fargar, storleikar og fasongar, ei humle og to innimellom. Kvardagsfint langs grøftekanten, såkalla grøftekanstbukettar.

"...på kirkegården ved kysten, finnes det ikke mange menn"

Songen "Lovise Lind" av Halvdan Sivertsen, dukka opp i hovudet mitt då me køyrde langs Jæren og stoppa ved Varhaug gamle kirkegård for ei lita stund tilbake. For sjølv om eg ikkje gjekk og titta nøye på alle gravstøttene, kan det nok hende at det ikkje finst så mange menn som ligg ved denne kyrkjegarden ytst ved havet. På ein minnestein står det mellom anna "Og ingen veit kvar grava er, eit minne får dei kvar og ein ved denne minnestein". Orda er såre og samstundes vakre. Å stå på den grøne plenen og berre vere ei lita stund, kjenne sjølufta og la tankane fare, kjenne orda frå Sivertsen – og også Moddi med songen "Kjerkegård ved havet" – på eit eller anna vis var det ganske fint.

Tjueto ting

Med ein gang ein jobbar laurdag, blir helga ganske mykje kortare. Starta veka med to dagar fri om ikkje anna (ekstra fridag nettopp fordi eg jobba i går), og sjølv om eg var gåen i hovudet i dag, har eg lese mykje. Kva anna har skjedd denne veka? Hmmm, ikkje så mykje. Nokre av dagane på jobb var supertravle, for når det er gråvêr ute og gode tilbod inne, skjønner eg godt at folk stikk innom. Sjølv har eg tatt ein spasertur, og sykkelturane fram og tilbake jobb på denne tida av året, kan eg ikkje klage på. Fleire lesestunder, ta bilete til jobbens IG-konto, jobbe med ein vikar som eg har mykje til felles med og le litt av Zalo då me åt frukost i byrjinga av veka er slike ting som alle er med på å løfte kvardagen. Byrjar å bli mørkt ute, snart på tide å seie "god natt". Tjueto ting på lista denne gongen:

✦ som du sikkert har skjønt, så verkeleg storkoser eg meg med å lese Anne-bøkene om igjen

✦ investere i ny Mac etter at min ni år gamle maskin byrja å ta kvelden

✦ gå til byen på den eine fridagen min

✦ flotte blomar som skal vare ei stund inne hos Et dryss kanel

✦ spørsmål om Glynis Johns og Mary Poppins i ein episode av Huskestue

✦ laurdagstaco og bra film etter jobb

✦ lurer på om eg må lese fleire av bøkene til Svetlana Aleksijevtisj etter å ha lese Frihet

✦ sykle heim frå jobb med kveldslyset som lager skuggespel 

✦ blir framleis like sjarmert av Bami og Dami

✦ Zalo er ein liten raring, like gul og kul som vanleg

✦ gøy å suse vidare i krimserien om rettsarkeolog Ruth Galloway

✦ få skryt for kundeservicen

✦ plukke små blomar til å ha i rulletsteinvasen 

✦ vlog frå Derbyshire med Miranda og Donna, får verkeleg lyst til å reise dit eg også!

✦ lese Christie-klassikaren Og dermed var det ingen

✦ svanefamilien ved Mosvatnet, altså! 

✦ alltid koseleg å slå av ein prat når det kjem kjentfolk innom jobben

✦ å løfte blikket mot dei grøne blada i alle fasongar ute på ein spasertur

✦ stilige illustrasjonar med inspirasjon henta frå Marias plagg i The Sound of Music

✦ klare 15 av 21 spørsmål i Dag og Tid (og så klart morgonkaffien)

✦ mosaikk på ein vegg ved konserthuset

✦ Zouq i Sandnes har knallgod middag, og det same med desserten – det blei både kaffi og lesestund

Ingen stygge andungar

For svanefamilien ved Mosvatnet er heilskjønn. Sykla litt tidleg til jobb ein av dagane nettopp fordi eg håpte på å sjå dei to kvite svanene og alle dei grå dunnøsta. Denne gongen låg dei heilt nede ved vatnet, ikkje midt i campingområdet. Sjå på den eine lille som strekk seg med sine små vingar.

