Stykkevis og delt mellom jobb og heime

Jobb måndag, onsdag og fredag, med andre ord jobba eg annan kvar dag denne veka. Ganske stykkevis og delt, men det er no slik det ofte er mellom jul og nyttår. Kaldt her i byen, i alle fall til Stavanger å vere, likevel har sola titta fram og det har vore godt å komme seg litt ut mellom all jobbing og lesing. For lesing har det blitt mykje av, både på tampen av 2025 og inn i det nye året. Og ja, godt nytt år forresten, eg gløymde å skrive det i førre innlegg ;) Frå tysdagsettermiddag og fram til i dag, passa me Zalo (eller var det han som passa oss?!), og sjølv om det var ein ukjent heim, kom han ut for å utforske og vere i lag med oss. Årets fyrste dagar har allereie passert:

 

✦ sundagskjensla i blåtimen med kaffi i ein vakker kopp, stearinlys og ei god bok

✦ komme heim til kakao etter seinvakta måndag

✦ Jo Thomas si julebok A Recipe for Christmas var akkurat passe søt

✦ rim på bakken 

✦ nydeleg versjon av songen "Both Sides Now" 

✦ sollyset over Hafrsfjord i går, godt å  gå ein tur, berre vere ute og kjenne sola i andletet

✦ feire nyttårsaftan i lag med kjekke folk, mellom anna ei av mine beste veninner 

✦ spele "Calico" to av kveldane i lag med mannen min og broremann 

✦ tihi, den der huskykvalpen er superduperskjønn 

✦ å, Juleroser er også denne gongen det finaste juleheftet 

✦ adventstjerna i vindauget 

✦ trass berre tre og noko sur vind, var det fint å sjå litt av den blå himmelen på veg til jobb

✦ klagar ikkje på å teste badekaret etter fredagsjobbing, eg senka skuldrene og slappa av

✦ Bikky, som driv kontoen Broccoli Cat Art, lager dei kulaste katteteikningane

✦ gøy å ha på meg den glitrande, kongeblå kjolen som eg kjøpte brukt for nokre år sidan 

✦ plantar og skuggespel i stova vår

✦ Zalo har vore på besøk i nyheimen for fyrste gong, og det har gått over all forventing

✦ fyr i omnen  

✦ og bruke varmeteppet som eg fekk til jul, for det har som nemnt vore kaldt her i byen 

✦ siste bok i fjorårets lesemål, var Trollmnannen fra Jordsjø av Ursula K. Le Guin, ei veldig bra bok

✦ støvsuge og gjere litt reint i heimen 

✦ laurdagstaco er alltid ein slager 

God mat hos gode venar

Gårsdagens nyttårsfeiring var like fin som den for eit drygt år sidan! Også denne gongen var me hos det same veneparet, dei me pleier å vere hos på 17. mai og ha frukostquiz med, og me var ein passe akkurat stor gjeng. Me fekk servert både forrett, middag og dessert, der eg fekk utfordra meg på forretten med ingrediensar eg ikkje pleier å ete (men eg visste om det på førehand, så eg prøvde å ta det på strak arm). Knallgod hovudrett, og heimelaga sjokoladepudding med – også den heimelaga – vaniljesaus; eg seier berre "nam"! For pusen var det heilt topp med juletre, me andre syntest det var alle tiders med quiz, prat, latter og hygge. Eg nytta høvet til å ha på meg den glitrande kongeblå kjolen. Vêret var nokså skiftande, og sånn sett var det like så kjekt å sjå på fellesfyrverkeriet frå stovevindauget. Takksam for å feire inngangen til 2026 i lag med fleire finingar, og kanskje særskilt saman med ei av mine beste veninner – for det er lenge sidan sist me feira nyttår i lag! :D

Dekka bord og pynta tre

Andre juledag hadde me middagsgjestar her hos oss. Me serverte hjortegryte, noko som fall i smak, og bordet var dekka med mormorserviset, smellbongbongar i fint motiv (fleire av motiva frå Sara Miller London er ordentleg flotte) og koselege serviettar. Ikkje veldig avanserte greier, men det treng det heller ikkje å vere. Sundagsmorgon hadde me frukostgjestar, og då var det mellom anna heimelaga surdeigsrundstykke på menyen. Fine folk, bra quiz og dei klassiske dompapane.

 

Og treet vårt. Skal innrømme at det er ganske stas å ha eit ekte tre i vår nye heim, kjøpt på ein gard i Randaberg. Treet er fylt med julepynt der mykje er funne lokalt, på reisar, pynt me har fått eller som har ei anna tilknyting til oss. Mellom anna er det nydeleg nuperellejulekule frå tante, ugl frå ri.make (som eg skreiv meir om i fjor), ein liten pakke funne i ein julebutikk i York, Mummikule, eit lite tinnhus med årstalet 2025, ein snømann og ei keramikkstjerne kjøpt på julemesse her i byen, ein nydeleg istappaktig glaspynt fått i gåve, kanadisk julehelsing kjøpt på Etsy, og eit lite lokomotiv – for me er jo togelskarar! Så mangla me kanskje norske flagg, stjerna er litt skeiv, men det er vårt tre!