 

Er dei ikkje søte?! Like glad kvar gong for at dette er ein del av min jobbveg, ein del av min kvardag.

Gulaste linselusa

Zalo er like gul og kul som vanleg. I helga og fram til måndagsformiddag, var han på besøk hos oss medan mamma og pappa var på konsert i Manchester. Aller artigast er det når han kjem ut for å ete frukost i lag med oss. Tihi, egg er det beste han får! Og så er han veldig morosam dei gongane han set seg på kameraet mitt når eg prøver å ta bilete av han – ei ordentleg linselus i hus.

Madlatua

Utsikt, haustfargar om sommaren, små blomar i ein bergsprekk og endå litt meir utsikt. Turen treng ikkje alltid å vere så lang for at den skal vere bra, og turen til og ved Madlatua kystfort var akkurat som skildra. Godt å sitje på toppen av ein liten knaus, ta ein pause og sjå utover delar av byen vår.

Klassikarar i bok- og musikkform

I kveld spelte me siste orkesterkonsert før sommarferien. Hadde øving i går, generalprøve midt på dagen i dag og sidan konsert, så ein kan vel trygt seie at det har vore ein ordentleg orkesterhelg for vår  del. Sidan me ikkje spelte på alle satsane, blei det (heldigvis) ein del tid til lesing også. Helgebesøk av Zalo, kveldsmøte på jobb, sykle til og frå jobb mellom regnbygane (for det har faktisk vore ein del regn her i byen denne veka), kjekt å planleggje endå litt meir av årets sommarferie og sånn sett elles heilt greie dagar på jobb. Tre av fire dagar jobba eg kveld, og det er jo ikkje heilt optimalt. Men, men. No er det på tide å slappe av med ei god bok, prøve å roe ned kroppen etter konserten. Håper du har hatt ei fin veke og ei like fin helg, her kjem meir av mine fyrste junidagar:

 

✦ brukte litt tid, men som eg likte å lese klassikaren Pride and Prejudice av Jane Austen

✦ når ein ikkje speler like mykje på alle satsar, må ein nytte sjansen til ei lesestund

✦ oransje valmuehav

✦ og apropos blomsterhav: synest denne tapeten er superfin 

✦ knallgod laurdagspizza og morosam film

✦ Ixelles av Johannes Anyuru er ei bok ein berre må lese, for ei leseoppleving!

✦ få auge på ein svanefamilie rett ved Mosvangen camping på veg til jobb 

✦ "Top 20 Stop Motion Animated Movies" – The Fantastic Mr. Fox og Nightmare Before Christmas

✦ Obrestad fyr som ein einsam majestet ute ved havet

✦ alltid kjekt når kjentfolk er innom butikken og eg har tid til å slå av ein prat

✦ sjeldan eg les bøker om filosofi, men Gaarder skriv så herleg funderande i Det er vi som er her nå

✦ gleder meg stort til å sjå Jesus Christ Superstar i september, og her kan ein høyre ein smakebit

✦ høyre "One Night in Bangkok" frå Chess på radioen på veg heim frå orkesterøvinga

✦ lage ei lita utstilling på jobb i samband med pride

✦ nettbutikk for alle oss bibliofilar ;)

✦ ete god middag på restaurant før kveldens konsert
✦ rhododendronfargefest etter regnet

✦ blir ikkje lei av å sjå ein video eller to med denne fine kattegjengen

✦ låt bra på konserten i kveld der me mellom anna spelte Brahms sin fyrste symfoni

✦ helgebesøk av Zalo, og han er så morosam når han et frukost i lag med oss

✦ bok tre om Anne, Anne of the Island, er nyleg lesen og eg verkeleg koste meg også med denne!

Oransje blomsterhav

Ikkje berre løvetann og rhododendron langs den vegen eg syklar fram og tilbake jobb. I ei lita eng rett ved ei av naboblokkene, er det akkurat no meir enn berre grønt og litt gult. For oransje valmuar stikk opp og skaper ein varme som lyser på lang avstand. Eit lite blomsterhav i sidesynet mitt.