Slike dagar på tampen av året 🌟

Jobb igjen i morgon, men eg har faktisk hatt fri heile jula og skal ikkje klage. Dagane har vore mjuke, eg har fått lese ein del, slappa av og vore med familie og venar. Kunne gjerne hattt eit par ekstra fridagar berre for å lese meir og høyre på julemusikk, senke skuldrene endå meir før kvardagen set i gong. Lite snø å spore her i Stavanger no i romjula, likevel vil eg seie at desember har vist seg frå si beste side med sol og strålande vêr kvar dag i det siste. Tja, eg veit faktisk ikkje om eg har så mykje meir å seie. Noko har eg allereie blogga om, og resten er vel å finne i årets siste sundagsliste:

 

✦ som vanleg: sjå Love Actually medan eg pakka inn julegåvene

✦ Val McDermids Mord til jul var ei kjekk samling julekrimnoveller 

✦ soloppgangen fleire av dagane denne veka, like magisk uansett kva dag

✦ starte lille julaftan med spa og flytetank hos Jæren flytesenter

✦ diggar å ha på meg min raude julekjole, inspirert av Ali MacGraws kjole i Love Story 

✦ smellbongbong i eit fint motiv, veldig kjekt å invitere familien hit på middag andre juledag 

✦ turen langs Hellestøstranda var akkurat det me trong midt i juledagane

✦ treffe ei av mine beste veninner heile to gongar  

✦ artig å sjå Dick van Dyke-filmen Fitzwilly i går kveld, tenk at han nyleg blei hundre år 

✦ pynte vårt eige juletre 

✦ juledagar på Sola og her heime, god mat, spel, quiz og mykje hygge 

✦ kalenderboka De ensomme hjerters bar var akkurat passe herleg med kule karakterar

✦ lyset inn i stova i starten av veka

✦ Mirandas video med mange kjekke julerelaterte bøker og fine ting 

✦ Zalo var heilt med, og det å få smake på eggerøre var definitivt ein hit

✦ solstrålar som blei reflektert i blokkene i nærområdet då eg tok meg ein rusletur på fredag

✦ heimelaga marsipan og den vakraste juleduken 

✦ sjå fjorårets julespesial av All Creatures Great and Small, og gjett om eg bleir rørt 

✦ kan ikkje anna enn å smelte litt av denne skjønne huskykvalpen 

✦ julaftansmorgon med dyne, julehefte, kransekakestong, fyr i omnen og to julefilmar 

✦ raude bær og det gylne sollyset på den kvite veggen 

✦ invitere fine folk på frukostquiz i dag tidleg, heimelaga surdeigsstykke og vinterserviset vårt

✦ gøy å lese A Cornish Christmas Murder, bok nr. fire i serien om Jodie "Nosey" Parker

✦ treffe eit venepar ute ved Godalen i går, gå ein liten tur med dei og berre prate 

Hellestøstranda

Fyrste juledagstur langs ei strand. På torsdag tok nemleg mannen min, broremann og eg tok oss ein tur ut Hellestøstranda. Vêret var ypperleg, og det var godt å berre gå i sanden, sjå sola gå lågare og lågare, høyre bølgeskvulp og suset frå havet. Frisk sjøluft i andletet, fargespel på himmelen.

 

Varde i solnedgang. Klisjéfylt, men sant. Blanke skjel i sanden, rim på steinane og blide fjes. Gyllent ettermiddagslys over havet. Mjuke dagar no i desember, både inne og ute.

Juledagskavalkade

Kven fann mandelen i grauten? Joda, i år som i fjor var det pappa som fann den. Me åt risgraut lille julaftan på Sola, slik me pleier å gjere. Og etter maten, fann me fram eskene med julepynt og pynta treet i lag. Ein lille julaftan heilt etter boka med andre ord :) Julehuset i gangen var pynta, og Zalo var heilt i hundre og ti. Gul og kul, det er Zalo, det, han fortener eit eige innlegg!

 

Sjølve julaftan starta me her heime. Fint å ta det heilt med ro, lese unde dyna, fyre i omnen og sjå på dei to julefilmane eg alltid pleier å sjå 24. desember. Kjekt å ta på meg min raude julekjole før me køyrde til Sola i fire-tida. Kalkun med tilbehør til middag (inkludert eit par medisterkaker) og til dessert var det riskrem med bringebærsaus, krumkaker og litt heimelaga is. Alltid like artig når me må pakke opp gåver som er kamuflerte, til dømes ei stor vedkorg. Mange flotte gåver, ein liten pause med kaffi og julekaker, opna dei siste gåvene og me runda av kvelden med quiz.

 

Juledagsfrukost med noko for ein kvar smak. Ein roleg formiddag før me gjekk tur langs Hellestøstranda i heilt nydeleg vintervêr! Kaffi, lesing og Juleduken med stor J. Me åt fisk til middag før heimelaga sitronfromasj og eit par rundar med "Decrypto". I ti-tida køyrde me heim, og me vakna opp i vår eigen heim i dag tidleg. Her har me i dag stelt i stand til besøk, for i kveld var det vår tur til å lage middagen. På menyen stod det hjortegryte, og det var veldig kjekt å dekke bordet og vite at me byrjar å kjenne oss ordentleg heime i huset. Koselege juledagar med familien, me er heldige.