Som ein dans

Kveldslyset som laga ordentleg skuggespel på veggen laurdagskveld. Me sat inne på gjesterommet – han i dagsenga og eg i den lille lenestolen – og las i kvar vår bok. Slappa av, høyrde lågt på roleg musikk og berre naut tida. Vindauget stod på gløtt slik at gardinene blafra, og det var som om dei dansa på veggen då lyset skein gjennom dei. Kveldslyset og ei lita lesestund tidleg i juni.

Einsam majestet

Køyretur langs Jæren. Han fine og eg. Sjå ut vindauget. Gule enger, så gult at ein nesten ikkje ser det grøne graset. Eit fyr ute ved kysten frå 1873. Obrestad fyr ligg så å seie rett ved Hå gamle prestegard, så når ein fyrst er der ute, er det enkelt å ta ein tur innom både det eine og det andre. Eg veit ikkje heilt eksakt kva det er med fyrtårn, men dei fascinerer meg. Anten det er lite eller stort, det er noko med at dei står så langt ute ved havet, ofte heilt for seg sjølve, som ein einsam majestet.

Heldigvis mykje bra lesestoff

Rydde vekk maisalet, ta i mot store leveransar, hjelpe kundane og fylle på med nye varer, dagane på jobb denne veka har verkeleg vore travle og det har vore vanskeleg å komme à jour. For all del, det er ikkje slik at det er krise, og me gjer alle så godt me kan (fine folk å jobbe i lag med), men akkurat desse dagane har det vore litt for mykje for min smak. Var difor veldig godt å ikkje ha store planar for helga, og eg har fått lese mykje, mykje, mykje. Min betre halvdel gav meg makronar og blomar på bryllaupsdagen vår, han kjenner meg godt ;) Litt vind i dag, men sola varma og me var ute og gjekk ein akkurat passe sundagstur. Stakk forresten innom Sunde gårdsutsalg der me alltid finn gode, lokale produkt å ha med heim. Og trass travle timar på jobb, har det også vore fleire lyspunkt:

 

✦ las nyleg Jenta under jorden, og likte godt denne fyrste krimboka om rettsarkeolog Ruth Galloway

✦ gleder meg til å sjå eit par musikalar i London i sommar

✦ Sofia Lundberg kan det med å skrive om einsemd og alderdom: Eiketreet er ei sårvakker bok

✦ gjensyn med Haru som ein liten kattunge, og han hadde like store og skjønne auge då som no

✦ høyre "Six Ribbons" med Jon English på radioen nesten på bryllaupsdagen vår

✦ dei knallsøte andungane ved Mosvatnet

✦ siste rest av vår: rosa konfetti på bakken

✦ Mirandas vlog frå Bath, ser ut som ein koseleg by med fleire flotte bokbutikkar

✦ kveldslyset som dansapå veggen inne på gjesterommet i går då me sat der og las

✦ kaffi, bok og makronar, ekte sundagskjensle

✦ for ein søt lundefugl, teikna av Caroline McPherson

✦ kjekt å prate med ein eg gjekk i klasse med på ungdomsskulen då han var innom for å finne ei bok

✦ sykle i skjørt utan strømpebukse

✦ gjensyn med Haru som ein liten kattunge, og han hadde like store og skjønne auge då som no 

✦ må berre nok ein gong tipse om TAKEaBREAK i Sokndal – me rakk til og med å lese litt

✦ småartig å ta eit bilete av dei nyaste pocketbøkene ein av jobbmorgonane

✦ tinge heim god, gresk middag i kveld som ei lita minifeiringa av bryllaupsdagen

✦ og Haru som no passar på dei to små, søte kattungane Bami og Dami

✦ komme oss ut på ein liten sundagstur før det var heim og lese meir i dei kjekke bøkene

✦ knallgult i alt det grøne på veg til jobb

✦ togferie blir det også i år, og boka Reis bedre er ei ordentleg inspirasjonskjelde